\c 3

1 እን ለጘተሪ አርባ ተመምረሰና፣ እስራኤልዱቍር ናዕርዲራታተል ከፍ ይናሰና፣ እን እክ ላአዳምሰና ኣኽኖ ዮርሳሌምሊ እክብስኑዅ። 2 እንሲን እያሱ ዪጻዳቅዅራዲ ኒሻን ከዳታትዲ፡ ዘሩባቤል ሸኣልትኤልዅረዲ ኒሻንዲ፣ እን ፍትሕ ሙሴ ኣዳም ጃሩዅድ ከተብሳዅ፣ ኒዳግሊ ሓውያዅ ሰደቐት ሱኵስድኖ፡ ጒኖ ሰደቒሰና ጃር እስራኤልዱዅ ከደምኑኵ። 3 እን ናላው ሸጝገብድ ህምበው ቆምያትልድ ጒኢ ገሞሎም እርጉዅ እማ፣ እን ሰደቒሰነስ እም እማኒዅ ሰረትሊ ከደምኑኵሉ፡ እን ሰደቒሰኒልኻ ቂርዲ ገርክዲ፡ ሓውያዅ ሰደቐት ጃርድ ሱክስኑዅ። 4 እን ፍትሕ ኣደዳዅሰና በዓል ዳሱዅሲ ከበርድኑዅ፣ እን ግርጋ ላሪትክ ሱክሮ ኣደድሳዅሰና ሰደቐት ሱክስኑዅ፣ 5 ኒደምብኻ፡ እን አርእስታዅ ሓውያዅ ሰደቐትዲ፡ አርቢዅ ሞባእ ሰደቐትዲ፡ እን ሻትካን በዓላት ጃሩሊ ሱክረው ሰደቐትዲ፡ ናሹር ምራድድ ጃርድ እውስታዅ ሞባእዲት ሱክስኑዅ። 6 እን ለጘተር አርበትልድ፡ ጃበራ ግርገ፣ እን ጃርድ ሓውያዅ ሰደቐትሲ ሱክስድኖ ተርሲኒዅ። ልጝን ሻትክ ጃሩዅ ደአም ልሳዕ ሰረትስጊ እርጉዅ። 7 ኒደምቢ፡ ክርጝ ሸበውዲ በነየውዲሲ ሰላዲ ኡኑዅ፣ እን ቂሮስ ሲም ፋርስሩዅ ኣደዳዅሰነሎም ሰላዲ ሲዶናውያንድር ጢሮሳውያንርድ፡ ካን ቄድሮስሩ ሊባኖትልድ በሓርድ ያፎትል ናቕስድኖሎም፣ ቊስታዅዲ ጅእስታዅዲ እዋ። 8 እን ዮርሳሌምትል ህምብረሪ ልጝን ጃሩዅሊ እንትኖ ናሊጘር አመሪል እን ሊጘር አርቢል ዘሩባበል ሸአልትኤልዅረዲ እያሱ ዮጻዳቅዅረዲ፡ እን ከብተው ናሻን ከዳታትዲ ሌዋውያንዲ፡ እን ሰልብስትኒልድ ዮርሳሌምትል እንተው ናድክዲ ኣኽኖ ልጝን ጃሩዅሲ ከደምድኖ ተርሲኒዅ። ሌዋውያንሲ ናዕምር ለጘረጝንልድ ኣወይሲ ኣኸውሲ እን በነይሳዅ ልጝን ጃሩዅሲ ተከውድኖ ሰየምኑዅሎም። 9 እንሲን እያሱ ኒቍርዲ ኒሻንዲ፡ ቃድሚኤልዲ ኒቍርዲ፡ ይሁዳቍርዲ፡ ሔናዳድቍርኻ ናቍርዲ ናሻንዲ ኣኽኖ፣ እን ልጝን ጃሩዅሲ ከደመውሲ ተከውድኖ ላት ኣኽኖ ደውይኑዅ። 10 እን ልጝን ሻትክ ጃሩዅሲ በነየው ሰረት ሰረቱኑ እⶖጒሲክኻ፡ እን ከዳታት ሰረን ከዳታቱዅሲ ሰርኖ መለኸትኻ ሻኽኖ፣ ሌዋውያን ኣሳፍቍርኻ ጭልጭል የው ሻኽኖ፡ እን ስርዕ ዳዊት ሲም እስራኤልዱዅሰና ጃርሲ ሓመድድኖ ደው ይኖ እርጉኑዅ። 11 ሳብነዲ ሓምደዲሲ ጃርድ ንሰና ይኖ ዘመርኑዅ፣ “ኒ በኪት ግን እማ፡ ኒብሕልታኻ እስራኤልድ ዲማ-ዳይምድ ግን፣” ዩኑ ጃርሲ መዝሙርድ ከበርድኑዅሉኽር ሓመድኑዅሉኽር። እን እክኻ ሰረት ልጝን ሻትክ ጃሩዅ ሰረትስነዲን፡ ናደሀይሲ ክብሲነ እልል ዩኑ ጃርሲ ሓመድኑዅ። 12 እን ጃበራ ልጝን ሻትክሲ ቋለው በህሊል ገሪው ከዳታት፣ ሌዋውያንዲ ኣሕሉቅ ናአዳሙዲ፡ እና ሰረት ልጝን ሻትኲዅ ሰረትሱ ቋልና ወክት፣ ናደሀይሲ ክብሲነ ስሪኒዅ፣ አሪው ደአም ፈርሓቲዅ ጨርሕና ዋሲስኑዅ። 13 እን ጨርሓት እኲዅ ሕበበርሰዅ እርገነዲን፣ እን ፈርሕቱዅ እልል ይነስ ስረኒልድ ሲርዶ ገረሳዅ ላዅ ድኳ እርግላ፣ እን ደሀይኻ ሺራዅልድ ዋስስቱ እርጉዅ።