\c 1 5
1
ኣኪ ናንዳካጝ ሃጌይቴኬ እምናት ጫንቃሉጝ፣ ኬታካ የሱስ ክርስቶስ ታቺ እን ጉዋዩጝ ሃቆባባ ኬሹቃ ኬባሪዮ።
2
ኬታይ ኔኑጝ ጋን ኦካ ኣይኒን ይጝ ሃጎርቶጝ ሃቻሊያያ ኬእምናት ሻዌን፤ ናንዳካጝ ሃቃቢህንቴ ጎቢንታካ ባሪዮጝ ሃዋዝንዽያባ ካልሎን።
3
ማርኬ እን ጲኔኔ ኬጋሎ ጉዋዩዻ ሃዋዝንዽያባ ካልሎን፤ ናንዳካኦ ጋሎ ካጌይሺሼ ኦኬ ዶንሺዬኑጝ ሃእባጃያ።
4
ኦኬ ዶንሺዬን ጌይሺሽ ኡዋባ ቁዋቅቲ፣ ቁዋቅቲ ጌይሺሽ ኡዋባ ዴንታ ኬና ታሜኬ ክያጃ ኡኤዋይሺሼን፣ ዴንታ ኬና ታሜኬ ክያጃ ኡዋይሺሼን ጌይሺሽባ ቃቦ ሹቃ፤
5
ቃቦ ሹቃ እንዻ ሻምሼኬን ኡዋው ሃምካ ኡሲ ቦዌን፤ ባሪዮ ኬእን ኣዬ ኡዋውጝ ኬመንፐስካ ባሪዮ እን ኣይ ዋናጝ ሻምሼያ ናሺማ ኔኒ ሸን ጉዋዩ ክያኒ።
6
ካኒ ሃኣያባ ዻቹጉዬ፣ ሹ ኔኒ ሄክሽባ፣ ክርስቶስ ኣርሻ ናንዳካ ሴሶ ጉዋዩ።
7
ውር ኬናካ ኣርሽ ናንዳካ ውር ጫንቃል ጌዬን ኔኒ ካልሎን ጌይሺሽባ ሹቃቲ፤ ውር ኬናካ ሺጝ ናንዳካ ውር ሹቃዬ ኬናካ ኣርሽ ካካጌይ።
8
ኣይባዬ ካኒ ሃኣያባ ውርካ ሴሶዬ ክርስቶስ ኣርሻ ናንዳካ ኡዋው፤ ይንዻ ዹዋሊሼን እን ባሪዮ ናሺዬ ኡዋው።
9
ጋን ሃኦኬና ሻሜ ኡዋው ኬኚያቡ ኔኒ ጫንቃልያጝ፣ ሳጊዻ ኬታይ ኔኑጝ ሃማራ እያን ኬኦካ ማኒትካ ባሪዮ ዻቄን!
10
ሃኣያባ ጋልካ ባሪዮዬ ኬኣርሼንካ ውዋ ሃኦኬና ሃቃሺምንቴ ኬእሺያጝ፣ ሃቃሺምንቶጝ ጩዋ፣ ኬዻቆ ባይሼን ጉዋዩ ማር እያን ሳጊ ኣዬን!
11
ማር እን ጵኔን። ኣይባዬ ጋን ኬታካ የሱስ ክርስቶስ ታቺ እን ጉዋዩ ሃጌይቴ ቃሹጝ ፕር ሃዋዝንዽያባ ኬባሪዮ ካልሎንሃጌይቴ ቃሹ።
12
ዬ ኬእያይ ሴሶ ኬታካ ውር ክየም ሁሉኬ ፔን ክያኑጝ ፓይላ፣ ኣርሼንዻ ሁሉካ ኬታካ ሴሶ፤ ኬጉዋር ኬና ኣይ እያይንዻ ኣርሼን ኩንሼያ ውር ፓይላ፤ ናንዳካኦ ውር ፓይላ ኣሽክያ ሴሶ፤
13
ኬኦካ ሌሜንካ እንካ ዋዬ ህጉጝ ሴሶ ኣኔባ ፔን ክያኒ፤ ኣይባዬ ኦካጝ ህጊ ማሬ ኣኔኑጝ ኳምኬን ሴሶ።
14
ኣይባዬ ቦኬ አዳሜ ሌይ ኣይ ሙሶጝ ጊታይ ኣኖጝ፤ ኬእያይካ አዳም ጌይድ ህጊዬ ኣይኒን ኦካ ጊታይ ማር ሴሶ ኣሽክዬኑጝ ኣርሼን ኩንሼያ እንግን፤ ቆብኬ ዴንታባ አዳም ኩኖጝ።
15
ኣይባዬ ኣይኔን ኔኒ ማርኬ እያይካ ሴሶ ኔኒዬን፤ ኬሴሶካ ውር ክየም ሃኦኬና ውር ጁዋኑካ ኣርሼያጝ፣ ኣይኔንካ ባሪዮዬ ኬውር ክየም፣ ይንዻ ኣይኔን እን ኩንኬ ኣይኔንካ የሱስ ክርስቶሱጝ ማር እያን ውር ጁዋኑ ሳስክዬ ጁዋኑ ሻሜ ኣዬን!
16
ፕርዻ ኣይኔንካ ባሪዮ ኬእያይካ ውር ክየሙጝ ማር ኦካ ሴሶዬን፤ ናንዳካኦ ብቶ ታክዬን ዻዬ ሴሶካ ውር ክየሜ ቦኩኔያ ብቶ ታክዬን፤ ዬ ኣይኔን ዻዬ ሴሶ ጁዋኑዬ ቦኩኔያ ጫንቃል ማቲዬን።
17
ኬሴሶ ኣሽክዬንካ ውር ክየም ሃኦኬና ኣርሼን ኩኔኬ ታካ ውር እንያጝ፣ ውራን ጊታይ ቦዊ ኣይኔንካ ብ ኣሪዮ እን ኣይ ጋፂዬ ኣይኔንካ ጫንቃል ጌዬኑጝ፣ ኬታካ የሱስ ክርስቶስ ክየም እን ማር እያን ሳስክዬ ዻቆ ጌዬን!
18
ካርሲኬ ጋኔ ኬእያይ ኬሴሶካ ውር ክየም ብቶ ታክዬን ኩንሼ ውር ፓይላጝ፣ ኬእያይዻ ኬዋድማካ ጫንቃል ክየም እኑጝ ጌያ ውር ጫንቃል ኬናካ ኣይ ውር ፓይላ ዻቆ።
19
ኬእን ውር ክየም ማሬ ኦኬ ዋዬኑጝ ውር ጁዋኑ ኣዬ ውርካ ሴሶጝ፣ ፕር ኬኦኬ ዋይሺኔንካ ውር ክየም እን ውር ጁዋኑ ማቲባ ጫንቃል።
20
ኬእን ህጊ ኩኖጝ ሴሶ ጁዋኒቲሻ፤ ኣይባዬ ኬኦካ እን ሴሶ ጁዋንቲሾጝ ሃኦኬና ኣይኔን ኣዬ ጋፂ ሳጊያጝ፤
21
ይንዻ ኣዮጝ ኬእያይ ሴሶ ጌጳዽዬ ኬኣርሼኑጝ ፓይላ፣ ፕር ኬታካ የሱስ ክርስቶስ ካጌዬ ዻቆካ ቦንካ ቦኑጝ ኣይኔን ካጌጳዺኬ ጫንቃሌ ጊያ።