\c 1 2
1
ዬ እን ይጝ ታክሼ ጆሌ ውር እንቃ ብቶጝ፣ ኦኬናኬ ቃይሼ እን ኤምኑ ኣኔኬን፤ ኬኦጊታይ የታክሼ ውር እንቃ ብቶጝ ፓይላ፣ የታክሼባ እን ኤምኑዻ ብቶ፤ እን ኣይ ውርካ ብቶጝ የኣሽኪባ ኦጊታይ።
2
ኬኦካ ውር ጊታይ ኣሽክዬን እያይዻጝ ብቶ ታክዬንካ ባሪዩኦ ኣዬ ሊኩጝ ሃእባጃያ።
3
ኣኪ እን ውሩጝ የታክሼን ውር እንቃ ብቶዬ፣ ሃኦኬና የሻሜ ኦጊታይንያጝ የዋሽኬ ኦኮኑጝ ኬዻቄኬ ኦካ ብቶ ታክዬንካ ባሪዮኪ?
4
ሞ ሹቃ ኣዬካ ባሪዮ ካዋሼ እን ሃምካ ይሁኔኑጝ የካኔ እባጅኬኔ፣ የቦዊያይ ሹቃ ኣዬን ኔኒ፣ ኦኬ ፓይላ እባጄን ኔኒ ኦኬ ካልሎን ዶንሺዬን ኔኒ?
5
ኣይባዬ ኬእን ኑኑ የማሬ ኦኬ ዋዬኔ ኬሸን እን ኑኑ ማር ሃምካ ባሪዮ ዋክሼኔ ዹዋልሼና ብቶ እን ኣይ ሊኪያጝ ኬሹካ ማኒት እንካ ባሪዮጝ የፑኡሺሼባ እን ኤምኑ ማኒት።
6
ባሪዮ "ኣይባ ውር ክየም ክየም ኬእያይካ ዋድማ ጊዬይዩጝ"፤
7
ኦይን ኣይ ሹቃ ኬቁዋቅቲሼ ኣሽክዬን ውር ጊታይ ዎሺ ጎቢንታዬ፣ ጎጳሞዬ ዻቆ እን ማርካ ካይዬኔ ባሪዮ ኣይ እንግን ዻቆካ ቦንካ ቦን።
8
ኣይባዬ ናንዳካ ጊታይ ናሺኔ ጆል እንግን ኤታጋኔ፣ ጊታይ ኦይዲ ኦይን ኣይ ኣኩሉኬ ዻዬ ኦኬ ጋራዬ ብቶ ታክዬኔ ማኒቴ ሄክሽ እንግንባ።
9
ኬኦካ ውር ጊታይ ኣሽኪኔ ጆል ኦኬ ጋራጝ ኣይኒን ውር ኬና ኣይ እያኑጝ፣ ጋሎዬ ኦኬ ጋራዬ ኬሌሜን ኩንሼባ ውርካ አይሁድ ኬኦይን ጩዋ ኩንሼባ ቶርሲ፤
10
ኣይባዬ ናንዳካ ውር እን ኣሽክዬን ኦኬ ሹቃጝ ኣይኒን ውር ኬና ኣይ እያኑጝ፣ ጎቢንታዬ፣ ጎጳሞዬ ሹቃቲዬ ኬሌሜን ኩንሼባ ውርካ አይሁድ ኬኦይን ጩዋ ኩንሼባ ቶርሲ፤
11
ናንዳካኦ ባሪዮ ጁንሼኬን ውር ክየምጵንዻ።
12
ውር ጊታይ ማር ህጊ ኣኔኔ ኣሽኪ ሴሶጝ ፓይላ ካህይባ ማም እያይ ህጊ ኣኔኬኔ፤ ውር ጊታይ ኣኔ ህጊዬ ኣሽኪ ሴሶጝ ታክሼ እንግን ብቶ ኬህጊ፤
13
ናንዳካኦ ኬኦካ ሌሜንካ ባሪዮ ውር ጊታይ ሺጜ ጫንቃሉጝ ሃውር ጊታይ ዋይሺሼን ህጊዬ ኣሽኪ ዬ፣ ማር ናንዳካ ጊታይ ዋይ ማሜን።
14
ቶርሲ ጊታይ ማር ህጊ እባጄኑጝ ኦጊታይ ህጊ ኤርጊቶጝ እንግን ጋሽኪያጝ፣ እንግን ማርኒን ህጊ ኣኔኑጝ እንግን ጋይ ህጊካ እንግን ኤታጋን።
15
ናንዳካጝ ሹቦ ጊዬይካ ማኚሺዬይ፣ ናንዳካጝ ቃቦ ጊዬይ ካካሲዬ እንግኔ፣ ፕርዻ ናንዳካጝ ካሃርጌ እንግኑጝ ኤርጓን ጊታይካ ህጉጝ ቶኩሼ ሸን ጊዬይ ክያኑጝ ዹዋልሼምባ።
16
ይንዻ ኬእይያይ ሃእርርሲኔ ኬክያጃ ሹቃጝ ባሪዮ ኦይን ድኬ ኦካ ሸንካ ውር ቱዎጙጝ ኬሹ እን ካታክዬ ብቶ ኬታጝካ ክርስቶሱጝ ማቲባ ጃ።
17
እን ሃኦኬኔ የሺጜ ኣን ሃኣይ ውርካ ይሁዳያጝ፣ የኣይ ኬና ኤሪምኔ ህጊዬ ቃይዬን ኬእን የኣይኬ ባሪዮጝ፣
18
ኬእን የጃሌጆሌ ኬህጉጝ የእባጅ ክያጃ ኔኒዬ የሻሚ ካልሎኔ የጎምያ ኦይን ኣይ ዋናያጝ፣
19
የእባጅያ እን የኣዬ ውር ኬና እያኒሼ ጆሌ ውር ጊታይ ኣይ ሙሙዾዬ፣ ኣይ ኦሜሌልካ ውር ጊታይካ ኣኔን ድሙጉ ክያኒያጝ፣
20
ኬኦኬ እባጄን እን የጌዬኬ ኦካ ህጊዬ ኦይን ኣይ ኣኩሉኮጝ የኣይያ ውር ኬናካ ኪሊያ ጆል ውር ጊታይ ማሬ እባጄኔ፣ ኬናካ እርርሲያ ጆል ሃንታያጝ፣
21
ኣኪ እን ይጝ እርርሲኔ ጆል ውር ዶኩጝ፣ የእርርሲኬኒ እን ኤምኑ? እን እን ዋጅጌን ኦይ ኦጉሪንቴኔ ሜይሼ ጆሌ ውሩጝ፣ የኦጉሬንባይ?
22
እን ይጝ ዋይሼ ጆሌ ውር ውርካ ማር ኩጳሞ ኣሽክዬኑጝ፣ የኣሽኪባይ ኩጳሞ? እን ይጝ ሚኔ ኦጊታይ ኣይኬ ኦካ ባሪዮ ሹኑኩጝ፣ የቡሪባይ ቶኦካ ይሁኔን ጊዬይ?
23
እን ይጝ ቃይዬንኬ ህጉጝ፣ ኬእን የኦይዴ ህጉጝ የቦዊሲባይ ባሪዮ?
24
ኬይንዻ ሃኬ እያይ ሺጜ እያጜ ቶኮጝ፦ "ናንዳካ ክያጃ ጉዩ ይርባ ሮጝካ ባሪዮ ኦካ ቶርሲ።"
25
ሃኦኬና የኣሽኪዬ ህጊያጝ ቋርኔን ኣኔ ዋጋ፤ ዬ ሃኦኬና የኦይዴ ህጊያጝ የማቲባ ኬኦኮኑጝ ማሬ ቋሬኑጝ።
26
ውራን ጊታይ ማሬ ቋሬኑጝ ሃኦኬና ጋሽኪዬ ኦጊታይ ህጊ ኤርጊቴያጝ፣ ኮምሼኬኒ ኬኦኮኑጝ ቋሬ እንግኑጝ?
27
እን ናንዳካ ህጊ እን ቶኮጝ፣ ሃኦኬና የኣዬ ቋሬንያጝ፣ ኬእን የኦይዴ ህጉጝ ቶርሲ ጊታይ ማሬ ቋሬኔ ዋይሼን ኦይን ህጊ ኤርጊቶጝ ታክሼ እምባ ብቶ።
28
ውር ክየም ማር ውርካ ይሁዳ ኣዬኔ ኬሩዋ እን ኔኒካ ሹኑኩጝ ሺጛ ካማቲ ውርካ ይሁዳያጝ ቻሊኬን ውርካ ይሁዳ ኣዬን፤ ቋርኔን እንካ ሹኑክዻ ማር ዳምቢ እንካ ሹኑኬ ካኣሩጜን።
29
ኣይባዬ ውር ክየም ካኣዬ ውርካ ይሁዳጝ ኬሩዋ እን ኔኒካ ቱዎጙጝ ማቲ ውርካ ይሁዳዬ ጌዬንያጝ ጊያ። ቋርኔንዻ ካኣዬ ቋርኔኑጝ ማርኬ ህጊ እን ቶኬዬኔ፣ ኬመንፐስ ኣኔያ ቋርኔንካ ሸንያጝ ጊያ። ውር ኬና ኣኔን እያይ ጎሺ ኔኒ ማርኬ ኦካ ውሬኔ ሃኬ ታጝካ ባሪዮጝ።