¹ А Свэнто Духо ракирэл, со явэна дасавэ дэвэса со кой-савэ мануша отжяна патябнастыр, пал дова со лэна тэ дыкхэн пэ хохаибнытка духи и пэ сыклярибэн бэнгытко, ² до дуемуитко хохаибэн, савэндэ схачия лач и патыв, ³ далэ мануша запхэнэн , тэ выджян палэ ром, тэ лэн ромнен, тэ хан хабэн , сово Дэвэл скэрдя, соб патянкунэ тэ хан и тэ пхэнэн наис. ⁴ Пал дова со скэрдя Дэвэл саро лачё и саро прылэлпэ . ⁵ Пал дава со саро жужакирэлпэ Дэвлэскирэ лавэса и мангипнаса. ⁶ Сыр сыклякирэса адаласкэ пшалэн, авэса лачё рашай Иисусоскэ Христоскэ, до лав и патябэн и лачё сыклярибэн пир саво ту джяс. ⁷ Напрылэ кон роспхэнэл налаче пхуритка парамицы, нэ хвэдыр дэ сари зор сыклёв тэ пхирэс ангил Дэвлэстэ. ⁸ Пал дава, со кон дыкхэл пал пэскирэ трупоскирэ маса, далэстыр нанэ бут лачипэн, а кон пхирэл дэ дар ангил Дэвлэстэ ада исын дэ саро куч дадывэс и со авэла ангил. ^{9 10} Лав дава чячуно и молэл лэс тэ прылэн . Ваш дава амэ кэрас буты дэ сари зор, со патяс дэ джидэ Дэвлэстэ, Саво Зракхэл сарэн манушэн, а бутыр сарастыр кон патял дэ Лэстэ. ¹¹ Роспхэн и сыклякир адава. ¹² Мэк никон на чурдэлпэ тырэ тэрныпнаса, нэ сыкав сыр трэби тэ лыджяс пэс машкир патянкунэндэ до лав, машкир манушэндэ, до камлыпэн, до патябэн, до жужипэн. ¹³ Сыр явава, кэ дава гин лав, подрикир, и сыклякир манушэн. ¹⁴ На розчурдыпэ дароса саво тукэ дыно дэ пророчесто и сыр рашая мангнэпэ чидэ пэ тутэ васта. ¹⁵ Пал дава думинэ, дэ дава джив, соб сарэ тэ дыкхэн тыри духовно буты. ¹⁶ Дыкх пэ пэстэ и пэ сыклярибэн, зоралэс рикирпэ пал дава, сыр лэса дава тэ кэрэс то зракхэса пэс, и долэн кон лэла тэ шунэл тут.