¹ Мэ Павло, апостоло Иисусоско Христоско пир Дэвлэскири воля, Саво Зракхья амэн, и Раескири Иисусоскири Христососкири воля дэ савэстэ амэ патяс. ² Тимафеёскэ, мирэ чячунэскэ чявэскэ пир патябэн, – тэ авэл лачипэн, милость и миро, Дадэстыр Дэвлэстыр и Иисусостыр Христостыр амарэстыр Раестыр. ³ Сыр мэ, джявас дэ Македония, мангьём тут тэ ачеспэ до Ефесо, соб ту тэ припхэнэс манушэнгэ тэ на сыклякирэн авирэскэ ⁴ и тэ на пришунэнпэ кэ парамицы и тэ на роскэдэн кон савэ родостыр, со дава лыджял кэ кошибэн, а нанэ кэ Дэвлэскири буты до патябэн. ⁵ и адава со припхэнав, исын камлыпэн жужэ илэстыр, лаче патываса и дэ чячюно патябэн, ⁶ сын мануша савэ отгинэ далэстыр, и лынэ тэ ракирэн пэ бавал, ⁷ ёнэ закамнэ тэ сыклякирэн законо (саво дыя Дэвэл Маисеёскэ) кокорэ на полэн, со ракирэн и, со сыклякирэн. ⁸ Амэ джинас, со законо лачё, сыр мануша кэрэн дякэ сыр дэ лэстэ чиндо. ⁹ джинас со, законо чиндо нанэ ваш кандунэнгэ манушэнгэ, а ваш долэнгэ кон на кандэл и на пхирэл до законо, конэстэ нанэ дар Дэвлэскири, дживэн до бэзэха, хасютнэ и налаче, гадэн васт пэ дадэстэ и датэ, умарэн манушэн, ¹⁰ дживэн нанэ екхэ ромняса, мурша лэн пал пэстэ муршэн, бикнэн бутярнэн, хохавэн пэ манушэндэ, и йивья солакхан, и дякэш саро дасово, со на сыклякирэл Дэвлэскиро Лав ¹¹ пал саво ракирэл Еванглия пал слава амарэ бахталэскирэс Дэвлэс, саво дыя мангэ тэ лыджяв. ¹² Наис мандыр , Исусоскэ Христоскэ амарэ Раескэ, Саво дыя мангэ зор пал дава со Ёв прыджиндя ман чячунэса и чидя ман пэ пэскири буты. ¹³ Мэ саво кэ дава кошавас и традавас, чивавас до бэшибэн манушэн. Нэ Дэвэл простиндя ман пал дова со мэ на джинавас со кэрав и на патявас. ¹⁴ Нэ явья лачипэн амарэ Раескиро кхэтанэ патябнаса и камлыпнаса дэ Иисусостэ Христостэ. ¹⁵ Дава лав чячуно и ёв молэл тэ прилэн лэс сарэ « Иисусо Христосо явья до свэто, соб тэ зракхэл манушэн бэзэхэндыр », савэндыр мэ перво. ¹⁶ Нэ Дэвэл простиндя ман, соб Иисусо Христосо тэ сыкавэл пэ мандэ первонэстэ саро Пэскиро вырикирибэн, соб тэ дыкхэн мануша савэ тэнче патяна дэ Лэстэ кэ вэчно джиипэн. ¹⁷ Свэтоскирэ Царёскэ, Саво на мэрэл, Савэс никон на дыкхья, екхэскэ Дэвлэскэ -- патыв и слава дэ сарэ дэвэса и дэ сарэ бэрша, аминь! ¹⁸ Тимафеё, чяво миро! припхэнав тукэ дякэ, сыр сыс пхэндо пал тутэ пророчество, соб ту лэса тэ кэрэс Дэвлэскири буты, ¹⁹ до патябэн и лачи патыв, савятыр кой-савэ мануша отпхэндэпэ и хаскирдэ патябэн . ²⁰ Дасавэ мануша Именеё и Александро савэн мэ отдыём бэнгэскэ, соб ёнэ тэ сыклён тэ накошэнпэ.