\c 1 4

1 ኣኪ ኬኦካ ሹቡጌን ጊታባ ጉዋዩካ ኣሩጝ ሹኔ ጉዋዩ አብራሃም ኬጉዋር ኬና ኣኒኒ እያጝ ሃሺጛ ጌይ ኦ? 2 ዋንቲ እባ አብራሃም ጌያ ኬዋድማ ኔኒ ጫንቃልያጝ፣ ኣኔ ኦኬ ኬናካ ቃይና ጆሌ፤ ኣይባዬ ቻሊኬን ኬኦካ ሌሜንካ ባሪዮ ቃይዬ። 3 ኤ ወርቀትካ ሺጝ እያን? አብራሃም ኣምኒያ ባሪዮ፤ ማቲ ጫንቃልዻዬ ኳማኣ።"

4 ውር ክየም ኣሽክያ ዋድማያጝ ዳሙስ እንካ ካሺሼ እሹጝ ማርኬ ኦኬናካ ጋዬ እሺ ማም እያይኔ ኳምሼ እሺባ ኬእያይካ ዋጋ እንካ ካሺሼ እሹጝ። 5 ኣይባዬ ናንዳካ ውር እን ማር ዋድምኔኑጝ፣ ውር እን ኣምኒኬ ባሪዮ እን ሻሜ ጆል ውር ጊታይካ ሴሶ ጫንቃሉጝ፣ እምናት ኔኒ ማቲ ጫንቃሌ ኳምሼ እሺባ። 6 ዳዊትዻ ናንዳካ ጫንቃል ኣዬንካ ውር እን ማርኬ ዋድማ ጫንቃል ኳምሼኑጝ ሺጛ እያጝ፦
7 "ውር ጊታይ ዋይሼ ኦጊታይ ጊዬይ ጊያምሼ ጆሌ ካሺዺባጝ፣
ሺእሺሼ እንግን ሴሶ ጊዬይዻጝ፣
ጋይ ጊታኬና ጉዋኔ።
8 ውር እን ታቺ እን ማሬ ሴሶ ኔኒ ክየምጵንዻ እሺ ኳምሼኑጝ፣
ሃኬና ጉዋኔ።"

9 ኡዋኒኔን ይጝ ሃካ ውር ጊታይ ቋሬ ጲን ሞ ሃካ ውር ጊታይ ማሬ ቋሬንዻ? ሃሺጛ እምናትካ አብራሃም ማቲ ጫንቃሌ ኳምሼያ እሺ። 10 ኣኪ ኳምሼ እሺ እያን? ቋር እሺዬ ጊያ ሞ ሃኬ ኦካ ሌሜንካ ቋርኔን ኔኒ? ኳምሼ እሹጝ ማርኬ ኦይን ቋሬ እሺዬኔ ሃኬ ኦካ ሌሜንካ ባ ማሬ እሺ ቋሬኑጝ። 11 ኬኦካ እምናት ባ ማሬ እሺ ቋሬኔ ጫንቃል እን ጌዮጝ፣ ቃንዺካ ቋርኔን እንዻ ቦዋ ማህትምካ ጫንቃል ጌዬን፤ ዬ ናንዳካ ጊታይ ኣምኒ ኣይባዬ ናንዳካ ጊታይ ማሬ ቋሬን ካኳምሼ እንግን ጫንቃል ኣዬን ክያኑጝ ሃሹኔካ ውር ፓይላ። 12 እሺ ሃሹኔካ ውር ጊታይ ቋሮጝ፤ ማር ቋርኔን ጲኔኔ፣ ሹኔ ጉዋዩ አብራሃም ኬኦካ ሌሜንካ ቋርኔን ኔኒ ናንዳካ ውር ጊታይ ዎሼ ዻዬዻ ፓይላ። 13 እሺ ካዻሊዬ ፔኑጝ አብራሜ ቢዛ ኔኒዬ ቃቦ ሹቃ እኑጝ ማርኬ ታጝካ ህጊዬን፤ ኣይባዬ ሃኬ ጫንቃል ጌይን ኣይኬ እምናት።

14 ውራን ጊታይ ቆብኬ ህጉጝ ሃኦኬናካ ዻሊዬያጝ፣ ዋንቲ እምናት ማቲያ ኦካ ማም እያይ፣ ቃቦ ሹቃ እንዻ ዋቲ ማቲያ ማም እያይ፤ 15 ህጊ ቦኩኔባ ማኒት፤ ዬ ኦካጝ ህጊ ማሬ ኣኔኑጝ ሴሶ ኣሽክዬን ኣኔኬን።

16 ዬ ቃቦ ሹቃ ኩና ኬእምናት፤ ቃቦ እንዻ ካኣዬኬ ኣይኔኔ ናንዳካ ቢዛካ አብራሃም ፓይላ ሃእን ኣዬ ኣይኒን እን ባሪዮ ኣይኖጝ፤ ይንዻ ኬታጝካ ህጉጝ ማር ናንዳካ ጊታይ ኣይ ኔኒ ጲኔኔ፣ ሃናንዳካ ጊታይ ኬእምናት ኣይካ አብራሃም፤ እሺዻ ሃሹኔካ ኡዋው ፓይላ፤ 17 ይንዻ ኬእያይ ሺጜ፦ "ሃሻምያ እን ሹኔካ ዛርሲ ጁዋኑዬ" ቶኮጝ፤ እሺዻ ኬእን ኣይ ውር ጊታይ ኣርሺ ዻቆጝ፣ እን ማር ኣኔኑጝ ሻምኬ እያይ ኣኖጝ፣ ኬኦካ ባሪዮ እን ኣምኒዮጝ ሃሹኔ ጉዋዩ።

18 ኬእያይ ሺጜ፦ "ቢዛ ኑኑዻ ማቲባ እያጜ" ሜይሼ እሹጝ፣ ኬኦካ ኦኬና ማር ቃቦ ኣኔን፣ አብራሃም ኣምኒኬ ቃቦዬ ማቲያ ሹኔካ ዛርሲ ጁዋኑ። 19 እሺ ኣይባ ውር ኬና ቦን ኣይ ዽቤ ክየሜ፣ ኣይኔን ሩዋ ኔኑጝ ኣይኒን ቶኦካ ጫላካ ሳራ ማሬካ ጂሺኔኑጝ እባጅባዬ ካኒ ዻችኬን ኬእምናት ኔኒ። 20 ሳጊዻ ኬእን ቁዋቅትሼ ዾሬኬ እምናት ኔኑጝ ጎቢያ ባሪዮ ዬ፣ ካኒ ቃጋዺኬን ቃቦ ሹቃ እንካ ባሪዮጝ፤ 21 ቃቦ ሹቃ እን ባሪዮ ኣዬ እሹጝ ካሙኒኖጝ እባጃ ኬሸን ክየም። 22 ዬ፣ "እሺ ማቲ ጫንቃሌ ኳማ።" 23 ክያጃ እን ሺጜ፦ "እሺ ማቲ ጫንቃሌ ኳማዬ" ቶኮጝ ማር ናንዳካ እሺ ጲኔን፤ 24 ኣይባዬ ባሪዮ ካሻሜ ኡዋው ጫንቃሌ ካኳሞጝ፣ ሃናንዳካ ኡዋው ጊታይ ኣምኒኬ የሱስ ታቺ እን ጉዋዩ እሺ ቲቴኬ ኣርሼን ክያኒዻጝ። 25 እሺ ካኣርሼ ናንዳካ ሴሶ ጉዋዩጝ ሳጊዬ ጋዬና እሺ፤ ካሻሜ ኡዋው ጫንቃሉጝ ናሹጛ ኬኣርሼን ክያኒ።