\c 1 10

1 ጪኒጌን ናኒ ዮ፣ ናንዳካ ውርካ እስራኤል ኣርግማካ ሸን ናኒ፣ ሃይሁኔ ባሪዮጝ ካባይሽባዬ ጊያ። 2 ቦዊኔ ጆሌ ባሪዮጝ ሃቻሊባ ናንዳካ እንግን ማኚሺዬን፤ ዬ ቦዊንታ እን ጊዬዩጝ ማርኬ ኦካ ኦኬ እባጄኔን። 3 ናንዳካጝ ማሬ ጫንቃል ጌዬን እን ኩንኬ ሃምካ ባሪዮዬ ናንዳካጝ ዎሼ ጫንቃል ጌዬን ጊዬይ ኣሽክዬኑጝ፣ ካኒ ማቲኬንካ ጫንቃልካ ባሪዮ። 4 ናንዳ ጊታይ ኣምኒ ፓይላ ካማቲሼ እን ጫንቃሉጝ ክርስቶስ ሃቱንሲካ ህጊ።

5 ሙሴ ክያጅ ጫንቃል ጌዬን እን ጌዬኬ ታካ ህጊያጝ ሺጝ እያጝ፦ "ውር እን ሻሚ ኦጊታጙጝ ኡፕፓ ኬእንግን።" 6 ዬ እምናት እን ኣይኬ ጫንቃሉጝ ሺጝ እያጝ፦ "ኬሸን ኑኑ ኦይ ሃኒን ካኳትሼ እያጝካ ፖላ ዾዮኩጝ ሺጜን?"፤ እንካ ክርስቶስ ቦዊሲዬን፤ 7 "ወይ ኦይ ሃኒን ካጎብ ሃም ኣይ ቱሎጝ ሺጜን?" እና ሃካ ክርስቶስ ኬኣርሼን ክያኒ ቡሌን። 8 ኣይባዬ ሺጝ እያን? "ክያጃ ኔኒ ኣኔን ቋጩር ኑኑ ክያኒ፤ ኣኔን ቶግ ኑኑ ክያኒዬ ሸን ኑኑ ክያኒዬ፤" ክያጃካ እምናት እን ሃሜይሺና ጆልቴዻ ሃይእጝ፤ 9 የሺጚ፦ "የሱስ ሃታቺዬ" የማኚሺያ ኬቶግ ኑኑያጝ፣ የኣምኒያ እን ባሪዮዻ ቲኬ ኣርሼን ክያኒያጝ፣ የባይሽባ። 10 ኬጌዬ ጫንቃልዻጝ የኣምኒኬ ሸን ኑኑዬ ጊያ፤ ኬባይሼዻጝ የማኚሺኬ ቶግ ኑኑዬ ጊያ። 11 ኬእያይ ወርቀት ክያጆጝ፦ "ጊታይ ኣምኒኬ እሺ ፓይላ ቦኩንዺኬን። 12 ኬኦካ ጫቃንካ ውርካ አይሁዴ ካቶርሲዬ ኣኔኬን ፓሺሞ፤ ናንዳካኦ ታቺ ክየም እን ሃታቺካ ውር ፓይላ፤ ኡዋንባ ጊታይ ይዌንዻ ካልሎን ጁዋንቲሺሼ፤ 13 "ውር ጊታይ ሺዊ ሮጝ ታቺ እን ፓይላ ባይሽባ።

14 ኣኪ ሻም እያን ካሺዌ ጊታይ ማርኬ እሺ ኣምኒዬኑጝ? ማር ክያጃ ኔኒ ዋዬኔ ሻም እያን ካኣምኒዮጝ? ውር ኬናካ ሜይሼ ኣኔኬኔ ሻም እያን ካቻሊዬ ዋዬኑጝ? 15 ኤማራ እንግን ይእሲዬንያጝ ቻሊባይ ክያጃ ሜይሺኔን? ይንዻ፦ "ጃፓን ጊታይ ቦፓይኔ ክያጃ ሹቃጝ ኣይ እያን ሹቃዬ!" ቶኮጝ።

16 ኣይባዬ ውር ጊታይ ዋይ ፓይላ ካኒ ናሺኬን ክያጃ ሹቃ እእጝ፤ ኢሳይያስዻ ሺጛ እያጝ፦ "ታቹጝ ዮ፣ ሃኒን ኣምኒ ሜርሜራን ጉዋዩጝ?" 17 ኣኪ ካጌዬ እምነቱጝ ሃኬ ሜርሜር እን ዋዬን፤ ሜርሜር እንዻ ሃኬ ኦካ ክያጃካ ክርስቶስ። 18 ኣይባዬ ዾር ዋያይ? ሃሺጚ እያይኔ ሃኣንሼንባ፤ ኬኣኩሉክ ዋያ፤
"ናቅዲ ጊዬይዻ ኬኦካ ፔን ፓይላ፣
ክያጃ ጊዬይዻ ዋዬና ሌይ ሃም ፔን ዶክዮጝ።"
19 ፕር እንቃ ሃኣኝሼምባ፤ ውርካ ኤስራኤል ዾር ጶቅሲያይ? እባ ኬሌሜን ሙሴ ሺጝ እያጝ፦
"ሃቦዊሲ እንግን ኦካ ውር ጊታይ ማር ዛርሲ ኣዬን፤
ሃማኒሺሼ እንግንባ ኦካ ዛርሲ ጊታይ ማር ኦኬ ጶቅሲዬን"
20 ኢሳይያስዻ ናሹጜ ሺጛ እያጝ፦
"ካማር ኣን ዎሼኔ ሃጌዬንያ ኦጊዬይ፤
ካማር ኣን ኣኝሺኔኔ ሃጌዬንያ ኦጊዬይ ኣምጵን።"
21 ዬ ናንዳካ ውርካ እስራኤል ሺጝ እያጝ፦
"ሃምካ ዛርሲ ጊታይ ማር ኤርጎ ቦዌኔ ጊታይ ማር ኦኬ ናሺዬኔ፣
ቲትባ ሹሽ ይን ፓሲ ቡዋ ናኒ።"