¹ Акана, прикхарав тэ кэрэн ангил сарэстыр мангипэна и тэ мангэн Дэвлэс, пхэнэн наис пал сарэндэ манушэндэ, ² пал царендэ и пал сарандэ шэралэндэ, соб амэндэ тэ авэл мирно и достойно джиипэн, дэ саро тэ полас Дэвлэс. ³ Ада чялёл Дэвлэскэ Саво Зракхья амэн , ⁴ Саво камэл, соб сарэ мануша тэ зракхэнпэ и тэ уджинэн Дэвлэско чячибэн. ⁵ Пал дава со екх Дэвэл, и екх кон машкир Дэвлэстэ и манушэндэ — мануш Иисусо Христосо, ⁶ Саво плоскирдя кокоро Пэса пал сарэндэ манушэндэ. Адалэса Ёв допхэндя дэ пэскиро дэвэс, ⁷ ваш со ман чудя тэ роспхэнав и тэ авав апостолоса ракирав чячибэн дэ Христостэ, на хохавав, роспхэнав и сыклякирав манушэн савэ нанэ евреи до патябэн и чячибэн. ⁸ И, мэ камав соб мурша тэ мангэнпэ пэ сарэ штэты, тэ гадэн свэнта васта би холяко жужэ илэса. ⁹ Дякэ и джювля, дэ лач и патыв мэк сыкавэн пэс, мэк на урьенпэ нанэ дэ дрого идя чи сунакай, и на пхутён ек ангил екхатэ, ¹⁰ а мэк кэрэн лачэ рынды савэ трэби джювлякэ и гинэн Дэвлэс дэ пэскиро ило. ¹¹ Ромня мэк сыклён тэ шунэн и тэ авэн штыл, дэ саро кандуны. ¹² Тэ сыклякирэ джювлякэ мэ запхэнав, и тэ авэл хуланы пэ ромэстэ мэ запхэнав, нэ тэ авэл штыл. ¹³ Пал дова со ангил сыс скэрдо Адамо, а тэнче Ева, ¹⁴ и хохадо сыс нанэ Адамо, а джювлы сави пэя до бэзэх. ¹⁵ Нэ заракхэлапэ сыр биянэла чяворэн и ачэлапэ до патябэн и камлыпэн и свэнто джюипэн.