\c 1 7

1 ጪኒጌን ናኒ ዮ፣ ሃሜይሼባ ውር ጊታይ እባጅ ህጉጝ፤ ህጊ ካጌጳዽሼ ውር ክየሙጝ፣ ኣይ እን ሌይ ውር እን ኡፔኬ ካርቡ ጲኑጝ የእባጃኬኒ? 2 ኚያ ክየም ካጝ እያኒሼኑጝ ኡማ እን ኔኑጝ ካቁምኔኬ ህጉጝ ሃሌይ ሃም እሺካ ኡፑኬ ዻቆጝ፤ ዬ ኡማ ኣርሻያጝ ኬኦካ ህጊካ ማቲባ አርና። 3 ኣይባዬ ካኒ ኡማ ኡፓ ኬካርቡዬ እያኒሼና ኬጁሙ እንቃያጝ ሺጝባ ኣሽክያ ኩጳሞ፤ ዬ ኡማ ኣርሼ እያኒሼና ኬውር እንቃዻያጝ፣ ኬኦካ ህጊ እን ማቲባ አርና፤ ሺጝሼኬን እሺ ኣሽክያ ኩጳሞ።

4 ዬ ጪኒጌን ናኒ ዮ፣ እየውዻ ኬኣሩጝካ ክርስቶስ የኣርሺቴያ ህጊ፤ ይንዻ ኬእሺ እን ናሹጝኬ ኣርሼን ክያኑጝ፣ ኬማቲሺቴ ውር እንቃዬ ኬኡፑቲሽቴ ባሪዮ ካርቡዬ ጊያ። 5 ሃኣኒናባ ኦካ ባኪካ ሴሶ ባ ሙኔዬ፣ ካኡፑቲሽቴ ኣርሼን ካርቡጝ ኣርግማካ ሴሶ እን ቲቴኬ ህጉጝ ኣኔን ኦካ ሩዋ ጉዋዩ ክያኒ ኣሽክዬን። 6 ዬጋን ሃኣርሺቴ ህጊባ ቁም ኡዋዌ፣ ኬህጊ ሃቱላያ አርና፤ ይንዻ ማርኬ ህጊ ጌቾባ ቶኬዬኔ፣ ካዋድሚኬ ጉዋር ሃሊ እንካ መንፐሴ ጊያ። 7 ኣኪ ሃሺጚ ኦ? ህጊ ሃሴሶይ? ክየምጵንዻ ማር እያይኔን፤ ኣይባዬ ዋንቲ እባ ማራ ኬታካ ህጊ ኣዬንያጝ፣ ዋቲ ጊባጅኬን እን ሴሶ ኣዬ ኦውጝ፤ ዋንቲ ህጊ ማራ "ኦይ ኣርግንዽዬንያጝ"፣ ዋቲ ኣርግማ ኣዬ ኦውጝ ኬኣኩሉክ ጊባጅኬን። 8 ዬ ሴሶ ጠቅምኔ ባሊካ ኤርጎ እን ጌዬዬ ቲቲሻ ኦናኒ ኣርግማ ኬና ኣይ ካልሎን፤ ሴሶ ህጊ ማራ ኣኔንያጝ ሃኬና ኣርሺ። 9 እባ ህጊ ማሬ ኣኔኑጝ ሃኡፓ ኣኔባ እያጝ ኬካርቡ፤ ዬ ኤርጎማ ኩኖጝ ጩዋ፣ ሴሶ ጌይ ዻቆዬ፤ ኣንዻ ሃኣርሺያ። 10 ኤርጎ እንካ ኣይካ ዻቆዬ ቃቢዮጝ ሃእባጅያ እን ቦኩኔ ኣርሼኑጝ፤ 11 ሴሶ ጠቅምኔ ባሊ እን ጌዬኬ ታካ ኤርጎዬ ቱዋና ኣን፤ ኒሻ ኣን ኬኤርጎዻ። 12 ዬ ህጊ ኬታይ ኔኑጝ ሃኬና ኣይ ዋና፤ ኤርጎዻ ሃኬና ኣይ ዋና፣ ሃኬና ኣይ ጫንቃሌ ሹቃዬ።

13 ኣኪ ኦይን ኣይ ሹቃ ማቲሼያይ ኣን ኣርሼን? ክየምጵንዻ ማር እያይኔን፤ ኣይባዬ ሴሶ ካጊባጄ ሴሶ ኣዬን ኔኑጝ ኬታካ ኦይን ኣይ ሹቃጝ ቦሼያ ኣን ኣርሼን፤ ይንዻ ሴሶ ኬታካ ኤርጎ ሳጊዻ ካማቲ ሴሶዬ ጊያ።

14 ህጊ ኣዬ ኦካ መንፐሱጝ ሃእባጃያ፤ ዬ ኣን ሃኣይ ውርካ ኣሩጝ እን ጉዋሩጙሺሼ ኦካ ካህሳሞካ ሴሶጝ። 15 ሃእባጅኬን ኦይካ ኣሽክዮጝ፤ ሃኣሽኪኬን ኦይን ሃዎሼ ኣሽክዬንዻ፤ ኣይባዬ ሃኣሽኪባ ኦይን ሃሚኖጝ። 16 ኦይንካ ኣሽክዮጝ ሃኦኬና ሃኣሽክዬ ኦይን ሃማሬ ዎሼንያጝ፣ ሃማኚሺባ እን ህጊ ኣዬ ሹቃ፤ 17 ሃኦኬና ኣዬ እያይንያጝ፣ እን ኣሽኪ ዳቢ እን ማር ኣኔኔ፣ ሃሴሶ እን ኣኔን ኦናኒ ቱዎጝ። 18 ኬኣን፣ ይንዻ ኬኦካ ሴሶ ባ ናኒ ሙኔ ክያኒ ኦኬ ሹቃ ክየምጵንዻ ማሬ ኣኔኑጝ ሃእባጅያ፤ ኦይን ኣይ ሹቃ ኣሽክዬን ናኒ ኣርግማ ናኒ ኣኔባ፤ ኣይባዬ ሃቻሊኬን ኣሽክዬን። 19 ኦይንካ ኣሽክዮጝ ማር ኦሹቃ እን ሃዎሼካ ኣሽክዬኔን፤ ኣይባዬ ኦይን ሃዎሼ ኣሽክዬኑጝ ሃኦይን ኣይ ጋራጝ። 20 ሃኦኬና ኣሽክዬ ኦይን ሃማሬ ኣሽክዬ ዎሼንያጝ፣ እን ኣሽኪ ዳቢ እን ማር ኣኔኔ፣ እን ኣሽኪ ሃሴሶ እን ኣኔን ኦናኒ ቱዎጝ።

21 ዬ ህጊ ይን ኣኒኔ ኣሽክዬኑጝ ሃእባጅያ፤ ይንዻ ሃዎሺያ ኦይን ኣይ ሹቃ ኣሽክዬንያጝ፣ ኦጋራ ኣኔባ ኬኣን። 22 ኬሸን ናኒ ቱዎጝ ሃዋዝንዺባ ኬህጊካ ባሪዮ ካልሎን፤ 23 ኣይባዬ ህጊ እንካ ኣሽኪኔ ጆል ሩዋ ናኒ ክያኑጝ ሻም ኣን ኬውር ኮኑጝ ቁሜዬ፣ ህጊ እንቃ ኬና ጓሬን ጆልኬ ህጊካ ሹቦ ናኒ ኣሽክኪኔ ጆልኬ ሩዋ ናኒዬ ሃጌይያ። 24 ኣን ሃይ ውርካ ጋሎ ኬና ኣይ እያን! ኬኦካ ሩዋ ይን ናኒ ጋይኔካ ኣርሼኑጝ ሃኒን ካቻሊ ኣን ዻኣሺዬኑጝ? 25 ኬታካ የሱስ ክርስቶስ ታቺ እን ጉዋዩጝ ጎሺ ካኣይካ ባሪዮ።

ኣኪ ኣን ኬሹቦ ናኒ ሃኣይያ ካህሲካ ህጊካ ባሪዮያጝ፣ ዬ ኬታጝካ ሴሶ ባ ናኒ ሙኖጝ ሃኣይ ካህሲካ ህጊካ ሴሶ።