8

¹ እን ግርጋ እንድሂሲ፡ ሲም ኣሓሽዌሮስ ልጝን ሃምንዱዅሲ ሲሚ ኣስቴርሲ እውዅላ፣ ኣስቴር ኒ ንርድ ንርውረኒ ኣኸት ድዊቲሉ እማ፡ ማርዶካይ ሲም ጃብል ትዉዅ። ² ሲምኻ እን ሃማንትልድ ኣዳዅሉ ኒካትምሲ ፍዶ ማርዶካይሲ እውዅሉ፣ ኣስቴርኻ ማርዶካይቲ፡ እን ልጝን ሃምንዱዅ ኣወይሲ ሰየምቲሉ።

³ ኣስቴርኻ ሓዲስድ ሲም ጃብል ጋቢቲ፣ እኪት ሃማን ኣጋጋዊሪዅ ያሁድ ኣወይሲ ኣምርድ እሰዅ ደውይሮር መታን ሺዊቲሉ። ⁴ እንሱን እን ግምቢ ደሀቡዅሲ መደድዅላ፣ ኣስቴርኻ ጕሮ ሲም ጃብል ደውይቲ። ⁵ ንሰናኻ ይቲሉ፣ “ሲም እጝከለን፡ ኒጃብልኻ ዓመል አረን፣ እና ጋር ኒንኻ ኒጃብል ትክያዅ ኣኾ ቋልስተን፣ ኣጝኻ ኒዕል ጃብል እጝከልሳኽር ኣከን፡ ሃማን ሃማዳታዅራ እን ኣጋጋዊራ፡ እን ናትክ ድወል ሲሙሊ ህምበው ያሁድሲ ድሂስሮ የመሞ ከተበው ጀዋባት ለወትስሮ ከተብስውን። ⁶ ይእክሊ ዓመጭ ገሙ ቋሉ ኣዋህበ ሰብር እስያ ገረሳውኽን፧ ይኣዳሙ ድደስ ቋሉኻ ኣዋህበ ገረስየሉ ገረሳዅን፧”

⁷ እንሲን ሲም ኣሓሽዌሮስ ሲሚ ኣስቴርዲ ማርዶካይ ኣይሁዳዊረዲት ንሰና ይዅሎም፡“ እናሓን ሃማን ያሁድሲ ድሂስሮ ሓሰብነዲን፣ ኒልጝንሲ ኣስቴርሲ እዎላ ህምበኵን፣ ኒትኻ፡ መሱኒል ከርከርኑዅሉ። ⁸ እን ሲም ሱⶖድ ከተብሳዅዲ ኒካትምድኻ ከተምሳዅዲ ለወትስሮ ገረስተጋዅ ኣኸውድ፣ እንትንኻ ያሁድሲ ቋላዅድ ትካያዅ ኣኾ ቋልስታዅሲኵኩም ኣሪዅ ኣዋጅ ሱⶖ ሲሙዅድ ከተብድኖ ኒካትምድኻ ከተመሉ።”

⁹ እን ወክት እንድሂሲ፡ኻ ሲዀር አርቢል፡ ንርኻ አርባ ሲዋንትሪ፣ ልጘረጝንዲ ሰኻ ኳረትል፡ እን ካትበን ሲሙ ሸጝስትኑዅ። ናውኻ ትእዳድ ማርዶካይሩዅድ ናውክ ያሁድድ፣ ኒሰናኽር ህንዲትልድ ኢትዮጵያ ኣኽታሲክ፡ ላሊኽዲ ለጘረጝንዲ ለጘተትል አረርሰው ኣማሕደርደውዲ ድወለትሲ መለከውዲ፡ አሪው መርሓትል እኝሻቅሰው ጀዋባት ከተቢሱዅ። እን ጀዋባትኻ እን ደወልድ ላዅድክ ናሹር ጋብዲ ክታበዲሲ፡ ኒሰናኽር ጋብ ኣይሁድዅድ ናክታበዲሲ ተለይድኖ ከተብድኖ እስቲዅ። ¹⁰ ማርዶካይ እን ትእዳድሲ ሲም ኣሓሽዌሮስ ሱⶖድ ከተቦ ካትም ሲሙዅድ ከተምዅሉ/ሓተምዅሉ፣ ኒደምብኻ፡ ሲሙ ፈርድትሲ ጋጝሰው ኣሸሸው ናንድ እኝሻቅዅሉ።

¹¹ ኣዋጅ ሲሙዅኻ፡ ዕርዲራታትሊ መንደርተው ያሁድ እክብስድኖኽር ናሹቲ ክርኒልድ ተከውድኖ ኒሰናኽር፡ ናእኲንዲ ናቍርዲትል ጅርበት ናቅሰውሲ ኒደውለት ኣኻዅዱዅ ኣኽን ዓስከራ ድሂስድኖሎምኽር፣ ኩድኖሎምኽር፡ ደምሰስድሎምኽር፡ ናርድቅስኻ አድኖ ፈቀድንዅሎም። ¹² ላኳረድ፡ ናውክ ድወል ሲም ኣሓሽዌሮስሩዅሊ፡ አርባ ሽካ ለጛትል፡ ንርኻ አርባ ኣዳርትሪትል፡ ሽካ ሰኻ ግርጋትል። ¹³ ያሁድኻ እና ግርጋ ንሂሲ ናኣፋይትል ናተሪት ፈደይድኖ ደለምድኖ ቅዳሕ እን ክቱቡዅ ናውክ እን ድወሊ ትእዳድ እውስትሮ፡ ከው ናድክድ ድውስቲዅ። ¹⁴ እን ልጝን ሕኩመቱ ፈርድትሊ ጨዓንሰው ንሽቕ፣ ሲሙዅ ኣሸሻዅ ትእዳድድ ወለይዳዅድ ፊኑዅ፣ እን ኣዋጅኽር ኣደራሽ ሱሳንዱዅል ድውስቲዅ።

¹⁵ ማርዶካይ ሰመያዊረዲ ጫዕዳዅዲ ልጝን ሕኩመቱዅ ሰረና ሰሮ፣ በሀር ኣክሊል ደሀቡዅ ኒኣኾርሊ እሰ፡ ቃፍፍ እንጣጢዕዅድ ከደምሳዅ ታዊና ሰራዅዲ፡ ጫዕዳዅዲ ሰሮ፣ ሲም ጃብልድ ፊዅ፡ ዕርዲራ ሱሳንትርኻ እልል ይሩ ፈርሕቲ። ¹⁶ ያሁድድ በርህዲ ፈርሓትዲ፡ ደስታዲ ሳቡርዲ ኣኺዅሎም። ¹⁷ ናውክ ድወልዲ ዕርዲረታትዲትል ቆል ሲሙዅዲ ኒትእዳዲ ገእያዅለን ኣካናትሊ ያሁድድ ፈርሓዲ ደስታዲ፡ ቍነዲ ጅእነዲ ግርጋ ኣኺዅሎም። እን ከው ብሪውልድኻ፡ ያሁድሲ ናጓቝትኒልድ ጐዅ፣ ገሪው ናልድ ያሁድ ኣኺኒዅ።