\c 1 9

1 ሃኣይኬ ክርስቶሴ ሃሃሳውባ ኣኩሉክ፤ ሃሾሮሼንኬን፤ ሺቢ ናኒዻ ማኚሺሼ ኣምባ ኬመንፐስካ ባሪዮ እን ኣይ ዋናጝ። 2 ሞይካዾ ታቺዬ ጭንቄት ኬና ማር ጃክኔን ኣኔባ ሻን ናኒ ክያኒ። 3 ሃሺጝ ናንዳካ ውራን ናኒዬ ናንዳካ ጪኒጌን ናኒ ኣይኒን ካሻሜኬ ኦካ ክርስቶስ ዋናዬ ካፓቄዻጝ ሃኣኔን ናሺዬን፤ 4 እንግንዻ ጋይ ዛርሲካ እስራኤል፤ ሃንታ ማቲዬኔ፣ ጎቢንታካ ባሪዮዬ፣ ቱምዬን ሃሊ እኔ፣ ህጊ ናሺዬኔ፣ ዳምቢካ ቶኦካ ባሪዮዬ ቃቦ ሹቃ እኔ ሃጊዬይ። 5 ሹቡጌን ጌዬይዻ ጋይ ጊዬይ፤ ክርስቶስዻ ኬቢዛካ ጂሺኔንካ ሩዋ ኔኒ ኮምሼ ሃም ጊዬዩጝ፤ እሺዻ፣ ሃኬና ኣይኬ ኦካ ፓይላ ሳጊዬ ሃባሪዮ ኬና ጎሺዬ ኬቦንካ ቦን፤ አሜን።

6 ኣይባዬ ካኒ ሺጝኬን ጎይዳ ክያጃካ ባሪዮ፤ ናንዳካኦ ውር ጊታይ ጂሼኬ ኦካ ውርካ እስራሉጝ ፓይላ ማር ውርካ እስራኤሌን። 7 ናንዳካጝ ጋዬኬ ኦካ ቢዛካ አብራሃምዻጝ፣ እንግን ፓይላ ማር ሃንታካ አብራሃሜን፤ ሳጊዻ ሃኬ እያይ ሺጜ፦ "ጂሼን ኑኑ ሺውኬ ታካ ይስሃቁጝ።" 8 እን ሺጜ እያይዻጝ ጊታይ ሺጜ ሃንታካ ባሪዮጝ ማር ሃንታ ጊታይካ ኣሩጜን፤ ኣይባዬ ሃንታ ጊታይ ሺጜካ አብራሙጝ ሃሃንታ ጊታይካ ቃቦ ሹቃጝ። 9 ሺጝ እያጜ ጋዬኔ ቃቦ ሹቃ፦ "ሹ ኔኒ ዬክሻያጝ ሃዋክባ፤ ሳራዻ ጂሽባ ሃንታካ ጁሙ።"

10 ማር እን ጲኔኔ፣ ሃንታካ ርብቃ ጋኔ ሹኔ ክየም፤ እሺዻ ሃሹኔ ጉዋዩ ይስሀቅ። 11 ካኒ ጂሽኬን ሃንታን ጊታይ ኣይ ማንታኔ፣ ወይ ካኒ ጋሺኪኬን ኦኬና ኣይ ሹቃዬ ጋራዻዬ፣ ቃቦካ ባሪዮ ካጃኪኔ ኬእድኔኑጝ፣ 12 ማርኬ ዋድማ ኣዬንኔ ኬእን ኣዬኬ ሺውኔኑጝ ሺጝ እያጜ ሜይሼያ እሺ፦ "ታቺ እን ካዋድምሺንቴባ እን ኣይ ዽታኮጝ።" 13 ይንዻ ሃኬ እያይ ሺጜ እያጜ ቶኮጝ፦ "ሃናሺያ ያይቆብ፤ ዬ ሃሚኔያ ኤሳው።"

14 ኣኪ ሃሺጛ ኦ? ባሪዮ ካሻምሼ ኡዋው ባሊ? ክየምጵንዻ ማር እያይኔን! 15 ናንዳካኦ ዋይሼያ ሙሴ እያጝ፦
"ሃኦቼባ እን ኦቾጝ፤
ሃዻዹጝኔባ እን ዻዹጝኔዻ።"
16 ኣኪ ይን ማርኬ እን ውር ዎሼዬኔ ወይ ማርኬ እን ውር ዎሼካ ኣሽክዬኔኔ፣ ሃኬ ዻዹጝኔንካ ባሪዮ። 17 ወርቀትዻ ዋይሼ ፐርኦን እያጝ፦ "ካጌዬ ቁዋቅቲ ናኒ ኦኑኑጝ፣ ካሃሳዌ ሮጝ ናኒዻ ኦካ ፔን ፓይላጝ ሃቲትያ እን ናንዳካ እእጝቁ።" 18 ዬ ባሪዮ ናንዳካ ካጝ ዻዹጝኖጝ ዻዹጝኔባ እን ናሺዮጝ፤ ሸን ኔኒ ካይ ኒጴ ካጝ ዎሹጝ ሻምባ ኒጵ።

19 ኬኦጉዩ ክየም ጊዬይ፣ "ኣኪ ሃኦኬና ኣዬ እያይንያጝ፣ ሃናንዳካ ባሪዮ ኖኪዬ ኡዋው ሌይ ኣይ ጋኑጝ? ናንዳካኦ ሃኒን ካቻሊ ክያጃ ኔኒ ሪቤኑጝ?" ካካዋይሼ ኣን እያይ። 20 ኣይባዬ እን ይጝካ ዋይሼ ባሪዮ ቃቦጝ እን የኣይ ኒን? "ውር እን ኣሽክዬን ዋድማጝ ዋድማ እን ኣሽክዮጝ ዋይሼባይ እሺ፦ 'ሃናንዳካኦ የኣሽኪዬ ኣን እያጙጝ?'" 21 ውር እን ኣሽክዬን ጁውጝ፣ ኬኦካ ሲሮ እን ኣሽኪኖጝ፣ ጂ ዶክ ካሻሜካ ጎቢንታጝ፣ ፕር ዶክ ካኣሽክዬካ ዋድማ ጊታይ ኣይ ማም እያይኑጝ ኣኔኬኒ መብት?

22 ባሪዮ ሺጝ ማኒቲ ኔኒ ዹዋሊሺኔኔ፣ ዎሽ ቁዋቅቲ ኔኒዻ ሜይሺኔኔ ኦጊታይካ ዹዋሊሺንቴ ማኒት ኔኑጝ፣ ኤ ዶንሺሼያ ጊታይ ሼኪሼ ካዮዻ ካልሎንያጝካ! 23 ሌምሼ ናንዳካ ጊታይ ሼክሼ ጎቢንታጝ፣ ጊታይ ኣይካ ዹዋሊሺኔንካ ዻዹጝኔን ኔኑጝ፣ ካጊባጄ ጎቢንታ ኔኑጝ ኤ ሻማ እንያጝካ? 24 ጊታይ ሺዎጝ ማርኬ ኦካ ውርካ አይሁድጵኔኔ ማርኬ ኦካ ኡዋው ጊታጝ ኣይኬ ኦካ ቶርሲዻ ክየምጵኔኔኒ? 25 ኬሆሴእ ኬእያይ ሺጜ እያጙጝ፦
"ጊታይ ማር ዛርሲ ናኒ ኣዬኑጝ፣ ሃዋይሼ እንግን፦ 'ዛርሲ ናኒዬ ሃሺዊባ"፤
ሃዋይሼ ጊታይ ማሬ ናሺዬንዻ፦ 'ጊታጝ ናሺዬዬ' ሃሺዊባ።
26 ፕርዻ ጊታይ ዋይሼ፦ "'ማር ዛርሲ ናኒዬኔ'፤
ሜይሼ እንግን ኦይኑጝ፣
'ዋይሼ እንግን ሃንታካ ባሪዮ እን ኣይካ ቦንካ ቦኔ ሺውባ።"
27 ኢሳይያስዻ ናንዳካ ውርካ እስራኤል ሺጝ እያጜ ኡቹኳ፦
"ጁዋኒቲካ ሃንታካ ውርካ እስራኤል ኣይኒን ኬይያጪካ ኛፓሱጝ፣
ዻቃ ዶክ ጊዬይ ጲን።
28 ናንዳካኦ ታቺ እን ብቶ ታክዬን ኔኒ ሻምባ ፔን ክያኒዬ፣
ኦካ ኦጊታይ ሙኔዬ ኬሹ እንካ ቱንሲዬ።"
29 ይንዻ ሃኬ ሃኬ እያይ ኢሳይያስ ኬሌሜን ሺጜ እያጜ ሃሳዎጝ፦
"ታቺ እንካ ፓፃኗን፣ ዋንቲ እባ ማራ ኡዋው ጴንታ ሺእሺሼንያጝ፣
ዋቲ ማቲያ ኬእያባካ ሶዶም፤
ዋንቲ ሙኒሼና ኡዋው ኬእያይካ ገሞራዻ።"
30 ኣኪ ካሺጚ ኦ? ጫንቃል ጌዬን እን ጌዬኬ እምናቱጝ፣ ጌያ ቶርሲ ጊታይ ማር ኦይን ኣይ ጫንቃል ዻቺሼኑጝ፤ 31 ኣይባዬ ውርካ እስራኤል ጊታይ ዻዬ ጆሌ ህጉጝ ካኒ ጌይኬን። 32 ይን ኣይ እያን እያይ? ማርኬ እምናት ሃናንዳካጝ ሻሜኬ ኦኮኑጝ ኣዬኬ ዋድማዬ ዻዮጝ፤ "እንግንዻ ካቲሜና ኬባይ እንካ ካቲንሲያ ጆል ውሩጝ።" 33 ይንዻ ሃኬ እያይ ሺጜ እያጜ ቶኮጝ፦
"እየዎ፣ ውር ካቲምንቴባዬ ባይ እን ሻሜ ጆሉጝ፣
ካቡድባዬ ላይታ እን ሻሜ ጆሉጝ፣
ሃኣጁጚባ ፅዮን፤ ጊታይ ኣምኒኬ እሺዻ ቦክንዺኬን።"