\c 1 11

1 ኣኪ ባሪዮ ኦይዳይ ዛርሲ ኔኒ? ሃሺጊ እያይኔ ሃኣኝሼምባ፣ ክየምጵንዻ! ኣይኒን ኣንዻ ሃኣይ ኬና ኣይኬ ኦካ ኩቱምካ ብንያሜ፣ ኣይ ቢዛካ አብራሃሜ ኣይ ውርካ እስራኤል። 2 ባሪዮ ካኒ ኦይድኬን ዛርሲ ጊታባ እባጄኬ ሌሜኑጝ። ኤልያስ ካሲሲዬ ዛርሲካ እስራኤል እያን ኦካ ባሪዮጝ፣ ወርቀት ናንዳካ እሺ ሺጌ እያኑጝ የእባጃኬኒ? 3 "ታቹጝ ዮ፣ ኒሻ ውርካ ቶግ ኑኑ፤ ላሊያ መሰዊያ ጊዬይዻ፤ ኣንዻ ሃሺዽያ ኣምጵን፤ ዎሻ ኣንዻ ኒሼን።" 4 ዬ ቃቦ እን ባሪዮ ዋሾጝ ሃኬና ኣይ እያን? "ውር ጊታይ ማር በኣል ይሁኔኑጝ ሃሺእሺሼያ ኣን ኤቴኒ ውር ሺ ꬆጳ።

5 ኬሹ እንካ ጋንዻ ውር ጊታኬና ጊድዬ እያይ ኬኣይኔን ጋኔባ። 6 ኣኪ ኣያ ኬኣይኔንያጝ ማርኬ ዋድማዬን፤ ዋንቲ ኣያ ኬዋድማያጝ ኣይኔን፣ ኣይኔን ኣዬን ኔኒ ዋቲ ሺዽያ።

7 ኣኪ ሃኦ? ኦይን ውርካ እስራኤል ዎሼ ካልሎኑጝ ካኒ ጌይኬን፤ ዬ ውራን ጊታይ ጊድዬ ጌያ፤ ውራን ጊታይ ሺዺዻ ሸን ጊዬይ ሹሙሜና፤ 8 ኬእያይ ሺጜ እያጜ ቶኮጝ፦
"ካርቧን ጊዬይ ካማር ጌዬኔ፣
ናቧን ጊዬይዻ ካማር ዋዬኔ፣
ሌይ ሃም ኣይ ሹ እንካ ሹጙጝ ባሪዮ፣
ኣያ እንግን መንፐስካ ዻቾእያይ ሺጜ እያጜ ቶኮጝ፤ ካርቡ ጊዬይ ካማር ጌዬ።"
9 ዳዊትዻ ሺጛ እያጝ፦
"ኦካ ቆቤ ኣምኒን ጊዬይ ኦኬናካ ጎምንቴዬ ካህዬ፣
ካኣይሼ እንግንባ ኦኬ ጋራዬ ቅጣቴ።
10 ካርቧን ጊዬይ ካማር ጌዬኔ ካሹፕፓ፤
እሊኮ ጊዬይዻ ኬቦንካ ቦን ካኣይባ ኦምጵ።"
11 ሌይ ሃምካ ዋካ ማሬ ባይሼኑጝ ካቲሜናይ? ሃሺጚ እያይኔ ሃኣኝሼምባ ፕር እንቃ፤ ክየምጵንዻ፤ ሳጊዻ ሺጝ ናንዳካ ውርካ እስራኤል ቦዊሲዬኔ ኬናንዳካ ሴሶ ኣሽክዬን ጊዬይ ባይሼን ኩንሼያ ቶርሲ። 12 ኣይባዬ ሴሶ ኣሽክዬን ጊዬይ ሃኦኬናካ ኣይሼ ፔን ኡዋኒኔንያጝ፣ ቡዴን ጊዬይዻ ሃኦኬና ኣይሼ ቶርሲ ኡዋኒኔንያጝ፣ ቋቄን ጊዬይ ካ ቦኩኔ እያን ኡዋኒኔን ታቺ?

13 ቶርሲ ዮ፣ ሃሜይሼባ እየው፤ ኬእያይ ሃኣይ ውር እን ይእሲሼ እያጝካ ቶርሱጝ ሃሹዋጵባ ዋድማ ናኒ ኬቁዋቅቲ፤ 14 ይንዻ ውራን ጊታይ ኣይ ናኑጝ ኬቦዊዮጝ ሃቲትሺዬ ሃናንዳካጝ ሃቢዬ ኬኦጊዬይ ጩዋማን ጊዬይ ባይሺሼኑጝ። 15 እንግን ኦይዴን ሃኦኬና ማቲሼ ፔን ቃሺምኔንያጝ፣ ናሺዬን ጊዬይጵን ሃኬ ኦካ ኣርሼን ናሹጜን ኬእያይ ሺጜን እንቃ ቻሊ ኦ ማቲዬን? 16 እን ማቲ ቶይዲዬ ኩኑጝ ቶኦ እንካ ቡሆ ሃኦኬና ኣዬ ዋናያጝ፣ ፕር ቡሆዻ ሃኬና ኣይ ዋና፤ ጊሜይ ኔኒ ሃኦኬና ኣዬ ዋናያጝ፣ ኣንታን ኔኒዻ ሃጊታኬና ኣይ ዋና።

17 ኬኦካ ጩዎኗን ክየም ክየም ጊዬይ ጩጩኬንያጝ፣ እንዻ የኣይባ ወይራካ ዳራኔ የኣኔባዬ የሁሉኪ ኦካ ጫቃንካ ዶኬ የላጭሜኔ ሃኦኬና የኣዬ ኬናካ ካሺሚንቴ ዋቃቲ እንካ ጌዬኬ ኦካ ወይራ ዱቡያጝ፣ 18 ኦይኬ ጩዎናን ጊታይ ቃይዬን። ዬ የቃይያጝ ጶቅሲባ፤ እን የናሪኬን ጊሜይ ኔኒ፤ ዬ ጊሜይ ኔኒ ናር እምባ። 19 ኣኪ ካካሺጝ፦ "ጩዎናን ጩጩኪኖጝ ካዋ ኦጝ ኣን ሃሁሉኮጝ።" 20 ሃሊኪ፤ እን እንግን ጩጩኪኖጝ ሃናንዳካጝ ማሬ ኣምኒዬኑጝ፤ እንዻ የዾሪያ ኬእምናት፤ ሪጊሺንቴባ ዬ ኦይ ውርካ ጵራጵራ ማቲዬ። 21 ናንዳካኦ ባሪዮ ማራ ጩዎናን ጊታይ ሙኔ ዻዹጝኔንያጝ፣ ዻዹጝኔኬን እንዻ።

22 ኣኪ ይንዳ ቶይባ ሹቃቲካ ባሪዮዬ ኦኬ ኣሽክዬን ኔኒዬ፤ ኦኬ ኣሽክዬን ኔኒዻ ሃኦካ ውር ጊታይ ቡዱጝ፤ ዬ ሹቃ ኣዬን ኔኒ ሌይ ሃምኬ ኣኒኔ ሹቃቲ ኔኒ ክያኑጝ ሃናንዳካ እን፤ ወይ ማራ እያይ ኣዬንያጝ ቃጭባ እንዻ። 23 እንግንዻ ናንዳካ እን ማሬ ኣምኒዬኑጝ ቁዋቅትሼ ማራ ቆቤንያጝ፣ ዋኬ ሻውባ፤ ናንዳካኦ ባሪዮ ቻሊባ እንግን ዋሼ ዾቅሼን። 24 እን እጝ ቃጬኬ ኦካ ሻሪካ ወይራ እንካ ዳራኔ የኣይያ ኬና ሁሊኪ ሃምካ ወይራ ሹቃባ ማሬ እን ሙኔንያጝ፣ ጊታይ ኣይ ጩዎኑካ ኦባ ሙኔ እንግኑጝ እን እንግን ሻዌ ሃምካ ሻሪካ ወይራ ጊዬዩጝ ካኣይ እያን? 25 ጪኒጌን ናኒ ዮ፣ ኦይዲ ኬኦኮኑጝ የኣይቴ ውርካ ሸን ዋሽቴን፤ ኬማርቴ ክያጃጝካ ራሼን እባጄኔ ኬሺዽቶጝ ሃዎሽኬን፤ ሌይ ሃም ቋቋንካ ቶርሲ ካሄክሾጝ፣ ውርካ እስራኤል እዲ ጋጜ ቁጵቁጴ ካኒ ናሺኬን። 26 ዬ ውርካ እስራኤል ፓይላ ባይሽባ፤ ኬእያይ ሺጜ እያጜ ቶኮጝ፦
"እንካ ባይሺሺንቶጝ ቱልባ ኬፅዮን፤
ቡልባ ኬኦካ ያይቆብ ክያጃ ጋራ።
27 ካቡልሼ እንግን ሴሶ ጊዬይዻጝ፣
ክያጃ ሃሊ እን ናኒ ሃቱምዬ ኬእንግን ሃይእጝ።"

28 ኬክያጃ ሹቃ ሺጝ ናንዳካ እየውያጝ ጋይ ጋል፤ ዬ ኣያ ኬካ እድኔንያጝ፣ ሺጝ ናንዳካ ሹቡጌን ጉዋዩዬ ጋይ ጊታኬና ናሺዬ፤ 29 ኣይኔንካ ባሪዮዬ ሺውኔኔ ኣኔኬን እን ኤምኑ ዻብሺዬን። 30 እባ ኬሌሜን እየውዻ ኬእያይ የማርቴ ጊታኬና ማር ባሪዮ ዋይሺሺኔኑጝ፣ ኬእን እንግን ማሬ ዋይሺሺኔኑጝ ጋን ኬእያይ ዻዹጝኔን ካጌዬ እንግኑጝ ፓይላ፣ 31 ኬእን ባሪዮ ዻዹጝኔ እየውጝ፣ እንግንዻ ካጌዬ ዻዹጝኔንካ ባሪዮጝ ጋን ማቲያ ሃንታ ጊታኬና ማር ዋይሺሺኔን፤ 32 ባሪዮ ካዹዋልሼ ውር ፓይላ ሹቃቱጝ ሃጌያ ውር ፓይላ ኬእን ማሬ ዋይሺሺኔን። 33 ባሪዮ ኣይ እያን ቱሌካ ፓካልማሞዬ ኦኬ ካልሎን እባጄኔ!
ቶይኬን ብቶ ታክዬን ኔኒ ሹቃ፤
ውር ኬናካ ዎሽ ጉዋር ኔኒዻ ኣኔኬን፤
34 "ሃኒን እባጅ ሸንካ ታቺ እኑጝ?
ውር እን ሃሳውኔ ጆልኬ እሹዻ ሃኒን?"
35 "ባሪዮ ካዋሻ ኣዬ እሹጝ፣
ክየምጵንዻ ሃኒን ብድርሲሲ ባሪዮጝ?"
36 ናንዳካኦ ኦኬ ፓይላ ሃኬ ሃም ኔኑጝ፣ ሃኬ እሺ፣ ሃኔኒ፤
ቦንካ ቦን ጎቢንታ ካኣይ ኔኒ፤ አሜን።