\c 1 8

1 ዬ ጋን እየው ጊታይ ኣዬኬ የሱስ ክርስቶሱጝ የኣንቴኬን ዻባሞ፤ 2 ናንዳካኦ ህጊካ መንፐስካ ዻቆ ኬየሱስ ክርስቶስ ኬኦካ ሴሶዬ ኬኦካ ህጊካ ኣርሼኔ ቡላ እየው አርና። 3 ኬህጊ ኬዴንታካ ኣሩጝ ዻቼ ኦይን ማሬ ኣሽክዬን ቻሊዬኑጝ፣ ባሪዮ ውዋ እን ኣይ ኔኑጝ ኬሄክንሶካ ውርካ ሴሶ፣ ካኣዬ ጋላካ ሴሶጝ ኬይእሲዬን ሻማ፤ ኬሴሶ እንዻ ኬዻባሞካ ኣሩጝ፤ 4 ይንዻ ማርኬ ኣሩጝ ኣዬኔ ኬኡዋው ጊታጝ ጃሌ ጆልኬ መንፐሱጝ፣ ጫንቃል ኣዬን እን ህጊ ኣኝሺኖጝ ካሹዋጲባ ፓይላዬ ጊያ።

5 ውር ጊታይ ቆብኬ ክያጃካ ኣሩጙጝ ሻምሼባ ሻን ጊታይ ኦካ ኦጊታይ ኣኡጝ ዎሾጝ።ኣሩጙጝ ሻምሼባ ሻን ጊዬይ ኦካ ኦጊታይ ኣሩጝ ዎሾጝ። 6 ኦጊታይ ኣሩጝ ቃቢዬን ሃኣርሼን፤ ዬ ኦጊታይ መንፐስ ቃቢዬን ሃዻቆዬ ኬሹቃ ቆቤኔ። 7 ሹቦ እን ሴሶ ኡዋሩጞጝ ሃውርካ ጓሬንካ ባሪዮ፤ ኣይሼኬን ህጊካ ባሪዮ፤ ቻሊኬን ኣዬንዻ። 8 ውር ጊታይ ቆብኬ ክያጃካ ኣሩጝዻ ቻሊኬን ባሪዮ ዋዝንሲዬን።

9 ዬ እየው፣ ሃኦኬና መንፈስካ ባሪዮ ኣኒኔ ኦጉዩ ቱዎጝያጝ፣ የማራካ ኣሩጝ ኣዬኔ የኣያካ መንፐስ። ውር ክየምጵንዻ መንፐስካ ክርስቶስ ማራ ኦኔኒ ኣኔንያጝ፣ እሺ ማርካ ክርስቶሴን። 10 ኣይባዬ ሃኦኬና ክርስቶስ ኣኔያ ኦጉዩ ቱዎጝያጝ፣ ሩዋ ጉዩ ኣይኒን እን ኣየኣሽኪዬ ጆልቴ ሴሶጝ ኣይኒን ኬና ኣይ ኣርሹጉጝ፣ ናንዳካጝ መንፐስ ጉዩ ኣዬ ጫንቃሉጝ ሃኬና ኣይ እያይ ካቦንካ ቦን። 11 መንፐስካ የሱስ እን ቲት እሺ ኬኣርሼን ክያኑጝ ሃኦኬና ኣኒኔ ኦጉዩያጝ፣ እን ቲት ክርስቶስ ኬኣርሼን ክያኑጝ፣ ኬእን ኣኔን ኦጉዩ ቱዎጙጝ ናንዳካ ሩዋ እን ጉዩ ኣይኬ መንፐስ ኔኒ ኣርሹጉጝ ኣይባ ዻቆ።

12 ዬ ጪኒጌን ናኒ ዮ፣ ሃኣንቴ ጊዳሞ፤ ኣይባዬ ካቆብቴ ኬካ ኣሩጙጝ ማርካ ኣሩጜን። 13 ናንዳካኦ ዋንቲ የቆባያ ኬካ ኣሩጝያጝ የኣርሻባ፤ ዬ የኒሻያ ዋድማ ጋራ ጊታይካ ኣሩጝ ኬመንፐስያጝ፣ የቆባባ ኬዻቆ፤ 14 ናንዳካኦ ውራን ጊታይ ቆብኬ መንፐስካ ባሪዮጝ እንግን ጋይ ሃንታካ ባሪዮ። 15 ማር መንፐስ ኬናካ ሻም እየው ፕር እንቃ ካህሲካ ሪጊዬኔ፣ የቦዋያ መንፐስካ ናሳሞ እንኬ ሺጝቴ፦ "ባባ፣ ባባዬ" ኬሺውቶጝ፤ 16 ሃንታካ ባሪዮ ኣዬን ጉዋዩ መንፐስ ማቲኬ መንፐስ ጉዋዩ ክየሜ ማኚሺሼ ኡዋባ። 17 ሃኣያ ሃንታ ኔኒያጝ ፕር ሃኣያ ጊታኬናካ ዻሊ፤ ካኣይቴ ጊታኬናካ ካሺምንቴ ጎቢንታ ኔኑጝ ኬኣኩሉክ ሃኣያያ ጊታይካ ኣይኬ ጋጝ ኦካ ጋሎ ኔኒያጝ፣ ውር ጊታይካ ዻሊማካ ባሪዮጝ፣ ሃኣያ ኬጋጝ ኬክርስቶሴ ሃኣያ ጊታይካ ዻሊ። 18 ጋሎ እን ጉዋዩካ ቦን ይንካ ሮሮጙጝ ሃሄክንሲኬ ጎቢንታ እንካ ታካ ሌሜንያጝ ካዹዋሊሺኔያጝ ሃኮምሼኬ ኦክኮኑጝ ማሬኬ ኦኬዻ ኣዬኑጝ። 19 ኦጊታይ ሙኔ ፓይላ ካሊዬን ዹዋሊሺኔንካ ባሪዮ ኬፖሽካዾ። 20 ኦጊታይ ሙኔ ፓይላ ሻማ ኦካ ማም እያይ፤ ይንዻ ማርኬ ኦኬ እድዬን ኔኒ ኣዬኔ፣ ሃኬ ክያጃ እን ኔኒ ሻሜ ናንዳካ እንካ ኣይቴ ቃቦ ሹቃ እን ኔኑጝ። 21 ይንዻ ኦጊታይ ሙኔ ፓይላ ካቱልኬ ኦካ ካህሳሞካ ጫፒኔን አርናዬ ካዬክሼ ሃምካ አርናሞ እን ጎቢዬዬ ካኣይካ ሃንታካ ባሪዮዬ ጊያ።

22 ሌይ ኣይ ጋኑጝ ኦጊታይ ሙኔ ፓይላ ኬጋሎ ኮኑጝ ኣይካ ሹካ እꬂማጝ ሃእባጃያ እን ጋኒኔ ጋሎ ክያኑጝ። 23 ማር እን ጲኔኔ፣ ኡዋው ጊታይ እባ ኬሌሜን ጌይ ካርቡካ መንፐሱጝ ናሳሞ እን ጉዋዩ ኣይካ ናንዳካ ሩዋ ጉዋዩ ኣይኔኑጝ ሃካሊናዬ ኬቱዎጝ ጉዋዩ ሃኣኒና ጋሊኔን። 24 ባይሺሽባ ኬቃቦ ሹቃ ይእጝ፤ ዬ ቃቦ ሹቃ እን ሃኦኬናካ ጌይንቴያጝ ማር ቃቦ ሹቃዬን፤ ኦይንካ ጌይንቴጲን ካዋ ኒን ካቃቡጝ? 25 ኣይባዬ ሃቃባያ ኦይን ሃማርቴ ጌዬንያጝ፣ ሃዶንሺያ ካሊያባ።

26 ፕርዻ መንፐስ ኬልሺ ኡዋባ ኬኦካ ዻቾ ጉዋዩ፤ ሃእባጃ እን እያይ ይሁኔን ኬሁሉኩሼ ኡዋዻ፤ ዬ መንፐስ ሻምሼ ኡዋባ ኬፖሽካዽኔን ኬና ማሬኬ ክያጃካ ቶግ ሃሳዌን ቻሊዬን። 27 ኦይን ሸን ጉዋዩ ካኦይዴዻ እሺ እባጃ ቃቦካ መንፐስ፤ ናንዳካኦ መንፐስ ኬክያጃካ ባሪዮ ኩንሼባ ውራን ጊታይካ ይሁኔን። 28 ባሪዮ፣ ናንዳካ ጊታይ ናሺዬዬ ጊታይ ሺዌኬ ቃቦ ኔኒዬ፣ ኦኬ ፓይላ ካጋሽኪዬ ሹቃጝ ሃእባጃያ እንካ ሻምሼ እንግኑጝ። 29 ጊታባ ባሪዮ ሌምሼ እባጆጝ ካሙኔን ዴንታካ ውዋዌ ሌምሼ ቱምሼያ እንግን፤ ይንዻ ኬኦካ ጫንቃንካ ጪኒጌን ጊታይ ኣይ ጁዋኑጝ እሺ ካኣይ ቶይዲዬ ጊያ። 30 ሺዋ ጊታባ ሌምሼ ቱምዬዻ፤ ሪባ ጊታይ ሺዌዻ፣ ጎቢያ ጊታይ ሪቤዻ።

31 ኣኪ ናንዳካ ዳቢ እን ሃኣይና ቃቦ ኬና ኣይ እያን? ሃኦኬና ባሪዮ ኣዬኬ ኡዋውያጝ፣ ሃኒን ካቻሊ ኡዋው ኖኪዬኑጝ? 32 ውር ማር ውዋ ኔኒ ሹሹምቢዬን፣ ኣይባዬ እሺ እን ሳስክዬ ኣይ ኡዋው ፓይላጝ፣ ኦኬ ፓይላካ ማር እያን ኡዋው ኣዬን? 33 ሃኒን ካካሲሲ ውትራን ጊታይ ባሪዮ እድዮጝ? ካሻም እንግን ጫንቃላ ባሪዮ፤ 34 ኣኪ ሃኒን ካዻቢሺ እንግኑጝ? እን ኣርሹጝ፣ ፕርዻ እን ናሹጝኬ ኣርሼን ክያኑጝ፣ የሱስ ክርስቶስ እን ኡኦኤ ኣኔን ኦካ ታካ ቡዎንካ ባሪዮጝ፣ ሹ ጮል ኩንሼ ኡዋባ። 35 ሃኒን ካሻም ኡዋው ኬኦካ ናሺማካ ባሪዮ ዋናጝ? ሃጋሎ ሞ ኦኬ ጋራ፣ ሞ ዋክኔን፣ ሞ ካሽ፣ ቡርዱንቆ ኣዬን፣ ሞ ኦኬ ጋራ ሞ ኤቤል? 36 ይንዻ ሃኬ እያይ ሺጜ እያጜ ቶኮጝ፦
"ናንዳካ እን ሹሽ ይን ፓሲ ሃዳርጊናባ ኬኣርሼን፤
ኳማ ኡዋው ኬማድር ጊታ ኮኑጝ ሺጜካ ኒቄን።"
37 ኦኬ ክየምጵንዻ ሻምኬን ኡዋው ዋና፤ ኬኦካ ይን ፓይላ ኬእሺ እን ናሺ ኡዋው ሃሳጊያባ ኬኦካ ውር ጊታይ ኣይ ሳጉጝ። 38 ሃእባጅያ ይእጝ፤ ካኣይባ ኣርሼንዻ ካኣይባ ዻቆዻ፣ ካኣይባ ውርካ ኤርጎዻ ካኣይባ ቤሮዻ፣ ካኣይባ እን ኣኔዻ ካኣይባ እንካ ኩዋውዻ፣ ወይ ኣይኒን ቁዋቅቲ ኬና ኣኔን እያኑጝ፣ 39 ካኣይባ ኦዼግዻ ካኣይባ ኦቱሌዻ፣ ወይ ኣይንኒን ኦኬ ኬና ሙኔ እያንዻጝ፣ ቻሊኬን ኡዋው ኬኦካ ናሺማካ ባሪዮ እን ኣይኬ የሱስ ክርስቶስ ታቺ እን ጉዋዩጝ።