\c 1 15

1 ኡዋው ካኣይ ቁዋቃኑጝ፣ ካናር ክያጃካ ውር ጊታይ ኣይ ዻቹጉጝ ዬ ኡዋው ኤታጋን ዋዝንሲዬን ኣኔኬን። 2 ኡዋው ክየም ክየም ባይዳን ጉዋዩ ጫንቃል ሻሜን፣ ኬእሺዻ ጠቅምኔን ካኣሽኪቴ እሺ ኦኬናካ ዋዝንሲ ኡዋውጝ ሁሉኩሼ ኡዋባ፤

3 ናንዳካኦ ክርስቶስ ካኒ ዋዝንሲኬን እሺ ኤምኑ፤ ኣይባዬ ኬእያይ ሺጜ እያጜ ቶኮጝ ሙኒሼና እሺ፦ "ይሬን እን ይሬ እኑጝ ዬክሻ ኣን።" 4 ኬቁዋቅትሼኔ ሌምኔን እን ወርቀትካ ውር ጊታይካ ይሁኔን ኣይኔዬ ካኣንቴ ቃቦ ሹቃጝ፣ ኦጊታባ ቶኬኬ ሌሜን ፓይላ ቶኳ ናንዳካ እርርዬን ጉዋዩ።

5 ባሪዮ እንካ ኣይንቴ ቁዋቅትዬ ሌምኔኑጝ፣ የዻይቴያ የሱስ ክርስቶስያጝ፣ ኬኦካ ጫቃን ጉዩ ካኣይባ እየው መንፐስ እንኬ ኣይቴ ክየሙጝ፤ 6 ይንዻ ኣይኬ ሸን ክየሜ ቶግ ክየሜ፣ ኬጎቢቴ ባሪዮ ሹኔካ የሱስ ክርስቶስ ታቺ እን ጉዋዩዬ ጊያ።

7 ኣኪ ካኣይሼ ባሪዮ ጎሹጝ ኬእያይ ክርስቶስ ናሺዬ እየውጝ፣ እየውዻ ናሺ ጋጝባ። 8 ክያጃካ ቃቦ ሹቃ እን ጋዬ ሹቡጌን ጉዋዩጝ ካቁዋቅትሻ ኡፔ ሌዩጝ ሺጝ ናንዳካ ኣኩሉክ ኣዬንካ ባሪዮዬ ክርስቶስ ኣዬ ውርካ ዋድማካ አይሁዱጝ ሃሜይሼ እየውባ፤ 9 ፕርዻ ቶርሲ ካጎሺዬ ባሪዮ ናንዳካ ዻዹጝኔን ኔኒዬ ጊያ፤ ኬእያይ ሺጜ እያጜ ቶኮጝ፦
"ዬ ሃጎሺ እምባ ኦካ ጫቃንካ ቶርሲ፤
ሃኪዊሼባ ሮጝ ኑኑዻ ይያሪ።"
10 ፕርዻ ሺጝ፦
"ቶርሲ ዮ፣ ዋዝንዽባ ኬዛርሲ።"
11 ፕር እንቃዻ ሺጝ፦
"እየው ቶርሲ ፓይላ ጎሺባ ታቺ እእጝ፤
እየው ዛርሲ ፓይላ ሻምባ እሺ ዼግዼግ።"
12 ኢሳይያስዻ ሺጝ እያጝ፦
"እንካ ቢታዽሼ ዛርሲ ፓይላ፣
ቢዛካ እሴይ ኩምባ፤
ቶርሲዻ ቃብባ ኬእሺ።"

13 ኬእን የኣምኒቴ ኬእሹጝ ባሪዮ እንካ ቃቦ ሹቃጝ ካኣይ እየውባ ዋዛዬ ኬሹቃ ቆቤኔ ፓይላ፤ ይንዻ ኬቁዋቅትካ መንፐስካ ባሪዮ እን ኣይ ዋናጝ ካቁዋቁሻ እርሺንቴ እየውባዬ ጊያ። 14 ጪኒጌን ናኒ ዮ፣ እየው ጊታጝ ቋቁሼ እየው ኤታጋን ኬኦኬ ሹቃጝ፣ ኬእያይ የቋቅቴ ኬኦኬ እባጄን ፓይላዬ ኬኦጉዩ ውር ክየም ካቻሊዬ ውር እንቃ ኪሊዬኑጝ ኣይኒን ኣንዻ ሃእባጅያ። 15 ኬኣይኔንካ ባሪዮ እን ባሪዮ ኣዬ ኣኑጝ፣ ካሜይሼ እየው እንቃጝ ኬኦካ ክያጃ ክየም ክየም ሃቶኩሼ እየውጝ፣ 16 ኬክያጃ ሹቃ እንካ ባሪዮጝ ዋድማካ ውርካ ቃሽ፣ ሃእን ሃኣይሼ ቶርሲ ውርካ ዋድማካ የሱስ ክርስቶስ፤ ይንዻ ካሻም ቶርሲ ኬመንፐስካ ባሪዮ እን ኣይ ዋና ዋናዬ ኬታጝካ ባሪዮ ካማቲ ጋላ ኬናካ ናሺዬዬ ጊያ።

17 ዬ ናንዳካጝ ሃዋድምሺኔ ባሪዮጝ ሃቃይባ ኬየሱስ ክርስቶስ። 18 ኬኦካ ዳቢ እን ሃሃሳወዬ ሃኣሽክዬዬ ቶርሲ ካዋይሺኔ ባሪዮጝ፣ ክርስቶስ ኣኔን ኬኣኔ ኬኦካ ኦጊታይ ኣሽክዮጝ እንቃ ሃዎሽኬን ኦኬ እንቃ ሃሳዌን፤ 19 ይንዻ ኣዮጝ ሃኬ ቁዋቅትካ መንፐስካ ባሪዮ እን ኣይ ዋናጝ፣ ሃኬ ኦኬ ጊታባ ማሬ ኣሽክዬ እባጄኔ ጌዬ እባጄኔ። ኬዴንታ ኬና ኣይ እያይዻ ቦኬ የሩሳሌሜ ሌይ ሃም ኣይ ክራካ እልዋሪቆኑጝ ሃሜይሼንያ ክያጃ ሹቃካ ክርስቶስ። 20 ሃሺጚ ካማር ኦካ ቶኦ እን ውር እንቃ ካርሲዬ ኣሽክዬን ኣሽክዬኔ፣ ኦካ ራቅ ጊታይ ማሬ ክርስቶስ ሺዌኑጝ ካሜይሺኔ ክያጃ ሹቃጝ ሃፖሽካዽዬን ናኒ ካሹ ጮል። 21 ሳጊዻ ሃኬ እያይ ሺጜ እያጜ ቶኮጝ፦
"ውራን ጊታይ ሃማሬ እንግን ናንዳካ እሺ ሜይሼኑጝ ጌይባ፤
ጊታይ ማር ዋዬንዻ ጶቅሲባ።"
22 ኬክያጃ እንዻ ካማሬ ሃሚን ጉዩ ኩኔኑጝ ሃርጌያ ኣን ሹ ጁዋኑ። 23 ዬ ጋን ኦኬ ኬናካ ኣሽክዬ ኦካ ክራ ጊታጝ ናንዳካጝ ማሬ ኣኔኑጝ፣ ካርሲኬ ቦን ጁዋኑዬ ናንዳካጝ ሃፖሽካዽዬ እየው ኩዬ ቶዬኑጝ፣ 24 ቃቦ ይንዻ ኬሹካጝ ሃኩይሼ እያጝካ እስጳንያጝ ሃቃቢያ ሻሜን። ኬሹካግ ሃሲዬዻጝ ካካማ ቶዬ እየዌ ሃሹዋጵያ እየው ፖሽካዽዬን ናኒያጝ ጩዋ ኬኬልሺቴ ኣን ኬጃሌን ናኑጝ ቃቢባ። 25 ዬ ጋን ውርካ ይሁኔን ጊታይ ኣኔን ሃሚን ኩዬ ዋድምሺኔን ናኒ ሃኣኔን እያጝካ የሩሳሌም ኩይሼን። 26 ናንዳካኦ ውር ጊታይ ኣኔን መቄዲንያዬ አካይያዬ፣ ናሹጛ ውር ኩፓን ጊታይ ኣኔን ኦካ ጫቃንካ ውርካ ይሁኔን ጊታይ ኣኔን የሩሳሌም ኬልሺዬን። 27 ናሺያ እንግን እንግን ኬልሺዬን፤ ኬኣኩሉክ ጋይ ውርካ ባጃ ጊዬይ። ሃኦኬና ቶርሲ ካካሺምኔ ኬጋጝ ኬውርካ አይሁድ ኡዋኒኔንካ መንፐስያጝ፣ ኡዋኒኔን እንካ ዳሊ ጌዮጝ ካካሺምኔ ኬውርካ አይሁዱጝ ጋይ ውርካ ባጃ ጊዬይ። 28 ዬ ሹዋጵያ ዋድማጜ ሃእባጅያ እን ጌዬ ካርቡጝያጝ ጩዋ ሃኩይሼባ እያጝካ እስጳንያጝ፤ ሃኩይያ ኬጉዋርዻያጝ ሃቶይ እየውባ። 29 ሃኩንያ ሃሚን ጉዩዻያጝ፣ ካኩዋዌ ኬኡዋኒኔንካ ክርስቶሱጝ ሃእባጅያ።

30 ጪኒጌን ናኒ ዮ፣ ናንዳካ ኣን ኬይሁንቴ ባሪዮጝ ኬኣይቴኬ ኣን ኦካ ኒሺኔን ናኑጝ ኬየሱስ ክርስቶስ ታቺ እን ጉዋዩዬ ናሺማካ መንፐሴ ሃይዌንያ እየው። 31 ካዻቄ ኬኦካ ቡዋካ ውር ጊታይ ኣኔን ይሁዳዬ ማር ኣምኒዬኔ ኬዋድማ እን ናኒ ኣኔን የሩሳሌሙጝ ውርካ ይሁኔን ጊታይ ኣኔን ሃሚን ካናሺሼ ኣኑጝ ይሁሼን ኣምባ፤ 32 ይንዻ ኬቃቦካ ባሪዮ ካኩዌ ሃሚን ጉዩ ኬዋዛዬ ካኡፔኬ እየውዻዬ ጊያ። 33 ባሪዮ እን ካኡፑሽ ውር ኬሹቃጝ ካኣይኬ እየው ፓይላ፤ አሜን።