\c 1 12

1 ኣኪ ጪኒጌን ናኒ ዮ፣ ሩዋ ጉዩ ካኣዬ ኬና ኣይ ዋናዬ ካኣዬ ኬና ዋዝንሲ ባሪዮጝ ኬሻምቴ ኦካ ቡሌን ኬና ኣይ ጫንቃሌ ኬቡልቶጝ ሃይዌንያ እየው ኬናሺማካ ባሪዮ፤ ሃይያሪካ ባሪዮ ባጜን እን ጉዩ ኬሻምቴ ውር ጊታኮጝ ኣኔ ቃቦጝ። 2 ክያጃካ ባሪዮ እን ኣይ ሹቃዬ፣ ካዋዝንሲዬ ኣይ ካልሎኑጝ ኣዬ ኦውጝ ኬዋሺቴ እባጅቶጝ ላውፅሜንባ ኬሹቦ ጉዩ ሃሊ ሻሜን ዬ ኦይዲ ፔኑጝ ሙኒንቴን።

3 ኬእምናት እን ባሪዮ ኣዬ እየው ክየም ክየሙጝ ቶይባ እየው ኤታጋን ሹቃ ዬ፣ ኬኦይን የኣይቴ ሳጊ ኦይዲ እየው ኤታንጋ ዼግዼጝ ሻምቴ ቃቢዬኑጝ ኬኣይኔን እን ጋዬ ኣኑጝ ሃኪሊባ እየው ክየም ክየም። 4 ኡዋው ክየም ክየም ኬኦካ ሩዋ ክየም እን ጉዋዩጝ ኬእያይ ኣኔ ሩዋ ጁዋኑጝ፣ ኬእያይዻ ሩዋዋን ጊታይ ኬእያይ ማሬ ዋድማ ሃይነቲ ክየም ኣኔኑጝ ፓይላ፣ 5 ኬእያይዻ ኡዋው ሃኣያ ጁዋኑያጝ ኬክርስቶስ ሃኣያ ሩዋ ክየም። ኡዋው ክየም ክየም ሃኣያ ሩዋካ ውር እን ኣይ እንቃጝ። 6 ኬእያይ ጋዬ ኡዋው ኣይኔኑጝ ሃኣንቴ ኣይኔን ዋና ዋና፤ ኣይኔን እን ጋዬ ውር ክየሙጝ ሃኦኬና ኣዬ ሃሳዋ ሃሳዌንያጝ፣ ካሃሳውባ ኬእያይካ እምናት ኔኑጝ። 7 ሃኦኬና ኣዬካ ዋድማያጝ ካዋድምንቴባ፤ ሃኦኬና ኣዬካ እርርሲኔንያጝ ካእርርሲህንቴባ፤ 8 ሃኦኬና ኣዬካ ኪሊማያጝ ካኪሊህንቴባ፤ ሃኦኬና ኣዬካ ውር እንቃ ኦኬ ኣዬንያጝ ካኣይባ ኦኬ ጁዋኑ፤ ሃኦኬና ኣዬካ ውር እያኒሼ ጆሌንያጝ ካእያኒሻ ጆሌባ ኬቁዋቅቲ፤ ሃኦኬና ኣዬካ ዻዹጝኔንዻያጝ ካዻዹጝኔባ ኬዋዛ። 9 ናሺማ ጉዩ ካማርኬ ሳካፓሞ ኣዬን፤ ሚንቴባ ኦጊታይ ኣይ ጋራ ፓይላ፤ ኣይባ ኬኦይን ኣይ ሹቃዻ። 10 ጋጝ ኬጪኒጌንካ ጋጝ ናሺዬን ናሺባ ጋጝ ካልሎን፤ ክየም ካሻም ኑዋ ኬኦካ እሺ ኤምኑ ሳጊዬ ጎቢባ ጋጝ። 11 ኬታቺ እን ዋድምሼኔን ቁዋቅትሽባ ኬመንፐስ ዬ ኬኦካ ቁዋቅትሼን ይጝ ኦይዲ ሁር ዋክቴን። 12 ኬኦኬ ቃቤን ኣይባ ጊታኬና ቆብኬ ዋዛ፤ ዶንሺባ ጋሎ፤ ቁዋቅትሼ ጎርባ ኬይሁኔን። 13 ናንዳካ ውርካ ይሁኔን ጊታይካ ጋሎጝ ካሺቴ እንግንባ ኦጊታይ ጉዩ ኣኖጝ፤ ቾቺንሺባ ኳማና።

14 ኡዋኒባ ውር ጊታይ ዋኬ ጆሌ እየው፤ ኡዋኒ እንግንባ ዬ ኦይዲ እንግን ኣሺቴን። 15 ውር ጊታይ ቆብኬ ዋዛጝ ዋዝንዺባ ኬጋጝ፤ ውር ጊታይ ቆብኬ ሞይካዾዻ ሞይካዺባ ኬጋጝ። 16 ዋይሼን ጋጜ ቆቢባ ኬጋጝ። ውር ጊታይ ኣኔን ጋሎ ክያኑጝ ናሺባ እን ኬኣይቴ ጋጙጝ ዬ ኦይዲ እየው ኤታጋን ዼጝ ዼጝ ሻምቴን፤ ኦይዲ ቃይንቴንዻ።

17 ውር ክየምጵንዻ ኣሽኪሼያ እየው ኦኬ ጋራያጝ ኦይዲ እሺ ኦኬ ጋራ ኣሽኪቴን፤ ኦካ ሌሜንካ ውር ፓይላ ቁዋቅትሽባ ኬኦይን ኣይ ሹቃ ኣሽክዬን። 18 ሃኦኬና የቻሊቴያጝ ቆቢባ ኬውር ፓይላ ኬሹቃ። 19 ናሺዻን ናኒ ዮ፣ ኣይባ ባሪዮ ማኒት ዬ ኦይዲ ባጃ ቡልቴን ታቺ እን ሺጝ፦ "ባጃ ቡሌን ሃናኒ፤ ኣን ሃዋሽባ ቢድራን ጊታይ ቦዎዬ" ቶኳ። 20 ሳጊካ፦
"ካሽ ቃዋ ጋል ኑኑያጝ ኣምሽባ ምሽ፤
ኮርጉ ቃዋ እሺዻያጝ ማቲሽባ ሙዋ።
ኬእያይ ሻሜን ኑኑ የፑኡሺሼባ እሺ ቅልቃጩምካ ጉ።"
21 ባሺባ ኦይን ኣይ ጋራ ኬኦካ ሹቃ ዬ ኦይኬ ኦኬ ጋራ ባሺዬን።