5

¹ ኣኾኻ፡ ሲኾር ኳሪል ኣስቴር ሰረና ንርሕክሙዅሲ ሰርዶ ኣደራሽ ሲሙዅ ጃብ ጃብል ህምባዅ ልጝን ሕኲመቱዅ ነበክሊ ህምባዅ ሕዳርሊ ቱሮ ደውይቲ። ሲምኻ ኒልጝኑዅ መራብ ካርጝሊ፡ ቂጦራ ኒሕክሙዅሊ ከፍ ዮ እርጉዅ። ² ሲሚ ኣስቴርቲ እን ሕዳርሊ ቋሎሰነክላ ኒጃብል ዓመል አርቲ፣ ኒናንሊ ሸኾሉ እርጋዅ ግምቢ ደሀቡዅሲ መደድዅላ፣ ኣስተርኻ ስኵት ይሮ እን ቁምባ ግብሪዅሲ ተመድቲ። ³ ሲምኻ፡ “ዎ ሲሚ ኣስቴር፣ ውራ መታን እንትርዅን፧ ይልድ ጀረብራዅሉኻ ውራኒ ግን፧ ገፍ ይሕክመቱዅ ኣከን ድኳ እውስትሮኪ ግን” ይዅላ።

⁴ ኣስቴርኻ፡ “ሲምሲ ፈርሕዳዅሉ ኣከን፣ ንኪ ደለምዶሉ ህምባዅ ዕዱመትሊ ሃማንዲ እንትን” ይቲ። ⁵ ሲምኻ፡ “ኣስቴር ይራዅሲ እሲኖ መታን፡ ወለይዳዅድ ሃማንቲ ሽጘሉ” ዩዅ። እማ፡ ሲምዲ ሃማንዲ፡ እን ኣስቴር ደለምድራዅ ዕዱመትሊ ፈርኑዅ። ⁶ ሚድ ወይኒሩ ጅኡኑ እⶖጒሲክ ሲም ሊጘር ወክት ኣስቴርቲ፣ “እስከ እንቲ ጀረብርዳዅ ውራኒ ግን፧ እውስትሮኪ ግን፣ ኒሰናኽር እን እንቲ ወጝቐርዳዅ ውራኒ ግን፧ በና ይሕክሙዅ ድኳ ኣከን እውስትሮኪ ግን” ይዅላ።

⁷ ኣስቴርኻ ንሰና ይሮ ወንተስቲ፣ “ይሺዋንዲ ይውጝቅረዲ ኒን ግን፣ ⁸ ሲምሊ ዓመል አርን፣ እን ኣን ጀረባዅ እውስትሮለ ይሺዋንስኽር እሲሮለ ሲምሲ ፈርሕዳዅሉ ኣከን፣ ሲምዲ ሃማንዲ፡ አመሪ ናድ ደለምዳዅሉ ዕዱመትሊ ኣረርሲኒን። ኒድምኻ አን ውጝቅራ ሲሙዅድ ውንትሳ እውያ ግን።” ⁹ ሃማን እን ግርጋ እንድሂሲ ባህዮሉ፣ ኒለበካኻ ፈርሖ ፊዅ፣ ደአም፡ ሃማን ማርዶካይቲ መራብ ሲሚዅሊ ጕጊ ኒልድር ስቆት ኣወት ይጊ ከፍ ዮ ቋሎሰነክሉ፣ ኒቀጥብ ማርዶካይትል ሓውዩዅ። ¹⁰ ሃማን ደአም ኒኣኾርሲ ደፍእዱዅ፣ ኒልጝንሊ ትዎሰነክኻ፡ እኝሻቆ ኒት እጝከለውዲ ኒእዅና ዘረሽዲት ናቅስዅሎም። ¹¹ ሃማንኻ ቅድና ኒርድቍዅዲ ብጅኽ ኒቍሩዅዲ፣ ሲም ኒድክድ ኣዋህበ ኣሕሉቅ ኣወይሲ በሀርደትሉ፡ ከድመት ሲሙልኽር ክብሰትሉ ድዊዅሎም። ¹² ሃማንኻ ኰዶ ንሰና ዩዅ፡ “ሲሚ ኣስቴር እን ደለምድራዅ ዕዱመትሊ ሲምዲ ይንኻ አሪዅ ሽጝላ፣ አመርኽር ሲምዲ ዓደምሮል ህምበቲ፣ ¹³ ኒን ኒውክ ደአም፡ ምርዶካይ እን ኣይሁዳዊራ መራብ ሲሙዅሊ ከፍዮ ቋልዲስክሉ ባህ የለለንክ” ይዅሎም።

¹⁴ ኒእዂና ዘረሽዲ እን ኒት እጝከልውዲ ናውክ “ኒሺርጝ ኣⶖኳ ኣመት ኣካዅ ከረከርሲሰና ተከሊ እማ ማርዶካይ ከርከርስሮሉ ክሰራ ሲምድ ድዊሉ፣ ኒደምብኻ ፈርሕሮ ሲምዲ ዕዱመትሊ ትዊ” ይንዅሉ። እና ኰድጛ ሃምንቲ ኣቅትራሲክ ፈርሕድዅሉ፣ ከርከርሲሰነስኽር