\c 1 6

1 ኣኪ ካሺጚ ኦ? ኣይኔን ካጁዋትሼ ኡዋው ካኣሽክዬን ሴሶዬ ካቆቢባይ? 2 ክየምጵንዻ ማር እያይኔን፤ ሃኣርሻያ ናንዳካ ሴሶ፤ ኣኪ ካርሲኬ ሃሻማ እያን ካቆብቴኬ እሹጝ? 3 ሃዱቅህንቴ ናንዳካ እን ካኣይቴ ኬየሱስ ክርስቶስ ክየሙጝ፣ ኬኣይቴኬ ኣርሼንዻ ክየሙጝ የእባጃኬኒ እን ሃዱቅህንቶጝ? 4 ዬ ክርስቶስ ኬእያይ ናሹጜ ኬጎቢንታካ ሹኔ ኬኣርሼን ክያኑጝ፣ ኬእያይ ኡዋዻ ኬቆብቴኬ ዻቆ ሃሉጝ ሃኣርሻኬ ዱቅኒኔኔ ቱቱካ ኡዋው ኬእሺ።

5 ኬኣርሼን ኔኒ ሃኦኬና ሃኣይቴኬ እሺ ክየምያጝ፣ ፕር ኬናሹጜን ኔኒ ኬኣኩሉክ ሃኣያባ ኬእሺ ክየም። 6 ካርሲኬ ጋኔ ካማርቴ ካህሲካ ሴሶ ኣዬኑጝ፣ ካጎይዴ ሩዋ እንካ ሴሶጝ ሃእባጃያ እን ቱቱኬ ሩዋ ጌቿን ጊታይ ቱቱኬ ኬእሹጝ፤ 7 ናንዳካኦ ውር እን ኣርሹጝ ጌያ ኬኦካ ሴሶ ጫንቃል።

8 ሃኦኬና ሃኣርቴኬ ክርስቶስ ክየምጵንያጝ፣ ሃኣምኒያባ እን ካቆብቴኬ እሺ ክየምጵኑጝ። 9 ናንዳካኦ ክርስቶስ ናሹጟ ኬኣርሼን ክያኒ፣ ሃእባጃያ እንካ ማሬ እንቃ ኣርሼኑጝ፤ ካርሲኬ ጋኔ ኣርሼን ቁዋቅትሼኬን እሺ። 10 ኬሹ እን ኣርሾጝ፣ ኣርሻ ናንዳካ ሴሶ ናንዳካ ቱንሲ፤ ኣይባዬ እን ኡፔኬ ዻቆጝ ኡፑሼ ባሪዮ።

11 ኬእያይ እየውዻ የኣርቴ ናንዳካ ሴሶ እያይኑጝ፣ ኣይባዬ ኬየሱስ ክርስቶስ ኳምቴ እየው ኤታጋን ኬእያይ ኬቆብቴኬ ባሪዮ ኬዻቆ ሹ ጮሉጝ። 12 ኬሙንቴ ኣርግማ ጋራ እኑጝ ሴሶ ካጌጳዽሼ ሩዋ ኣርሹጉ እን ጉዩጝ ኦይዲ ሻምቴን። 13 ሩዋዋን ጉዩ ኦይዲ ኦካ ኦጋራ ጊታይ ኣሽክዬ ጆሌ ሴሶ ቦቴን፤ ሳጊዻ ሻምኬ ውር ጊታይ ኬሃምካ ኣርሼን ቁዋሊሼን እያጝካ ዻቆዬ ቦቴባ እየው ኤታጋን ባሪዮ፤ ሩዋዋን ጉዩዻ ሻም ኦካ ኦኬ ጫንቃል ኣሽክዬ ጆሌኔ ቦቴባ ባሪዮ። 14 ናንዳካጝ የኣኒንቴ ኬኦካ ኣይኔን ዱቡጝ ዬ የማርቴ ኬኦካ ህጊ ዱቡ ኣኒንቴኑጝ፣ ሴሶ ኡዋሩጝኬን እየው። 15 ኣኪ ካኣይ ኦ? ሃማርቴኬ ኦካ ህጊ ዱቡ ኣዬኔ፣ ኬእን ሃኣይቴ ኬኦካ ኣይኔን ዱቡጝ ካኣሽኪ ሴሶይ? ክየምጵንዻ ኣይኬን እያይ! 16 የሻማ እየው ኤታጋን ኬካህሲዬ የቦፓይንቴያጝ፣ ናንዳካ እየው ጊታይ ዋይሼን እሹጝ፣ ይንዻ ኬእንካ ቦሼ ሃምካ ኣርሼኑጝ ሃምካ ሴሶጝ ወይ የኣይቴ ካህሳን ጊታይካ ዋይሺሺንቴ እንካ ሄክሺሼ ሃም ኣይ ጫንቃሉጝ የእባጃኬኒ? 17 ኣይባዬ ኬኣይኒን ጊታይ ኣይ ካህሲካ ሴሶጝ፣ ናንዳካጝ የዋይሺንቴ እርርሲኔን ጊርርሲዬ ኬሸን ክየሙጝ፣ ሮጝካ ባሪዮ ካጌጳዽባ፤ 18 የቱላኬ ኦካ ሴሶ አርናዬ፣ የማቲያያ ካህሲካ ጫንቃል።

19 ኬኦባ ሙኔ እየው ናንዳካጝ የኣይቴ ዻቹጉጝ፣ ሃሜይሼባ እየው ኬቶግካ ውር፤ ኬእያባ የቦቴ ሩዋዋን ጉዩ ካህሳሞዬ ኦኬ ጋራ ጊታይኔ ጋራቲ እንካ ጁዋኒቲሻ ካሙጝ፣ ፕር ጋን ኬሻምቴ ካህሲካ እን ኣይ ጫንቃሌ ኬቦፓይቴባ ሃም ኣይ ዋናጝ። 20 የኣያባ ካህሲካ ሴሶዬ ኬእን ኣይ ጫንቃሉጝ የኣያ አርና። 21 ጋን ኬኦጊታይ የቦኩንዽቶጝ እባ ኬኦይን የጌያ ኦኬ ኬና ኣይ እያን? ኦይን ጌዬ ኬኦካ ዳቢ እን ሃኣርሼን። 22 ዬ ጋን የቱላኬ ኦካ ሴሶ አርናዬ የማቲያያ ካህሲካ ባሪዮ፤ ካርቧን ጊታይ የፑኡሺቴዻ እያኒሼ እየውባ ሃም ኣይ ዋናጝ፤ ቱንሲ ኔኒዻ ሃዻቆካ ቦንካ ቦን። 23 ናንዳካኦ ዳሙስካ ሴሷ ኣርሼን፤ ዬ ኣይኔንካ ባሪዮ ኬየሱስ ክርስቶስ ታቺ እን ጉዋዩጝ ሃዻቆካ ቦንካ ቦን።