\c 1 13
1
ውር ክየምጵንዻ ካኣዬኬ ኦካ ውራን ጊታይ ጌጳሲዬ ዱቡጝ ኣኔባ፤ ናንዳካኦ ማራ ኬታጝካ ባሪዮ ኣዬንያጝ ጌጳሞ ኣኔኬን፤ ውራን ጊታይ ጌጳሲዬ ኣኔዻ ሃጊታኬና ጌጳሲዬ ኬባሪዮ።
2
ዬ፣ ውር እን ኣሽኪሼ ውር ጊታይ ጌጳሲዬ ዎንጄሉጝ ሃኦካ ዳምቢካ ባሪዮ ዎንጄን ኣሽክዬን ኔኒ፤ ውራን ጊታይ ኣሽክዬን እያይዻ ቦሼባ እንግን ኤታን ብቶ ታክዬን።
3
ቢታን ሃናንዳካ ውር ጊታይ ኣሽክዬን ኦኬ ጋራጝ ዬ ማር ጊታኬናካ ሪጊሺሽ ውራን ጊታይ ኣሽክዬን ኦኬ ሹቃዬን። የዎሽያይ እን ኬማሬ ውራን ጊታይ ጌጳሺዬ ሪጊሺኔኑጝ? ኣኪ ኣሽኪ ኦጊታይ ኣይ ሹቃ ሹቃጝ፤ እሺዻ ጎሺ እምባ፤
4
እሺ ካኣሽኪሼ እን ኦኬ ሹቃጝ ሃውርካ ዋድማካ ባሪዮ። ኣይባዬ የኣሽኪያ ኦኬ ጋራጝ ሪጊሺንቴባ፤ ናንዳካኦ ካኒ ቁሜንኬን ኤቤል ኔኒ ማም እያይ፤ ውር እን ኣሽክዬ ኦኬ ቀጥዬን ኦይን ኣይካ ማኒቱጝ፣ ሃውርካ ዋድማካ ባሪዮ።
5
ዬ ማርኬ ቅጣትጵን ሪግሺኔኔ፣ ሺጝ ናንዳካ ሹቦዬ ኬኦካ ውር ጊታይ ጌጳሲዬ ዱቡ ኣዬን ኣኔባ።
6
ፕር የካሺዬ ጆልቴ ሃናንዳካ እእጝ፤ ውራን ጊታይ ጌጳሲዮጝ፣ ሃውርካ ዋድማካ ባሪዮ ጊታኬና ኣሽኪጆል ኦጊታይ ኣይ እያይ፤
7
ኣሽኪቴባ እንግን ክየም ክየም ኦጊታይ ዎሺሽ እንግኑጝ፤ ሃጊቢሪ ቡሌንዻያጝ ቡሊቴ እንግንባ ጊቢሪ፣ ሃጊቢሪዻያጝ ኣይባ እንግን ጊቢሪ፣ ካጝ ካሪጊሺኔዻ ሪጊሼንባ፣ ካጝካ ጊቢዬዻ ጎቢባ።
8
ኬኦካ ጋጝ ናሺዬን ጉዩ እንቃ ባጃ ክየምጵንዻ ካማር ኦጉዩ ኣኔን፤ ናንዳካኦ ውር እን ናሺ ባይዳ ኔኑጝ ኣሽክያ ህጊ።
9
ህጊ ጊታይ ሺጚ፦ "ኦይ ኩጳሞ ኣሽክዬን"፣ "ኦይ ውር ኒሼኑጝ"፣ "ኦይ ኦጉርኔኑጝ"፣ "ኦይ ኣርግንዽዬኔ" ኤርጎ ዶክዻ ኣኒኒኑጝ፣ እን ሺጚ፦ "ናሺባ ባይዳ ኑኑ ኬእን ኤምኑጝ" ዎሲሼያ ሃምካ ህጊ ክየም እኑጝ።
10
ውር እን ኣኔ ናሺማ ኣሽኪሼኬን ውርካ ጉል ኔኒ ኦኬ ጋራ፤ ዬ ናሺማ ሃኦኬናካ ሹዋጵሺሼ ህጊ።
11
ኬቦናን ጶቅሲዬን ኣሽኪባ ኦጊታጝ፤ ሹ እን ኬጬይንቴ ኬሩዋቱክ ክያኑጝ ሃጋን፤ ዻቆ ጉዋዩ ኬኦካ ባ ኣምኒቴ ሳጊ ጋን ዲያውትሻ ኦጉዋዩ።
12
ምክርዻ ካሳግዮጝ፤ ሹሽዻ ሺጝካ ካርሲዬን። ዬ ካፓቅ ክያጃካ ምክሬ ካኪም ኣንቲቲካ ፓርካ ኤሜሌል።
13
ኬእያይ ሃጃላ ጆልቴ ኬሹሹጝ ካጃጆልባ ኬሊኪ። ካማር ይያሪ ባጝኔ ጮዩዬ ኣዬን፤ ካማርኬ ኩጳሞ ኣሽክዬኔ ዱኪ ኬሞዬ ኣዬን፤ ካማርኬ ዜርማዬ ሚኒኔኔ ኣዬን።
14
ሳጊዻ ኪሚ የሱስ ክርስቶስ ታቺ እእጝ፤ ኣርግማ ኔኒዻ ካሙኒኖጝ ኦይዲ ቃቦካ ኣሩጝ ጉዩጝ ቃቢቴን።