\c 1 3
1
ኣኪ ውርካ አይሁድ ኣዬን ጥቅም ኔና ኦ? ኤ ኦካ ቋርኔንካ ኣና ኦ?
2
ኬጉዋር ኬና ኣይ እያንዻ ጥቅም ኔኒ ሃጁዋኑ፤ ኬኦካ ፓይላ ሌምሼ ጋዬ ክያጃካ ባሪዮ እንግን።
3
ውር ክየም ክየም ኤ ማራ እምናት ኣኔንያጝካ? እን እንግን ማሬ ኣምኒዬኑጝ ካይሲሲባይ ዋጋካ ሹቃ ኣዬንካ ባሪዮ?
4
ክየምጵንዻ ኣይኬን እያይ! ውር ፓይላ ካኣይ ውርካ ሾሮ፣ ዬ ባሪዮ ካኣይ ኣኩሉክ፤ ናንዳካኦ ሺጝ እያጜ ቶኳ፦
"ኬክያጃ ኑኑ የኣይ ኣኩሉክ፣
ኬኦካ ሌሜንካ ብቶ ታክዬ ጆሌን ኑኑዻ የኣይባ ውር ኬናካ ታኪ ብቶ።"
5
ሴሶ ጉዋዩ ሃኬናካ ዹዋልሺንቴ ጫንቃል ኣዬንካ ባሪዮያጝ፣ ሃቻሊያ ኦ ሺጜን? ኬእያይካ ዜርምኔ ኬካ ውርዻጝ ማኒት እን ባሪዮ ካቦሼ ኡዋውጝ ሃእንካ ሺጜ ማር ሊኪዬንኪ? ሃሺጚ ቃቢ ኬካ ውርያጝ ጊያ።
6
ኬኣኩሉክ ቻሊኬን እያይ ኣዬን፤ ዋንቲ ኣያ እያይንያጝ ባሪዮ ቻሊ እያን ፔኑጝ ክያኒ ብቶ ታክዬን?
7
"ውርካ ሾሮ ኣዬን ናኒ ሃኦኬና ዹዋልሺንቴ ኣኩሉክ ኣዬንካ ባሪዮያጝ፣ ሃኦኬናካ ሌሜ ጎቢንታ ኔኒዻያጝ፣ ዋይሼ ኣን ውርካ ሴሶ ታክሼ እያን ኣን ብቶ ሌይ ኣይ ጋኑጝ?" ውር ኬናካ ሺጝ እያይኔ ካዜርምንቴ ካካ ኣኖጝ።
8
ኬይጝ ሺጜ፦ "ኦኬ ሹቃ ካኩዋዎጝ ካኣሽኪ ኦኬ ጋራዬ" ሃኬ እያይ ውር ክየም ክየም ሃሳውሺኔ ኡዋው፤ ብቶ ታክዬን ኬናካ ሄክሽ ውራን ጊታይ ሃኬና ኣይ ሊኪ።
9
ኣኪ ካሺጚ ኦ? ኡዋው ሃሳጊያይ ኬኦጊዬይ? ክየምጵንዻ ማር እያይኔን፤ ኣይኒን ውርካ አይሁዱጝ ኣይኒን ቶርሱጝ፣ ፓይላ ካጋዬኬ ኦካ ሴሶ ዱቡጝ ሃሌምሻዬ ሃሜይሼያ እንግን፣
10
ኬእያይ ሺጜ እያጜ ቶኮጝ፦
"ውር ክየምጵንዻ ኬና ኣይ ጫንቃል ኣኔኬን፤ ክየምጵንዻ፤
11
ኬናካ ጶቅሲ ኦኬ ኣኔኬን፤
ውር ክየምጵዻ ኬናካ ዎሽ ባሪዮ ኣኔኬን።
12
እንግን ፓይላ ጊያምሻ፤
ጋይኬ ጋጜ ማቲያ ጊታኬና ኣይካ ማም እያይ፤
ውር ክየምጵንዻ ኬናካ ኣሽኪ ኦኬ ሹቃ ኣኔኬን፤
ኣይኒን ውር ክየምጵንዻ።
13
"ቋሩጝ ጊዬይ ሃሌሲ ኬና ቦኼ፤
ካት ጊዬይ ሹ ጮል ሃሳዌን ሾሮ።"
"ኦካ ፖዾሮካ ቶግ ጊዬይ ኣኔ ዼሻካ ቻች።"
14
ቶግ ጊዬይ ቋቋ ኬኣሽሞዬ ኦኬ ጅቄዬ።"
15
"ጃፕ ጊዬይዻ ኚያቡ ሜሊሺሼን ሃኬና ኣይ ቤርቢ፤
16
ኬኦካ ጉዋር ጊዬይ ካዮዬ ጋሎዬ ኣኔባ፤
17
ጊባጅኬን ጉዋር እን ኣይ ሹቃዻ።"
18
"ኬኦካ ሌሜንካ ካርቡ ጊዬይ ባሪዮ ሪግሺኔን ኣኔኬን።"
19
ኣኪ ካሃጌ ቶግ ፓይላዬ ውርካ ፔን ካኣይ ባሪዮ ቃቦዬ ኦጊታይ ህጊ ክያጆጝ ፓይላ ካኣይካ ውር ጊታይ ኣይኬ ኦካ ህጊ ዱቡዬ፣ ሃእባጃያ፤
20
ዬ ኬህጊ ዻዬን ውር ክየምጵንዻ ኬኦካ ሌሜን ኔኒ ቻሊኬን ሃጫንቃል ሺጚሼን፤ ሳጊዻ ኬታጝካ ህጉጝ ውር ፓይላ ሃውርካ ሴሶ።
21
ዬ ጋን እን ህጊዬ ውርካ ቶካ ባሪዮዬ ማኚሺዮጝ፣ እን ኣይኬ ኦካ ህጊ ሹኑኩጝ፣ ዹዋልሼና ጫንቃል ኣዬንካ ባሪዮ።
22
ጫንቃል ኣዬን እንካ ባሪዮዻ ሃጫንቃል እን ጋምኒዬኬ የሱስ ክርስቶሱጝ። ኦኬ ኬናናይ ዋናዻ ኣኔኬን፤
23
ናንዳካኦ ውር ፓይላ ኣሽክያ ሴሶ፤ ጎቢንታካ ባሪዮዻ ጆክሼያ እንግን፤
24
ኬባይሺሺኔን እን ኣይኬ የሱስ ክርስቶሱጝ ጌያ ኬኣይኔንካ ባሪዮ ጫንቃል፤
25
ኬእምናት እን ኣይኬ ኚያቡ ኔኒዻጝ፣ ባሪዮ ሻም ጋላካ ሴሶ ሺእሺሼኔ ቡላ፤ ሻሜ እያይዻጝ ሴሶ ባ ጋሽኪዬ እባ ኬሌሜኑጝ እን ማሬ ጋሊንሺዬኔ ሳጊዬ ኬዶንሺዬኑጝ ሃካ ጫንቃል ኣዬን ኔኒ ዹዋልሺኔን፤
26
ኬቦን ይንካ ጋኑጝ ሻሜ እያይኑጝ፣ ጫንቃል ኣዬን ኔኒ ይንዻ እሺ ኤምኑዻ ማቲ ጫንቃሌ፣ ውር ጊታይ ኣምኒኬ የሱሱጝ ካሻሜ ጫንቃሉጝ፣ ሻምካ ዹዋልሺኔን።
27
ኣኪ ቃያ ኣኔን ኦን? እሺ ሺዺያ። ሃኬ ህጊ ና? ሃኬ ህጊካ ዋድማይ? እኢ፤ ሃኬ ህጊካ እምናት።
28
ውር ክየምጵንዻ ማር እን ኣሽኪዬ ህጊዬኔ። ካጌዬኬ እምናት ጫንቃሉጝ ሃእባጃያ።
29
ባሪዮ ሃባሪዮካ ውርካ አይሁድ ጲኒ? ኤ ማር ባሪዮካ ቶርሲዻዬኒ ? ይንጌ፤ ሃባሪዮካ ቶርሲዻ፤
30
ናንዳካኦ እን ቋሮጝ ሃኬ እምናት፣ እን ማሬ ቋሬንዻ ካሻምኬ እምናት እን ጫንቃሉጝ ሃባሪዮ ክየምጵንዻ።
31
ኣኪ ሃኦኬና ኣዬ እያይንያጝ ኬእምናት ካሻሚ ህጊ ኬኦኮኑጝ ማሬ ዋጋ ኣኔንኪ? ክየምጵንዻ ሻምኬን እያይ፤ ሃዻይቴባ ህጊ።