\c 1 16
1
ሃኤልቅምሼንያ እየው ጪኔ ጉዋዩ ፔቤን እን ኣይ ውርካ ዋድማካ ቶኦካ ይሁኔን እንካ ክንክራኦሱጝ።
2
ኬቾንሺኔን ሊኪ እን ኣይካ ውርካ ይሁኔኑጝ ኬቾቺንሺቴ እሺ ኬታቺ እኔ ኮልሾ ኬና ኣኔን እያንዻ ካጝ ዎሼኬ ኦጉዩጝ ካኣሽኪቴ እሹጝ ሃሜይሼ እየውባ፤ ናንዳካ ውር ጁዋኑዬ ኣንዻዬ ኣሽክያ ኬልሾ ጁዋኑ።
3
ኬየሱስ ክርስቶስ ውር ጊታይ ዋድምዬን ኬኣኑጝ ቦቴ ኣምባ ዎፖካ ጵርስቅላዬ ካአቂላዬ።
4
እንግንዻ ሺጝ ናንዳካ ኣኔ ጋያ ዻቆ ጊዬይ ኦኬ ጋራ፤ ማር ኣንጵኔኔ ውርካ ቶኦካ ይሁኔን ጊታይካ ቶርሲ ፓይላ ጎሺ እንግንባ።
5
ቦቴ ኣምባ ዎፖካ ውር ጊታይ ኣኔን ኦካ ቶኦካ ይሁኔን እን ኣኔን ኦጊዬዩጝ።
ቦቴ ኣምባ ዎፖካ ውርካ ናሺዻ ናኒ አጤኔጦን ባ ኬሌሜን ኬኦካ ፔንካ እስያ ዋክሼ ክርስቶሱጝ።
6
ቦቴ ኣምባ ዎፖካ ማርያ እን ሺጝ ናንዳካ እየዌ ዻቺኬ ኦኬ ጁዋኑጝ።
7
ቦቴ ኣምባ ዎፖካ ኤዳን ጊታባ ናኒ ቁሜኬ ኣን አንዲራኒቆኔ ዩልያኔ፤ እንግንዻ ኬኦካ ጫቃንካ ውራን ጊታይ ይእሲዮጝ ጋይ ጊታኬና ኣኔ ሮጝ ሹቃዬ ሌም ኣን ኬክርስቶስ ኣምኒዬኔ።
8
ቦቴ ኣምባ ዎፖካ ጵልያጦን እን ሃናሺዬ ኬታቺ እእጝ።
9
ቦቴ ኣምባ ዎፖካ ኢሩባኖኔ ስንጣክን እን ኣይ ውርካ ናሺዺ ናኒዬ ጊታይ ዋድምዬን ኬኣኑጝ።
10
ቦቴ ኣምባ ዎፖካ ኤጤሌን እን ታሜ እምናት እን ኔኒ ኣኔን ኬክርስቶሴ ጎሺዮጝ፤
ቦቴ ኣምባ ዎፖካ ውር ጊታይ ኣይካ ውርካ ጶሮክካ አርስጣባሉ።
11
ቦቴ ኣምባ ዎፖካ ኤዳ ናኒ ሄሮድዮና፤
ቦቴ ኣምባ ዎፖካ ውርካ ጶሮክካ ንርቀስ ጊታይ ኣይኬ ታቺ እእጝ።
12
ቦቴ ኣምባ ዎፖካ ሃኣጚ ጊታይ ኣይኬ ታቺ እኔ ዋድምዬን ኬቁዋቅቲ፣ ፕሮፒሞኔ ጢሮፒሞሳዬ።
ቦቴ ዎፖካ ጠርሲዳ እን ኣይኬ ታቺ እኔ ዻቺ ካልሎኔ፣ እን ናሺዬ ኬኦካ ሃኣጚ እንቃጝ።
13
ቦቴ ኣምባ ዎፖካ ሩፖና እን ታቺ እን እድዬ ካጁዋኔ እን ኣይሼ ኣንዻ ጁዋኖጝ።
14
ቦቴ ኣምባ ዎፖካ አስቀርጦኔ ካአፕለሶንጳዬ፣ ካሄሮሚኔ፣ ካጳጥሮባኔ፣ ካሄርማኔ፣ ካጪኒጌን ጊታይ ጊዬይ ጋዬኬ ጋጜ።
15
ቦቴ ኣምባ ዎፖካ ፕለጎኔ፣ ካዩልያኔ፣ ካኔርያኔዬ፣ ካጪኔ እን ኔኒካ እጛሼ፣ ፕርዻ ካአልጦኔ፣ ካውርካ ይሁኔን ጊታይ ጋዬኬ ጋጜ።
16
ጌሲ ጋጝባ ኬሹንቄን ኬና ኣይ ዋና። ውርካ ቶኦካ ይሁኔን ጊታይካ ክርስቶስ ፓይላ ቦዋ እየው ዎፖ።
17
ጪኒጌን ናኒ ዮ፣ ኬኣጅቴ ኬኦካ ኦጊታይ ቦፓይኔ ጆሌ ላሊምኔኔ ውር ጊታይ ሚኔ ጆሌ እርሮ እን የእርርቴዬ ኣጁጜ ጆል ኦካ ጉዋር እን ጉዩ የጃሌ ጆልቴ ኦካ ካቲምኔኑጝ ሃሜይሼ እየውባ፤ ፓይባ ኬኦጊዬይዻ ዹክ።
18
ውር ጊታይ ኣይኬ ጊታይ እያይኑጝ እን ዋድምሺኖጝ ማር የሱስ ክርስቶስ ታቺ እን ጉዋዩጵኔኔ፣ ሃካ ክያጝካ እንግን ኤታጋን፤ ኬካት እንግን ጊዬይ ሱዲኔ ጆል ውሬ ሾሮ ጊዬይዬ፣ ቱዋንባ ውራን ጊታይ ኣይ ሌሞጝ።
19
ዋያ ዋይሺኔን እን ጉዩ ፓይላ፤ ኬእንዻ ኣን ሃዋዝንዽያ ካልሎን። ኣይባዬ ኬኦይን ኣይ ሹቃጝ ኬኣይቴ ፓካላዬ፣ ኬኦይን ኣይ ጋራጝ ኬኣይቴ ሌሞጝ ሃዎሺያ።
20
ባሪዮ እን ካኡፑሺሽ ውር ኬሹቃጝ፣ ባጝሼ እጁጝ ይሪካ ኬኦካ ጃፕ ጉዩ ዱቡ።
ኣይኔንካ የሱስ ታቺ እን ጉዋዩጝ ካኣይኬ እየው።
21
ጢሞቴዎስ እን ዋድምዬን ኬኣኔ፣ ፕርዻ ውራን ጊታይ ኣይ ኤዳን ናኑጝ ሉቂዮሴ፣ ኢያሶኔ፣ ሱሲጴጥሮሴ ቦዋ እየው ዎፖ።
22
ኣን ጤርጥዮስ ይጝ ቶኩሼ እየው ሜርሜር ይኑጝ፣ ኬታቺ እን ሃቦያ ዎፖ ጉዩ።
23
ኬቾቺንሺኔን ኬና ኣይ ሹቃ እኔ ውር ጊታይ ኣኔን ኦካ ቶኦካ ይሁኔን እን ኣኔን ኦጜ ፓይላ ጋይዮ እን ዋዝንሲዬ ጆል ኡዋውጝ፣ ቦዋ እየው ዎፖ።
አርስጦስ እን ኣይ ታቺካ ቶኦካ ኣማካ ካታማጜ፣ ጪኔ ጉዋዩ ቁኣስጥሮሴ ቦዋ እየው ዎፖ።
24
ኣይኔንካ የሱስ ክርስቶስ ታቺ እን ጉዋዩጝ ካኣይኬ እየው ፓይላ፤ አሜን።
25--26
ኬኤርጎካ ባሪዮ እንካ ቦንካ ቦኑጝ ዛርሲ ፓይላ ካኣምኒዬዬ ዋይሺኖጝ፣ ጋን እን ዹዋልሺኔ ኬወርቀትካ ውርካ ቶካ ባሪዮዋኑጝ፣ ኬዹዋልሺኔንካ ኦካ ድኬን ባ ድኬኬ ቦን ጁዋኑ ጊታባ ሳጊውጝ፣ ኬክያጃ ሹቃ እን ጊርርሲዬዬ ኬክያጃ የሱስ ክርስቶስ ሜይሺኔኔ እንካ ቻሊ እየው ቁዋቅትሺሼኑጝ፣
27
ኬባሪዮ እን ኣይ እሺጵን ኣካላጝ፣ ኬታጝካ የሱስ ክርስቶሱጝ ኬቦንካ ቦን ጎቢንታ ካኣይሼ እሺባ፤ አሜን።