\c 1 14

1 ውር እን ዻቺኬ እምናቱጝ፣ ኬኦካ ክያጃ ጊታይካ ዜርምሺሺ ውሩጝ ኬእን ኣዬ ዻቹጉጝ ኦይዲ እሺ ብቶ ታክሼኔ ሻምቴባ እሺ ሃሚን ጉዩጝ። 2 እምናትካ ውር ክየም እሺ ካኣሜ ኦኬ ፓይላጝ ናሺሼ እሺባ፤ ዬ ውር እንቃ እን ማርኬ እምናት ኔኒ ቁዋቅትሼኑጝ ኣሜ ጆል ዱኮጵን። 3 ኦይን ውር ክየምጵንዻ ኣሞጝ እን ማር ኣሜን ካማር ቦዊዬን፤ እን ማር ኣሜንዻ፣ ካማር ኣሚ ዻቢሺዬን፤ ናንዳካኦ ባሪዮ ባሪዮ ቦዋ። 4 እን እን ታክሼ ውር እንቃ እን ኣኔን ዋድማ ዋድምዬኑጝ እን የኣይ ኒን? እሺ ቡዳያጝ ወይ ዾራያጝ ሃካ ታቺ እን ኔኑጝ፤ ናንዳካጝ ታቺ እን ካቻሊዬ እሹ ሪቤኑጝ ዾርባ።

5 ውር ክየም ሻም ሹ ክየም ኬኦካ ኑዋ ላሻ ኬና ኣይ ዋናዬ ኳምባ፤ ፕር ኑዋ ቃቢሼ ሹዋን ፓይላ ኬኦኮኑጝ ኣዬ ሊኩጝ። እንግን ክየም ክየም ቱሚባ ክያጃ ጊዬይ። 6 ውር እን ሻሚ ሹ ክየም ኬኦካ ሹ ኑዋ ዋናዬ ቃቢ፣ ሻሜ እያይኑጝ ሺጝ ናንዳካ ታቺ እን ኔኒዬ ጊያ፤ እንካ ቃው ኣሩጝዻ ሺጝ ናንዳካ ታቺ እን ኔኒዬ ቃውባ፤ ናንዳካኦ ጎሺባ ባሪዮ። እን ማር ቃዌንዻ ሺጝ ናንዳካ ታቺ እን ኔኒዬ ቃውኬን፤ ጎሺባ ባሪዮዻ። 7 ናንዳካኦ ኬኦካ ጫቃን ጉዋዩ ውር ኬናካ ኡፑሼ እሺ ኤምኑዬ፣ ኬና ኣርሺሼ እሺ ኤምኑ ኣኔኬን። 8 ሃቆባዻያጝ ሃቆብቴ ታቺ እእጝ፤ ሃኣሻዻያጝ ሃኣርሺቴ ታቺ እእጝ፤ ዬ ሃቆባዻያጝ ሃኣርሻዻያጝ ሃኣያካ ታቺ እእጝ።

9 ናንዳካ እን፣ ካኣይ ታቺካ ውራን ጊታይ ኣርሺዬ ቆብኬ ካርቡዬ ክርስቶስ ኣርሻ፤ ናሹጛ ኬዻቆዻ። 10 ኣኪ እን ሃናንዳካኦ የታክሼ ጪን የብቶጝ? የቦዊ ናንዳካኦ ጪንዻ? ናንዳካኦ ኡዋው ፓይላ ሃጎራባ ኦካ ሌሜንካ ካራምካ ብቶ ታክዬንካ ባሪዮ፤ 11 ሺጝ እያጜ ቶኳ፦
"ታቺ እን ሺጝ፦ 'ኣን ሃኣይ ኬና ኣይካ ቦንካ ቦን'፤
'ኩዋሚን ፓይላ ኮምፓርሲሼ ኣምባ፤
ካት ፓይላ ማኚሺሼ ባሪዮ።"'
12 ዬ ኡዋው ክየም ክየም ናንዳካ ኡዋው ኤታጋን ሃኣያባ ባሪዮ ቃቦ።

13 ዬ ኡዋው ሃኣዬኬ ጋጜ፣ ክየም ኬኦካ እን ካታክሼ ኑዋ ብቶጝ ካዽያኒባ፤ ዬ ኬኦካ ባልካ ይን ኬማር ኦካ ጉዋርካ ጪን ባይ ኬናካ ካቲ እሺ ወይ ካህ ኣጁጜኔ ቃቢ ቃቦ ሹቃ። 14 ሃኣይኬ የሱስ ታቺ እኔ ዳኣኖ ክየምጵንዻ ማሬ እሺጵን ጫንቃል ኣዬኑጝ ሃእባጅያ፤ ኣይባዬ ውር ክየም ኮምሼያ ኦኬ ክየም ኬኦኮኑጝ ማሬ ጫንቃል ኣዬንያጝ፣ ዳቢ እን ኣይሼኬን እሺ ጫንቃል። 15 ሃኦኬና የዻዹጝኔ ዳኣኖ እን ጪን ኣሜያጝ፣ የካኔ ጃሌ ጆልኬን ኬናሺማ፤ ጪን እን ክርስቶስ ኣርሺሾጝ ኦይ ናንዳካ ክያጝ ካይሲዬን። 16 ኦይን የሺጜ ሹቃዬ የቃቢዮጝ ካሺጜ ጋራዬ ካዻቢሺዮጝ ኦይ ሻሜን። 17 መንግስትካ ባሪዮ ሃኬ ጫንቃል ኣዬኔ ሹቃ ኣዬኔ፣ ሃኬ ዋዛ ኬና ኣይኬ መንፐስትካ ባሪዮ እን ኣይ ዋናጝ ዬ፣ ማርካ ክያጃካ ኣማዬ ማቲኔኔን፤ 18 ኬዳቡጝ ውር እን ዋድምሼን ክርስቶሱጝ ዋዝንሲባ ባሪዮ፤ ኬታጝካ ውርዻ ሃኬና ጎሺዬ።

19 ዬ ኦኬና ካጌዬ ኬሹቃ ቆቤኔ ኬናኬ ሌንሲቴ ጋጜ ካዎሺባ ኦኬ ፓይላ ኣሽክዬን። 20 የሺጚ ናንዳካ ዳኣኖዬ ኦይ ዋድማካ ባሪዮ ጊያምሼን። ኦኬ ፓይላ ጫንቃል፤ ኣይባዬ ኣማ እንካ ኣይሼ ውር እንቃ ካቲምኔኑጝ ማር ሊኪዬን። 21 ኣሩጝ እን ካኣይሼ ጪን ኦካ ካቲሚኔኑጝ ኦይ ኣሜን፤ ኦይ ዝኣካ ወይንዻ ማቴን፣ ወይ የማርያ ኦኬ ክየምጵንዻ ኣሽክዬንያጝ ሃሹቃ።

22 ኣኪ እምናት እን ኑኑ ኣኔ ናንዳካ ኦጊታጙጝ ኬኦካ ጫንቃን ኑኑዬ ካባሪዮዬ ካይባ ኬና ማንክዬ፤ ኬኦካ ኦይን ሺጜ ሃሊኪዬ ናሺዮጝ ውር እን ማር እሺ ኤምኑ ዻቢ ሻሜኑጝ ሃኬና ጉዋኔ። 23 ኣይባዬ ውር እን ቃጋዺ ኣማያጝ ናንዳካጝ ማሬኬ እምናት ኣዬኑጝ፣ ታክሼያ እሺ ብቶ፤ ናንዳካኦ ኦጊታይ ማሬኬ እምናት ሻሜን ፓይላ ሃሴሶ።