1 ሲም ኣርታሕሻስታ ሕክም ወክትድ ባቢሎትልድ ይዲ እንተው ላዅክ ኒኰዅ ሓላቓዲ ናዲ ከተብሰውኻ ነን ግንናው፣ 2 ፊናሃስቍርል ጌርሾም፡ ኣት ኢታማርቍርልድኻ ዳንኤል፡ ዳዊቱቍርልድኻ ሓጡሽ። 3 ንኻ ሽካንያ ፈደንልድ ግን፣ ፈርዖሽቍርልድኻ ዘካርያስ እን ክቱብ ናኣሰሉዅሰናኻ ኒዲ ሊኽዲ ኣⶖኵረጝን ሺብስትኑዅ። 4 ጳሓት-ሞኣብቍርልድኻ፡ ኤልይሆዔናይ ዘራሕያዅራ፣ ኒዲኻ ለጛ ሊኽ ነሰኸው። 5 ሸካንያቍርልድኻ፡ ያሓዚኤልዅራ፡ ኒድኻ ሸዃ ሊኽ ነሰኸው። 6 ዓዲንቍርልድኻ፡ ዔቤድ ዮናታንድዅራ፡ ኒድኻ ኣⶖኵረጝን ነሰኸው። 7 ዔላምድቍርልድኻ፡ ይሻዕያ ዓታልያዅራ፡ ኒድኻ ለጘትረጝን ነሰኸው። 8 ሽፈጥያቍርልድኻ፡ ዛብድያ ሚካኤልድዅራ፡ ኒድኻ ሰዀትረጝን ነሰኸው። 9 ዮኣብቍርልድኻ፡ ዖባድያ የሒኤልድዅራ፡ ኒድኻ ለጛ ሊኽዲ ሽካ ሰዀታ ነሰኸው። 10 ሸሎሚትቍርልድኻ፡ ዮሲፍያዅራ፡ ኒድኻ ሊኽዲ ወልትረጝን ነሰኸው። 11 ቤባይቍርልድኻ፡ ዘካርያስ ቤባይዅራ፡ ኒድኻ ለጘረጝንዲ ሰዀታ ነሰኸው። 12 ዓዝጋድቍርልድኻ፡ ዮሓናን ሃቃያንድዅራ፡ ኒድኻ ሊኽዲ ሽካ ነሰኸው። 13 ኣዶኒቃምቍርልድኻ እን ደምበር ናሱⶖጝ ነን ግን፣ ኤሊፈለጥዲ የዒኤልዲ፡ ሸማዕያዲ ናድኻ ወልትረጝን ነሰኸው። 14 ቡግዋይቍርልድኻ፡ ዑታይዲ ዛቡዲ፡ ናድኻ ለጘትረጝን ነሰኸው። 15 ኣሃዋትል ኣኽራሲክ ኵሪታዅ ወረቢል እክብዅንሎም፡ ኒል ሰዃ ኳራ እስኒዅን፣ እክዲ ካዳታትዲትልኻ ጀረቢዅ ደአም ኒል ሌዊቍርልድ ላዅ ድኳ አርሊ። 16 እንሲን ኣሕሉቕ፡ ኤሊዔዝርዲ፡ ኣሪኤልዲ፡ ሸማዕያዲ፡ ኤልናታንዲ፡ ያሪብዲ፡ ኤልናታንዲ፡ ናታንዲ፡ መሹላምዲ፡ እን ክሱትስኻ ዮያሪብዲ ኤልናታንዲት ሽጝዅንሎም። 17 ናትኻ ካሲፍያ ይስታዅ ኣካንሊ መንደርተው እክድ መርሓይ ኣኻዅሊ ኢዶትል ፈስዅንሎም፣ እን ካሲፍያትል እርገው ኢዶንዲ ኒሻን ቱነቲኒምዲ ልጝን ይናጃሩዅድ ኣገልገልደው ፈስድኖልናኻ፡ እኝሻቕ ድኖልና ድዊድኖሎም እሲውዅን። 18 እን በኪቲ ጃር ናን ይነዲ እርግርነዲ፣ ማሕሊቍርልድ ገርዅድክ ኣምር እርገዅ ግርዋ፣ ሌዊዅራ፡ እስራኤልድዅራ፡ ሸረብያኻ ኒቍርዲ ኒሻንዲ፡ ሽካ ሰዀታ ናቕስኑዅና። 19 ኒሰናኽር ሓሻብያዲ፡ ኒድኻ ይሻዕያ መራሪቍርልድ ኒሻንዲ ናቍርዲኻ ለጘረጝን። 20 ኰዳኻ፡ ዳዊትዲ ኣሕሉቅዲ ሌዋውያንሲ ካቢድኖ የመምነውሎም ኣገልገልደንቲ ልጝን ሻትኵልድ ለጛሊኽዲ ለጘረግን ንቅስኑዅ፣ እና ነን ናውክ ናሱⶖሱⶖድ ከተብስኑዅ። 21 ኣጝኽር ይና አደራ ጃር ጃብል ይናሹቲ ለጥስነ፣ ይነዲ ይናቍርዲሲ፡ ናውክ ይናማልዲሲ፡ ኪዳ ደርብሲ ኒልድ ሺዊኖ ዮ፡ ወረባ ኣሃዋሩዅሊ ሹም ኣወጅዅን። 22 “እን በኪቲ ናኒ ጃርድሪ እን ጀረበውሉ ናልክሊ ግን፣ ኒት ባረውሊ ናልክልኻ ኒቀጥብ ገማኵሎም፣” ይኖ ሲምድ ድውነሉ እርግናኽር ኣኽነውድ፡ ሲምሲ ደርብል ይና ኣፋይትልድ ተከወውና ዓስከርዲ ኣፍሩስዲ ኡሮና ሺውየሉ ስማርዅን። 23 እና ንድ ሰበትድኻ ሹምኑዅጝር ይናጅርሊ ጠለይኑዅጝር፡ ንኻ ዋስዅና። 24 ከዳ ኣወውልድኻ ሽካ ለጛ፡ ሸረብያዲ ሓሻብያዲ፡ ናድኻ ናሻንልድ ሽካ ሲዲዅን። 25 እን ሲምዲ ኒትኰድጚሰውዲ ኒኣሕሊቅዲ፡ እኒል እርገው እስራኤልዱ ናውክዲት ይናጃር ልጝንድ ኡናዅ ወርከዲ ደሀብዲ መዘኖ ኡዅንሎም። 26 ለረጝንዲ ለጛ ስሕ ኪሎ መዘንሰው ወርካዲ፡ ለጘትረጝን ኪሎ መዘንሰው ላሊኽ ወርካሊድ ከደምሰው እራኵዲ፡ ሰዃ ስሕዲ ሰጃሊኽ ኪሎ መዘንሰው ደሀብዲ፣ 27 ሰዀታ ኪሎዲ ሰጃሊኽ ግራምዲ መዘንሰው ለጘረጝን ደሀብልድ ከደምሰው ዋንጨዲ፣ ደሀብልድ ከደምሰው ዋንጫታትዲ፡ እኵል እክውልእ ኣረኻ ህምበውሎም ጫሪ ነሓስልድ ከደምሰው ለጛ ዋንጫዲት መዘኖ ናናንተል ኡዅንሎም። 28 ንሰናኽር ይዅንሎም፡ “እንተዲ እና እራኵዲት ጃርድ ሸተክድኑዅ፣ እን ወርከዲ ደሀብዲኻ እንታ እክላ አደራ ጃርድ እጝከሊሲ ሱክራዅ እውን ግን። 29 ልጝን ሻትክሊ ቱራሲክ ጠንቀቅስነድ ተከወሎም፣ ኒልኻ እን ካዳታትድ የመምሳዅ ኣካንሊ፡ እና ነስ ናትክ ሻትካን እራኵሲ መዘንድኖ ካዳታትዲ ሌዋውያንድ መርሓትዲሲ ኒሰናኽር እዮርሳሌምሊ ኣረርሰው መርሓት እኵዲሲ ላምሰሎም።” 30 ኒልድኻ፡ እን ካዳታትዲ ሌዋውያንዲ ዮርሳሌምትል ይና ጃር ልጝል እድኖሎም፡ ወርከዲ ደሀብዲ፡ እራኵዲት መዘኖ ከለብርኑዅ። 31 እን ሰልፍ አርበድ ንር ሽካ ለጛ ኳሪልኻ ዮርሳሌምት ፈርኖ፡ ወራባ ኣሃዋሩዅል ጕኑዅን፣ ጃር ናን ይነዲ እርግቲ እማ ደርብል ይናኣፋይታ ናንትተልድር ትብቶ ድየውልድር ደአንድቲና። 32 ዮርሳሌምትልር ገእይኑዅን፣ ኒልኽር ሰዃ ኳራ ዲኒዅን። 33 ሰጀር ኳሪልኻ እን ወርከዲ ደሀብዲ እራኵዲ፡ ይናጃር ልጝንሊ ናን መሬሞት ከዳ ኡርያዅረድ መዘንሱዅ፣ ኒድኻ ኣልኣዛር ፊንሃስዅራ እርጉዅ፡ ናድኻ እን ሌዋውያን ዩዛበድ እያሱዅራዲ፡ ኖዓድያ ቢኑእዅራዲ እርግኑዅ። 34 ናውክ ሺብስቱዅር መዘንሱዅር፣ እን ወክት እንድሂሲኻ ናውክ መዘንሰውክ ከተብሱዅ። 35 እን ሰልብስቲነ እርግኖ እንተውኻ ጃር እስራኤልዱዅድ ሓውያዅ ሰደቀት ሱክስኑዅ፣ ሽካ ለጛ ቲምት ናውክ እስራኤልድውድ፡ ሰስረጝንዲ ወልታ መደፍዲ፡ ለጘትረጝንዲ ለጘታ ዓያዊዲ፡ ሽካለጛ ዓምብላዲኻ ሰደቐት ሓራሙዅድ ሱክስኑዅ። ነን ናውክ ጃርድ ሓውየው ሰደቐት እርጉዅ። 36 እን ትእዳድ ሲሙዅ ሰየም ሲሙዲ እንደራ ወረቢ ካርጝሊ እርገው መርሓትዲሲ ኡኑዅሎም፣ ናውኻ እን እክዲ ጃር ልጝንዲት ካቢኒዅ።