\c 3 4
1
ኣፋይቲ ኣይሁዱዲ ብንያምሩዲ ሰልብስትኒል ወንተረው ከው አደራ ጃር እስራኤልዱዅድ ልጝን ሻትክ ከደመነትሉ ዋስኖሰና፣
2
ዘሩባቤልዲ ኒኣዳምዲትል ኣሕሉቅ እንትኖ፣ “ይጝር እንተሰና እንታ ጃርሲ ጀረብናኽር ግን፡ እን ኤሳርሓዶን ሲም ኣሲርዱዅ ናራ ናቕሳዅና ወክትልድ ተርሰ፣ ኒድ ሰደቕኑ ግጅንዅን፣ እማ ናን፡ እንተቲ ከደምኖ ጀረብንናዅን” ይኑዅሎም።
3
ዘሩባቤልዲ እያሱዲ፡ እን አሪው እስራኤልዱ አዳምድ ናእሕሉቅ ደአም፡ “ይና ጃርድ ልጝን ሻትክ ከደምትኖ ይነዲ አረሪሳዅኩም ወላ ላጋርድኳ እላ፣ ይን እን ቂሮስ ሲም ፋርስሩዅ ኣደዳዅሰነና ይነቱ አደራ ጃር እስራኤልድዅድ ልጝን ሻትክ ከደምኖሉ ግን” ይኑዅሎም።
4
እንሲን፡ እን ከው ብሪው እክ ይሁደሩሲ ሳዳ ቀበጭድኖ፡ እን ክድመትኻ ከደምስጊን ጒእሲስጝና ተርሲኒዅ።
5
እና ኰድጘስ ፋሕሲድኖኻ ኰድጛ ኰድጘው ጅቢኒዅ፣ ኒንኻ ኒውክ ወክት ቂሮስ ሲም ፋርሱዅልድ ሕክም ዳርዮስ ሲም ፋርስሩዅሊ ኣኽታሲክ ኣኺዅ።
6
ኣሓሽዌሮስ ሰየምሰሰናኻ፣ ሰልፋ ኒሕክሙዅሊ ናውይሁደዲ ዮርሳሌምዲር ኣወይሲ ክቱብ ከሰስኒዅ ከተብኑዅ።
7
ወክት ኣርታሕሻታሩዅድኻ ቢሽላምዲ፡ ሚትሬዳትዲ፡ ጣብኤልዲ፡ እን ከብተው ኒጨርዲ፡ ኣርታሕሻስታ ሲም ፋርስሩዅሊ ከተብኑዅ። ክታበት እን ዳብዳበሪዅኻ ኣራማይስጢሲ ከተብሶ እርጉዅ እማ፣ ጋብ ኣራማይስጢሲ እርጉዅ።
8
መልካይ ደውለቱዅ ረሑምዲ፡ ንከተበንታ ሽምሻይዲ፡ ዮስራሳሌምሊ ሲማርታሕሻስታትል ንሰና ያዅ ዳብዳበራ ከተብኑዅ፣
9
መልካይ ደውለቱዅ ረሑምዲ ሽምሻይ ከተበንታዲ፡ እን ከብተው ናጨርዲ፡ ዲናውያንዲ ኣፋርሳትካውያንዲ፡ ጣርጳላውያንዲ ኣፋርሳውያንዲ፡ ኣርካውያንዲ ባቢሎናንዱዲ፡ ሽሻንካውያንዲ ዴዳውያንዲ፡ ኤልማውያንዲ፡
10
ኒሰናኽር፡ እን በሀርዲ ሒለቱዅዲ ኦሰናፍር ጒዶ ዕርዲራ ሰማርየሪትል ወረባ ኤፍራጥስሩዅ ካርጝሊ መንደርትድኖ እሰውድሎምልድ፡ አሪው እክዲ ግን።
11
እን እኝሻቃዅሉ ዳብዳበራኻ ኒን ግን፡ ሲም ኣርታሕሻስትል፡ እን ወረባ ኤፍራጥስሩዅ ካርጝሊ መንደርተው ኵኣገልገልደንትልድ፣
12
እን ኵልድ ተረገስነው ያሁድ፡ ይነል ዮርሳሌምሊ እንትነት እማ እን ዓመጫንተዲ ርዅሲዲ ዕርዲረት ወንተስኖ ከደምኒል ዋንቲነት፣ ንር ሐጠትስኽር ሓዲስድ ከደምኒልር ንር ሰረትሲ ትክስኒልር ዋንቲነት፡ ሲም አርእስታዅ ኣኺን።
13
ናንኻ እና ዕርዲራ ኒኒ ሓዲስድ ከደምስረን፣ ንርመንደቕኽር ሓዲስድ ነደቕሰን፡ ቀረጽዲ ወሮኮዲ እወግነት እማ፣ እንድባ ሲሙዅ ጐሰት፡ ሲም አርእን።
14
ይን ልጝን ሕኲመቱዅድ ነፍዕስትናኽር ይና ኣክነድ፡ ንርክብር ብነስ ቋልኑ ትምይኖ እጝከልስለና እማ፣ እና ኰድጘስ ሱክስናኵን፣
15
ክታብ ህድጉዅ ኵእክላዅሲ ፈተሺኒን፣ እና ዕርዲራ ኒኒ ዓመጨንታ ኣክረት፡ ሰየምዲ ደገጊዲት ጐትረሪ ኣኽረት፣ እማኒልድክኻ ንርትል ረብሸት እሲነት፡ እን ክታብ ህድጉዅሊ ኣርቶሉኽር አርእቶሉኽር ግን፣ እናንድ ሰበትድኻ እና ዕርዲራ ኒኒ ፋሕይቲ።
16
እና ዕርዲራ ኒኒ ከደምስረን፡ ንርመንደቅኻ ሓደስተን፣ እነደራ ወረባ ካርጝሊ በና እጝግግረት፡ ሲምድ ድውነኵን እⶖኵኑዅ።
17
ሲም ንሰና ዮ እኝሻቍዅ፡ “መልካይ ድውለቱዅ ረሑምዲ፡ ከትባይ ሺምሻይዲ፡ ሰማርያዲ ኤፍራጥስዲር ካርጝሊ መንደርተው ናውክ ናካበንትዲት ሰላም እንተት ኣኽን፣
18
እን እንትን እኝሻቕድናዅለ ዳብዳበራ፡ ይጃብል ተርጀምሶ ነበብሱዅ።
19
እጝር ትእዳድ እዎ መርመራ እስቲዅ፣ እን መርመርና ሰበትድኻ እና ዕርዲራ እማኒልድ ተርዮ ሰየምሊ ዓመጭሩ እርግረሪ፡ ዓመጭዲ ሓራምዲር ኣካን ኣኽረት አርሱዅ።
20
ዮርሳሌምትልኻ እን ካርጝ ወረባ እንደረዱዅሊ እርገው ናውክ ድወልሲ መልከው ሒለቱ ሰየም እርግኑዅ፣ ቀረጽዲ ወርኰዲኻ ናድ እውስቱ እርጉዅ።
21
እማ፡ ይልድ ትእዳድ እውስትራሲክ፡ እን ከው ክድመትሲ ባርድኖ፣ እን ዕርዲራኻ ከደምስግሪን፡ ኣደዳ።
22
እና ጋርኒስ ምል ይግድኒን ጠንቃቅሳ፣ ውሪዅ እን ሰየምሲ ጐታዅ ሙቝላ በጀዅ ፈራዅን፧
23
እን ዳብዳበራ ሲም ኣርታሕሻስታትሪት፡ ረሑምዲ ሽምሻይ ከታበዲ፡ እን ናጨርዲር ጃብል ነበብስረሰና፣ ኣሸሽኖ ዮርሳሌምሊ ያሁድሊ ፈርኑዅ እማ፣ እን ክድመትሲ ደውሲድኖ ቀሰብኑዅሎም።
24
እንሲን፡ እን ዮርሳሌምሊ ህምባዅ ክድመት ልጝን ጃሩዅ፡ እን ሊጘር አመራ ሕክም ዳርዮስሩዅ ሲም ፋርስሩዅሊ ኣኽታሲክ ደውዩዅ፣