\c 6

1 እንሲን ሲም ዳርዮስ፡ እን ባቢሎትል ክቱብ ገሞላ እርግረሪ ልጝን ኣክትበታዅሊ ጀረቢድኖ ኣደዱዅ። 2 ምልክ ሜዶንዱዅሊ ኣረርስረሪ ዕርዲራ ኣሕመታ ይስትሮ ሽጝስትረሪትል ላክታብ አርሱዅ፣ ኒልኻ ክቱብ ንሰናያዅ ከተብሶ እርጉዅ፣ 3 “ኒኣመራ ሰልፍሪትል ሲም ቂሮስ፡ እና ትእዳድ ኒስ ኣደዱዅ፣ እን ዮርሳሌምትል ህብረሪ ልጝን ጃርትሪ፣ እን ሳደቐት ሰደቕሳዅላ ኣካን፡ እን ልጝኒ ከደምስርን፣ ንር ሰረትስናኻ ተባዅ ኣኽኒ። ንርሺርጝ ለጘረጝንዲ ለጛታ ምትር፡ ንርፈያሓትኻ ለገረጝንዲ ለጘታ ምትር ኣኽርን። 4 ሰዃ ጅልዋናኻ በህሊል ክርጝድ፡ ላጅልዋናኻ ካንልድ ከደምስን፣ ናኣራኻኻ ልጝን ሲሙዅልድ ፈደይስን። 5 እን እራኵ ልጝን ጃሩ ደሀብዲ ወርካዲ ነቢክነጻር ልጝን ሻትክ ዮርሳሌምሩዅልድ አዶ ባቢሎንትል ናቕሰውሎምስኽርል፣ ልጝን ሻትክ ዮርሳሌሙዅሊ ናኣክንሊ ወንተርን፡ ልጝን ጃሩዅልኻ ገምድዅሎም። 6 እንሲን ዳርዮስ ንሰና ያዅ፡ “ኤፍራጥ ካርጝሊ መልካይ ድውላቱ ኣኽራኽር ታትናይዲ፡ ሽታር-ቦዛንይዲ፡ እንትጝር እኒል ህምበው ደገጊትል ህምብደናኽር ናጨር ኣኽድናኽርዲ፡ ልጝን ሻትክልድ ሺራ፣ 7 እን ክድመት ሻትክ ልጝን ጃሩዅሲ ከደምስሮ ባረሉይ፣ እን መልካይ ያሁዱዅዲ መርሓት ያሁዱዲ እን ልጝን ጃሩዅሲ ኒኣክንሊ ከደሚኒንሉ። 8 እን መርሓት ያሁዱሲ እሲትኖሎም አስተሃላዅሲኩም፣ እን ልጝን ጃሩዅ ከደምስሮ፡ እን ክድመትር ደው ይጊን፣ እን ከፈልሰው ወረቢ ካርጝልድ ፈው ወርኮትልድ፣ ማል ሲሙልድ እን ከውድ እውስትሮ ኣደድዅን። 9 ጃር ሰሚዅድ ሰደቐት ሓውያዅ ኣኽሮር ጀረብደውሎም፡ ቲምትዲ፡ መደፍዲ፡ ኒሰናኽር ጀሩኵዲ ሽዋዲ፡ ወይኒዲ ደዲ፡ እን ዮርሳሌምትል ህምበው ከዳታት ናው ይነውሲኵኩም ካረምግድኒ ግርግል እውስትንሎም። 10 ኒን ኒኣካዅኻ፣ ጃር ሰሚዅሲ ባህሳዅ ሰደቐት ሱክስድኖ፣ ሲምዲ ኒቍርዲሲኻ ጠለይድኖ ግን። 11 እና ትእዳድ ኒስ ለወታዅ ኣዳምትኻ፡ ኒልጝንልድ ጉንዳይ አዲኒን እማ ተከልኖ ኒል ከርከርዲኒንሉ፣ እና ጋር ንድ ሰበትድኻ ኒልጝን ድግድግ ኣኽሮ ኣደዶ ህምበኵን። 12 እና ትእዳድ ኒስ ፋሕሲሮ ወሪ እን ዮርሳሌምትል ኣረርሳዅ ልጝን ሻትክሲ ፋሕሲሮ ኒናንሲ ጉዳዅ ኣኻዅክ ኣኽን ሲም ወሪ እክ፣ ኒሱⶖ ኒል መንደርትሮ እሰዅ ጅር ድሂስኒት። ኣን ዳርዮስ ኣደድዅን፣ ጠንቀቕስነድ እሲኒንሉ። 13 እንሲን ሲም ዳርዮስ ኣደዳዅሰና ካርጝ ኤፍራጥስሩዅሊ መልካይ ደውለቱዅ እርጋዅ ታትናይዲ፡ ሽታር-ቦዝናይዲ፡ ናጨርዲ እን ክድመትሲ ተውሃትድ ከደምሶ ተመምሮ እሲኒዅ። 14 እማ መርሓት ያሁዱ ነቢራ ሃጌዲ ዘካርያስ ዒዶዅረዲር ነበይነድ ደፍእነድ ከደምነስ ተለይድኑዅ፣ እን ክድመት ልጝን ሻትኵዅኻ ትእዳድ ጃር እስራኤልዱዅዲ ሰየም ፋርስሩ ቂሮስዲ፡ ዳርዮስዲ፡ ኣርታሕሻስታዲ ኡናዅ ትእዳድ ከደምኖ ተመምድኑዅ። 15 እን ልጝኒኻ ወልተር አመራ ሕክም ዳርዮስሩኵድ፣ አርባ ኣዳርዱዅልድ ሲዀር ኳሪል ተመምቲ። 16 እስራኤዱቍርዲ፡ ከዳታትዲ፡ ሌዋውያንዲ ናውክ እን ከብተውዲ ሰልብስተውዲ ኣኽኖ፣ ገውራ ልጝን ጃሩዅሲ ፈርሓትድ በዓልድኑዅሉ። 17 ገውራ ልጝን ጃሩዅድኻ፡ ሊኽ ትምዲ፡ ለጛሊኽ መደፍዲ፡ ሰጃሊኽ ዓያዊዲ፡ እን ሺብ ፈራዕ እስራኤዱሰናኻ ናውክ እስራኤልድውድ ሰደቐት ሓራሙዅድ ስካ ለጛ ዓምብላ ሱክስኑዅ። 18 እን ክታብ ሙሴሩዅሊ ከተብሶ ህምባዅሰናኻ፣ እን ከዳታትር ናፍትሕሰና፡ እን ሌዋውያጝር ናበናሰነክ፣ ዮርሳሌምትል ጃርሲ ኣገልገልድድኖ የመምኑዅሎም። 19 እን ሰልብስትኒልድ ወንተረውኻ፡ እን አርባ ሰልፍሪትል ንርሽካ ሰጃ ኳሪል ፋጅኸስ በዓልድኑዅ። 20 ከዳታትዲ ሌዋውያንድኻ ላኣዳምሰና ኣኽኖ፣ ለጭሕኖ እርግኑዅ እማ፣ ናውክ ለጭሕኑዅ። እን ሰልብሰትኒልድ ወንተርው ናውክ ናሻን ከዳታትዲ ናሹትኽር ፋጅኸድ በረኽኑዅ። 21 እን ሰልብስትኒልድ ወንተረው እስራኤልድቍርዲ፡ እን ጃር እስራኤልዱዅሲ ጀረቢድኖ ሮዀስኒል ሲረው ናውክዲ ቊኑዅ። 22 ጃር ኒላውድ ሲም ኣሶርዱዅሊ እጝከሊ አርኖ ጃር እስራኤልዱዅ ሓመድሳዅሉ ልጝን ሻትክ ሓድሲድ ከደምና ገረስድኖ መታን፡ ናክድመትን ኒድክድ ካቢሮሎም እሲነዲንሎም፣ በዓል ቅጨሪዅሲ ለጘታ ኳራ ፈርሓትድ በዓልድኑዅ።