6

¹ እን ቂሪ እንድሂቲ ሲም ገኝጃ ገኝጅሮ ገረስላ፣ እማ፡ እን ወክት ኒሕክሙዅድ ከተብሳዅ ህድግ ሱክሮ ኣምበብስሮሉ ኣደዱዅ። ² ኒልኻ፡ መራብሲ ተከወው ዓስከርሲ ኣደደው ሲሙ ለጘክ፣ ቢግታናዲ ተረሽዲ፡ ሲም ኣሓሽዌሮስቲ ኵድኖ ኰድጚነ እርግነት ኒስኻ ማርዶካይ ድወት ከተብሶ እርጉዅ። ³ ሲምኻ፡ “እማ፡ ማርዶካይ ኒስ ኒእስነድ ውራ አርእንዲ ክብርዲ ኡውስዅንንሉ፧” ዮ ወጝቀርዅሎም። እን ኒኣገልገልደንትኻ፡ “ኒድ እስተዅሉ ላዅር እላ” ይኑዅሉ።

⁴ ሲምኻ “ሕዳርሊ ኣውኒ ህምበኵን፧” ዮ ወጝቀሩዅ፣ እና ወክት ኒሲ ሃማን ማርዶካይቲ እን ኒተከላዅ ካኒል ከርከርዶሉ ሲምሲ ጋቢሮ ከደን ገፍድ ኣረርሳዅ ሕዳር ልጝን ሕኲመቱዅሊ ኒገእይኒል እርጉዅ። ⁵ እን ኒኣገልገልደንትኻ፡ “እናሓን፣ ሃማን ሕዳርሊ ድውዮ ህምበኵ” ይኑዅሉ። ሲምኻ “ትዊ የሉ” ይዅሎም።

⁶ ሃማን ትዎሰና ሲምኻ፡ “ሲም ከበርድሮሉ ጀረበዅ ኣዳምድ ውራ እስቲሮሉ አስተሀለኵን፧” ዮ ወጝቀርዅሉ፣ እንሲን ሃማን “ሲም ይልድ ኣወይሲ ከበርዳዅሉ ኣውኒ ህምበኵን” ዮ ኒለበከድ ሓሰቡዅ።

⁷ እማ ሲምድ ንሰና ዮ ወንተስዅሉ፣ “ሲም ከበርድሮሉ ጀረበዅ ኣዳምድ፣ ⁸ ሲም ሰራዅ ሰረና ሕክሙዅዲ፡ ሲም ጨዓንስረሪዲ ኣክሊል ሲሙዅ ኒኣኾር ዳግ እስቲን ፈርዳኽር እንትርንሉ። ⁹ እን ሰረጝዲ ፈርዳዲኻ ገሪዅድክ ከበርው ክብየው ስየም ሲሙልድ ላዅድ ኒናንሊ እውስትን፣ ሲም ከበርድርሉ ጀረበኽ ኣዳምድ ሰስኒንሉ፣ ፈርዳትል ጨዓኖ፡ እን ዕርዲረር አርእስተው ደርፍፈል መርሑኑ፣ ‘ሲም ከበርድሮሉ ጀረበዅ ኣዳምድ ኒን እስቲዅሉ’ ይኒን” ይዅሉ።

¹⁰ ሲምኻ ሃምንቲ፡ “ደአም፡ ኣሻሻዅድ ፈሪ እማ፣ እን ሰረነዲ ፈርዳዲት ኣድሮ፡ እን መራብ ሲሙዅሊ ከፍያዅ ማርዶካይድ እን እንቲ ይራዅድሰና እሲሉ፣ እን እንቲ ጋብረውልድ ላሪ ከብቲግሪን” ዮ ኣደድዅሉ።

¹¹ ሃማንኻ እን ሰረናዲ ፈርዳዲት ኣዶ ማርዶካይቲ ሰስዅሉ፣ እን አርእስተው ደርፍፈል መርሑ፣ “ሲም ከበርድሮሉ ጀረበዅ ኣዳምድ ኒን እስቲዅሉ” ዩ ኒጃብል ኣወጁ እርጉዅ።

¹² ኒድ ደምቢ ማርዶካይ መራብ ሲሙዅሊ ወንተሩዅ፣ ሃማንኻ ጓሃዮ ኒኣኾርሲ ኵቶ ኣሸሻዅ ኒልጝንሊ ፈሩዅ። ¹³ እን ገእያዅሲሉኻ ኒእዂና ዘረሽዲ እን ኒት እጝከለውዲት ድዊዅሎም፣ እን ኒት ኰድጚሰውዲ ኒእዂና ዘረሽዲኻ፡ “ኒጃብል ለብቶ ተርስረዅሩሉ ማርዶካይ ኣይሁዳዊራ ኣከን፣ በታተን ገበብቶሉ ገረሰላ፣ ሸክ እጝገት ድቶግን” ይኑዅሉ። ¹⁴ ኒዲ ጋብስⶖኑ እⶖጒሲክ፣ ስሉባን ሲሙ እንትኖ ሃማንቲ እን ኣስቴር ደለምድራዅ ዕዱምትሊ ኣድኖሉ ፈርኑዅ።