7

¹ ሲም ሃማንዲ እን ኣስቴር ደለምድራዅ ዕዱመትሊ ፈርኑዅ። ² ሊጘር ኳሪልኻ ሚድ ወይኒሩ ጅኡኑ እⶖጒሲክ፣ ሲም ኣስቴርቲ ኰዶ፡ “ዎ ሲሚ ኣስቴር፣ ኵሺዋን ውረኒ ግን፧ እውስትሮኪ ግን፣ እን ወጝቀርዳዅሉኻ ውረኒ ግን፧ ገፍ ይሕኩመቱዅ ድኳ ኣከን እውስትሮኪ/እስቲሮኪ ግን” ይዅላ። ³ እንሲን ሲሚ ኣስቴር ወንተስሮ፡ “ዎ ሲም፣ ኵጃብል ዓመል ኣሮዋነን፡ ትሕትነድ ሱክሳዅ ይውጝቅረስ ከለብርቶለ ትክያዅ ኵምራድ ኣከን፣ ይጅርብ ኣን ኣኺን ይፈራዕ ርሕድ መንደርትና ገረስኖር መታን ግን፣ ⁴ ይዲ ይእክዲ ድዳዲ፡ በራኽነዲ ደምሰስነዲሲ ክስትንዅን፣ ቍራቍርዲ እጝቃቅዲ ገኝሺን ኣኽኖ ክስትናኽር ኣክነን፡ ትምይሪድ ሻኽር ግን፣ ውረድ ንሰና ያዅ ጭጝቀት ሲምሲ ጀረብድነድ ኣቕታዅ ኣኽላ።”

⁵ ሲም ኣሓሽዌሮስ ሲሚ ኣስቴርቲ፡ “እና ጋርኒስ እሲሮ ደይዓዅ ኣውኒ ግን፧ እና አዳምኻ ኣወት ህምበኵን፧” ይዅላ።

⁶ ኣስቴርኻ፡ “ይና ኣባይዲ ክረዲ፡ ፈረዳዅና ደአም እና ሃማን ይስታዅ እኵይ አዳም ግን!” ይቲሉ። እንሲን ሃማን ሲምዲ ሲሚር ጃብዲትል ገሪዅድክ ፈጥፈጡዅ። ⁷ ሲም እን ከፍዮ እርጋዅልድ ቀጠብሶ ጒዅ፣ ሚድ ወይኒሩሲ ባሮኻ ልጝን ሕኲመቱዅሊ እን ካን ኣካንሊ ፈሩዅ። ሃማንኻ ሲም ድሂስሮሉ ኰድጘ ጐት አርእነዲን፣ ሲሚ ኣስቴር ኒርሕሲ ከብሲቶላ ሺዊሮላ ኒል ከብቲዅ። ⁸ ሲም እን ልጝን ሕኩመቱዅ ካን ኣካንልድ ዳስ ዕዱመቱዅሊ ወተረሪት፣ ሃማን እን ኣስተር እርግራዅ ዓራትሊ ለቦ እርጉዅ፣ ሲም “እማ፡ ይልጝንልማ ሲሚት ይጃብል ዓመጭሮላ ጀረቢዅን፧” ዩዅ። እና ቆል ኣብ ሲሙዅልድ ፈሰና፣ ሃማንቲ ኒገሽሲ ኲስንዅሉ። ⁹ ሓርቦና፡ ላዅ እን ስሉባንልድኻ ሲም ጃብል፣ “ሃማን ማርዶካይድ፡ እን ሲምድ ትካያዅ ጋበዅድ ዮ ደለምዳዅሉ ኣⶖኵረጝን ኣመት ኒሺርጝ መሱና እናሓን፣ ልጝን ሃምንዱዅሊ ተከልሶ ህምባኵ፣” ዩዅ። ሲምኻ “ኒት ኒል ከርከረሉ” ዩዅሎም።

¹⁰ እማ፡ ማርዶካይድ ደለማዅ መሱኒል ሓማንቲ ከርከርንዅሉ፣ ኒደምቢ ቀጥብ ሲሙዅ ቀሽቀሹዅ።