1 እና ጋር ኒንድⶖስተሪትኻ፡ እን ኣሕሉቅ ይል ስኵርኖ ንሰና ይኑዅለ፣ “እክ እስራኤልዱዲ ካዳታትዲ ሌዋውያንዲ እን እክ ብሪውልድ፡ ከናናውያንዲ ሔታውያንዲ፡ ፈረዛውያንዲ ይቡሳውያንዲ፡ ዓሞናውያንዲ ሞኣባውያንዲ፡ ምስሩዲ ኣሞራውያንዲር ሩዅሰትልድ ናሹቲ ሲሪኒ። 2 ናእጝቃቕሲ ናሹትኽር ናቍርድር አድኑዅ፣ እን ሻትክ ፈደንስኻ እን ከው ብሪውዲ ሕበበሪኒዅ፣ እና ዓገብ ኒስ ተርሰው መርሓትዲ ሰየምዲ ግናው። 3 እና ጋርኒስ ዋሶሰናኻ፡ ይሰረንዲ ይባርኖስዲት ቀደድዅን፣ ይሽብ ኣዀሩዲ ይሸኰምዲት ነጨጭዅን፣ ገሪዅ ጐሀዮ ከፍ ይዅን። 4 እንሲን እን ቆል ጃር እስራኤልዱዅሲ ጒኢተው ናውክ ዕምጭ እን ሰልብስትኒልድ ወንተርው ስበትድ ይል እክብስኑዅ። እጝኻ እን ወክት ቍኑዅ ሰደቐት ኵኑⶖዅ ኣኽራሲክ ጐሀዮ ከፍ ይዅን። 5 እን ሰደቐት ኵኑⶖዅድኻ ይሰረን ቀደድሰውዲ ይባርኖስ ቀደድሳዅዲ ይጐሀይኒልድ ጒዅን፣ ይግርፍፍድ ኣብረኰ፡ ይናንትትሲ ይአደራ ጃርሊ በጥሲዅን። 6 ንሰና ዮ ጠለይዅን፡ “ዎ ይአደራ፣ ይናሓራም ይነልድ ኣወይሲ ኣኽዅ፡ ይናዓገብኻ ሰሚል ኣኽራሲክ ገእዩዅ፣ ዎ ይአደራ፡ ይገሺ ኵል ኣኽራሲክ ጉድያ ጒትዅን፣ ገሪዅድክር ስማርዅን። 7 ይን ወክት ይና እክላዅልድ ተርዮ ናን ኣኽራሲክ ዓመጭናኵን እⶖኵንዅን፣ ይና ሓራምልድ ጐዅኻ፡ ንኪ ኣኻዅሰና ኒውክ፣ ይና ሰየምዲ ካዳታትዲ ገፍር ሰየምድ ናንሊ ሰፍድር፡ ሰልብስትነድር፡ ወረርስነድር፡ ታዋረድነድኽር፡ እውስትኑዅን። 8 ዎ ይና አደራ ጃር፡ ይናዕልልሲ በርህድሩዅ፣ እናሓን ናጝር ኰዶ፡ ከለላ ወክት ኵገሽል እጝከሊ አርኖ ይነልድ ከለለው ገጅናር ሙዅርልድ በሪ ፍኖ እና ሻትኪ ብሪል ሰላምድ ደሓነድ መንደርትኖ ኡሩዅ፣ ወላ ድኳ ኣኽን ግራ ገጅና ዓጝቀይሊ ለብነጝር እናሓን ሓዲስ መምብሮ ኡሩዅና። 9 ይን ገኝሺን ኣክኑ፣ ይና ጃር ልጝንሲ ገበርኖ እን ድምነት ኣኾ ህምባዅ ስኻ ሓደስኖ፡ ይሁደዲ ዮርሳሌምዲትል ከለብ እውስትሮና፣ ናው ፊዅት ኡድኖና ሰየም ፋርሱሩውድ ጃብል ብሕልታ ኡውዅና ግራ፡ ይና ጃር ይናገጅናርሊ ባርለና። 10 “ናጛ ዎ ይናአደራ፡ ንድደምቢ ውራ ኰድኖስ ግን፧ ኵትእዳድሲ ስዳውድኑዅ፣ 11 እና ትእዳድ ነስ ኵኣገልገልደንቲ ነበዋት ሰበትድ እውስተው እርጉዅ፣ ነበዋት ጃቢስኖ ‘እን ልውርትኖላ ቱደና ብራ ሮዀስና ኒትክልድ ለጭሕረሪ ኣኽላ፣ እን መንደርተውላ እክ ሸልድ ሽል ኣኽታሲክ ስማሳዅ ግብር ኒትክድ እንታኽትቶ እሲኒዅላ። 12 እጝቃቅ እንተውሲ ክኻንድ ናድ፡ ቍራቍር እወጋ፣ እንኽር ቍራቍር እንተውድ ናእጝቓቕሲ ክኻንድ አድጋ፣ ኣኻ ወክትልክ ብሪልድ ትክያዅ ቍድኖ እንታ ቍርድ ዲማዳይምድ ልውርድ ደኵስና ገረስትኖር መታን ኣኻ ወክትልክ ናዲ እጝከሊሩዅ ተሰማምዕና እሲጋ’ ይኖ ድዊኖና እርግኑዅ። 13 እን ገእያዅና ጨገም እን በዳን ይናክድመቱዅዲ ይና ዓገብናዲሩዅ ግን፣ ኣኾኽር ይና ጃር እን ቀጽዕራዅና ቀጽዓት እን ቀጽዕስትኖ ተገብኡ እርጋዅልድ ሹጓዅ ግን፣ ኒልድ ኣወይሲ ክሪልድ ሹልቁርኖ ርሕድ ከብሲሩዅና። 14 ኰዶኽርማ ኵትእዳድሲ ዳድኖ እና እንጠርሳዅ እሰው እክዲ ተዋሰብኖ ግን፧ ከብታዅዲ ሹልቁራዅዲ እጝግጋዅ ኣኽራሲክ ድድኖማ ኵቀጥብ ይና ዳግ ሓውይጊድ ሻዅ፧ 15 ዎ ጃር እስራኤልዱዅ፣ እንቲ ሻትክ ግን፡ እና ንኪርሰና ኣዀ ህምባዅሰና፣ እን ሹልቁርናኽር ከብቲኖ ህምብናዅን እማ ህምብናዅን፣ ኵጃብሊ ዓምጭኖሰና፡ እና ጋር ንድ ኵጃብሊ ደውያዅ እላ።