¹ Далэ лава чячунэ: кон тырдэлпэ тэ авэл рашаса, дова камэл тэ кэрэл лачё рындо. ² Рашай трэби тэ авэл би дошако. Ёв ром екхэ ромнякэ, годявир дэ саро хулай, прылэл манушэн илэса, джинэл сыр тэ сыклякирэл, ³ нанэ матимарё, джинэл тэ рикирэл пэс до васта, нанэ захало, ило саво напасёл ко ловэ, ⁴ лачё хулай дэ пэскиро кхэр, чяворэ кандэн лэс екхэ лавэстыр ⁵ а сыр кон на джинэл сыр тэ лыджял пэскиро кхэр, сыр ёв авэла тэ дыкхэл пал Дэвлэскири кхангири. ⁶ Рашай трэби тэ авэл нанэ долэндыр кон нагара патяндыя дэ Дэвлэстэ, соб пхуткирдыпнастыр тэ напэрэл до сэндо бэнгэстыр. ⁷ Трэби пал лэстэ тэ авэл лачё лав манушэндыр, а нанэ дылыно пал саво вхтылэла лэс бэнг. ⁸ Дякэж и дьяконы — тэ авэн годявир, тэ на хохавэн тэ на припасёл ило ко вино и ко ловэ, ⁹ лэнгэ откэрдо патябэн дэ жужы патыв. ¹⁰ И мэк ёнэ сыкавэна пэс до вырикирибэн, тэнче сыр никон на попэрэла дэ лэндэ дош, мэк домэкэн лэн кэ Дэвлэскири буты. ¹¹ А дякэж и джювля --мэк лыджян пэс годявир, тэ на хохавэн пэ манушэндэ, чячунэ тэ авэн дэ саро. ¹² Дьяконо мэк авэла ромэса екхэ ромнякэ, хуласа дэ пэско кхэр пэскирэ чяворэнгэ. ¹³ Пал дасавэстэ хуластэ джял лачи мавла и ёв зоралэс патял дэ Иисустэ Христосостэ. ¹⁴ Чинав тукэ дава лыл, нэ думинав сыго тэ явав кэту. ¹⁵ Сыр зарикиравапэ, соб ту тэ джинэс , сыр трэби тэ лыджя пэс дэ Дэвлэскиро кхэр, саво сын Кхангири джидэ Дэвлэскири, сави тэрды зоралэс по чачибэн.. ¹⁶ Баро чачибэн откэрдо манушэнгэ, тэ гинас лэс: Со Дова кон явья сыр мануш, сыс допхэндо Духоса,. со Ёв Христосо , сыкадя Пэс анголэнгэ, роспхэндо сыс манушэнгэ, савэндыр бут патяндынэ дэ Лэстэ, Ёв сыс гадэмо дэ слава.