\c 7

1 እና ጋርት ደምቢ፡ ሕክም ኣርታሕሻስታሩዅድ ሲም ፋርስሩዅ እዝራ ሰራያዅራ፡ ሰራያ ኣዛርያዅራ፡ ኣዛርያ ሒልቂያዅራ፣ 2 ሒልቂያ ሻሎምዅራ፡ ሻሎም ጻዶቅዅራ፡ ጻዶቅ ኣሒጡብዅራ፣ 3 ኣሒጡብ ኣማርያዅራ፡ ኣማርያ ኣዛርያዅራ፡ ኣዛርያ መርዮትዅራ፣ 4 መርዮት ዘራሕያዅራ፡ ዘራሕያ ዑዚዅራ፡ ዑዚ ቡቂዅራ፣ 5 ቡቂ ኣቢሹዓዅራ፡ ኣቢሹዓ ፊንሃስዅራ፡ ፊንሃስ ኤልዓዛርዅራ፡ ኤልዓዛር ኣሮን ከዳ ኣዋዅራ። 6 እዝራኻ ባቢሎትልድ እንቱዅ። ኒ እን ጃር አደራ እስራኤልዱዅ እዋዅ ፍትሕ ሙሴሩዅሲ ገሪዅድክ አርኣዅ ክንሱራ ፍትሑዅ እርጉዅ። ኒአደራ ጃሩዅ ናን ኒዲ እርጉዅ እማ፣ እን ኒትክ ኒጀረበዅሲ ሲም ኡዅሉ። 7 እስራኤልዱቍርልድር፡ ከዳታተልድር፡ ሌዋውያንልድር፡ ዘመረውልድር፡ መረስ ተከወውዲ፡ ልጝን ሻትክሲ ኣገልገልደውዲ ኣኽኖ ለጘተር አመሪል ሲም ኣርታሕሻስታዲ ኣኽኖ ዮርሳሌምሊ እንትኑዅ። 8 እዝራ ለጘተር አመራ ሲሙዅሊ ኣⶖከር አርቢል ዮርሳሌምትል እንቱዅ። 9 እን በኪቲ ናኒ ጃርትሪ ኒዲ እርግርነዲን፣ ባቢሎትልድ አርባ ሰልፍሪሲ ሰልፍ ኳሪል ጐ፡ እን ኣⶖኰር አርቢል ሰልፍ ኳሪል ዮርሳሌምትል እንቱዅ። 10 እዝራ ፍትሕ ጃሩዅሲ ነበብድነዲ እስነዲሲ፣ እስራኤልድውድኻ ፍርዲ ፍትሕዲት ክንሲሮ ኒሹቲ ደኵሶ እዎ እርጉዅ። 11 ጃር እስራኤልድውድ እዋዅሎም ፍትሕዲ ትእዳዲት አርኡ እርጋዅ ከዳዲ ክንሰረዲ እዝራሲ ሲም ኣርታሕሻስታ እዋዅሉ ዳብዳበራ ኒን ግን፣

12 “ሲም ሰየሙዅ ኣርታሕሻስታትል፣ ጃር ሰሚዅድ ፍትሕሲ ክንሱራ ኣኻዅ ከዳ እዝራሲ፣ ሰላም ኵድ ኣኽኒ፣

13 እክ እስራኤልዱዲ፡ ከዳታትዲ፡ ሌዋውያንዲ፡ ዮርሳሌምትል ፈርዶ ጀረባዅክ ይሕክምሊ ህምባዅ ኒውክ፡ ኵዲ ፈርዲ ኣደዶ ህምባኵን። 14 እን ኵናንሊ ህምባዅ ፍትሕ ኵጃሩዅድ፣ ይሁደዲ ይፖርሳሌምዲር ሰበትድ መርመርቶ ሲምዲ ኒት ኰዲጚሰውዲሲ እኝሻቕስሩዅ። 15 ኒልድ ኣወይስኽር፡ ሲምዲ ኒትኰድጚሰውዲ ኒመስከብ እዮርሳሌምሊ ኣኻዅ ጃር እስራኤልዱዅድ ናምራድድ ኡናዅ ደሀብዲ ወርካዲት ሻኽሮ ፈሪ፣ 16 ኒሰናኽር፡ ናውክ ደገጊት ባቢሎንዱልድ አርደውሎም ወርካዲ ደሀብዲት ናትክ፣ ኰዶኽር፡ እክዲ ከዳታትዲ እን ዮርሳሌምሊ ህምባዅ ልጝን ሻትክ ጃሩዅድ ናምራድድ ኡናዅ ሞባእሲ ናትክ አድሮ ፈሪ። 17 ናንኻ እና ሰላዲነድ እስዲነ ቲምትዲ ደዓውልዲ፡ ዓያዊዲ እን ሰደቐት ቊሲሰንዲ፡ ሰደቐት ናጅእዅዲ፡ ጅቢቶ ኣክረት ምኺርግ እማ፣ እን ዮርሳኬምሊ ህምባዅ ሰደቒሰና ልጝን ጃሩዅኻ ስኵሲ። 18 ናልድ ከብተው ደሀብዲ ወርካዲትኻ ኵዲ ኵሻንዲ ትክያዅ ኣኾ ቋልስታዅሲኵኩም፡ እንታ ጃር ምራድሰና እሰሉ። 19 እን ኣጋልገልድና ልጝን ጃሩዅድ እውስታዅካ እራኵስኽር ዮርሳሌምር ጃር ጃብል እዊ። 20 ኒልድ ኣወይሲ ኵጃሩዅልጝን ሻትክ ኡቶ ጀረብረውሲ ናትክ እንድባ ሲሙዅል አድቶ ገረስራኵ። 21 “ኣን ሲም ኣርታሕሻስታኻ እን እንደራ ወረባ ካርጝሊ ህምበው ናትክ እን ማልሲ ሻከውሲ ኣደድዅን፣ ጃር ሰሚዅድ ፍትሕሲ መሀርሳዅ ከዳ እዝራሲ እኒ ወጝቀረውሲኩም ናትክ ኡቱኖሉ ኣደዶ ህምበኵን። 22 ሰዃስሕዲ ሰጃሊኽ ኪሎ መዘንስሮ ገረሰው ወርካዲ፡ ሽካ ስሕ ኣከውኻ ጀሩጕ፡ ለጛ ስሕ ሊትር ኣከውኻ ሚድ ወይኒሩ፡ ለጛ ስሕ ሊትር ኣከውካ ደድ ዋኻሪውዲ እኒ ጀረብስኰት ሽዋኽር እወሉ። 23 እን ጃር ሰሚዅ ኒኣደዳዅሰና ልጝን ጃር ሰሚዅድ ጠንቀቕስነድ እውስትን፣ ውሪዅ ሕክም ሲሙዅልኽር ኒቆልዕልኽር ቀጥብ ናቕሳዅን። 24 ናትድክ ከዳታትዲ፡ ሌዋውያንዲ፡ ዘመረውዲ፡ ባብሲ ተከወውዲ፡ ልጝን ሻትክሊ ኣገልገልደው ወሪ አሪውሊ ንትል ልጝን ጃሩዅሊ ከደመውሊ ቀረጥ፣ ቀርኮዲ ናን ጉድናዲ ገምሮሎመስተሀለገት አርእሲስናኵንኩም እⶖኵንዅን። 25 እንቲ እዝራ ኵጃርልድ እውስታዅካ ብልሃትሰና፡ እንደራ ወረባ ካርጝሊ ህምበው ናውክ እክሲ ፈረደው፣ እን ፍትሕ ኵጃሩዅሲ አርአውሲ ናትክ ፈረደውዲ ዳኛታትዲ እሲሎም፣ እን ፍትሕሲ አርእገውስኻ ክንሰሎም። 26 ፍትሕ ኵጃሩዅዲ ሲሚዅዲት እሰገውስኻ ክረድ ወሪ ስደትድ ወሪኻ ዕዳ ሰላዲሲ ወሪኻ ንሽወድ ኣሸሻዅድ ፈረድስንሉ። 27 ዮርሳሌምትል ኣረርሳዅ ልጝን ጃሩዅ እና ጋርንድ ከበርዶ ኒስ ሲም ለበኪል ገምዳዅ ይና እክላዅ አደራ ጃር ገውርሳዅ ኣኽኒ፣ 28 ኒሰናኽር ሲምዲ፡ ኒት ኰድጚሰውዲ፡ ሒለቱ ኒመርሓት ጃብል እጝክልሳኽር እሰዅለ ጃር ሓምደ ኒድ ኣኽኒ፣ እን ይአደራ ጃርድሪ ናን ይዲ እርግርነዲን፣ ይዲ ፈርድኖ እስራኤልዱውድ ነበክል አርእስተው ከውስኽር እክብነድ ሒል አርዅን።