4

¹ ማርዶካይ እን እስተዅ ጋር ኒትክሲ አርኦሰና፣ ኒሰርጝሲ ቀደዶ፡ ሰረና ሓዘኑዅ ሰሩዅ፣ ኒኣኾርሊኻ ቁሻ እሲዅ፣ ኒደሀይስ ክብሰ ዋዕዩ እን ዕርዲረር ነበክሊ ፊዅ። ² ሰረና ሓዘኑዅ ሰራዅ ቱሮ አስተሀለጋዅሉ ኣኸውድ፣ መራብ ሲሙዅሊ ኣኻታሲክ ካያ ገእዩዅ። ³ ኣዋጅ ሲሙዅ ገእያ ኣካን ኒውክ፣ ያሁዳ ነበክሊ ተባዅ ሓዘን ኣኺዅ፣ ሺምኑዅ፡ ስሪኒዅ፡ ዋዕኽር ይኑዅ፣ ገሪውር ታዊና ሓዘኑዅ ሰርኖ ብተዲ ባርህዲትል በጥ ይኑዅ።

⁴ ገኝሺን ኣስቴርዱዲ ስሉባትዲኻ እንትኖ ኒስ ድዊኒዅላ፣ እንሲን እን ሲሚ ገሪዅድክ ጓሀይቲ፡ ማርዶካይቲ እን ታዊና ሓዘኑዅሲ ኒዳግልድ አድኖ ይሮ፡ ሰረን ፈስቲሉ፣ ኒ ደአም፡ ከለብርለሎም። ⁵ እንሲን ኣስቴር ሃታክቲ ሽጝቲሉ፣ ኒ ላዅ እን ስሉባንልድ፡ ሲም ኣገልገድድኖላ እዋዅላ እርጉዅ፣ ማርዶካይቲ ውራ ጨገም ገእየትሉኽር ውራማታን ኒሰና ኣኸትኽር አርእሮ መታን እኝሻቅቲሉ። ⁶ ሃታክኻ ማርዶካይትል፡ እን መራብ ሲሙዅ ጃብል እርጋዅ ሕዳርሊ ፊዅ። ⁷ ማርዶካይ እን ገእያዅሉ ጋር ኒትክዲ፣ ኒሰናኽር ሃማን እክ ያሁዱሲ ድሂስሮር መታን መዝገብ ሲሙዅሊ ቱስሮር መታን ቆል ትዋዅዲ ሺብ እሰላዲሪውዲት ከብቲጊ ድዊዅሉ። ⁸ እን ያሁድሲ ድሂስድኖ ሱሳንትል እውስታዅ እን ትእዳዱዅ ወረቀትሲ ኣስቴርድ ቋሊስሮላኽር እን ፈሀምድሮላኽር ኡዅሉ፣ ሲምሊኻ ቱሮ ንር እክ መታን ብሕልታ ወጝውርቶኽር ሺዊቶኽር ተብዶ ድዊሮላ መታን ሺዊዅሉ። ⁹ ሃታክኻ ወንተሮ፡ እን ማርዲካይ ድወዅሲሉ ኒትክ ኣስቴርድ ድዊዅላ። ¹⁰ እንሲን ኣስቴር ማርዶካይድ ንሰና ዮ ድዊሮሉ ኣደድቲሉ፣ ¹¹ “ግርዋ ኣኺን እዅና ሽጝስትግሪ ሲምሊ ጅው ትዋዅክ ክርዶ ፍትሕ ዋነት፣ ናውክ ከድመት ሲሙዲ እክ ድወል ሲሙዲ አርእኑዅ፣ እን ሲም ኒግምቢ ደሀቡዅሲ መደዳዅሉ ካያ ግን እን ደአናዅ፣ ኣጝኻ ሲምሊ ትውያ ሽጝስትጊ፣ ኒኒ ይሲኾር ኳራ ግን፣” ይቲሉ።

¹² ጋብ ኣስቴርዱሲ ማርዶካይድ ድዊኒዅሉ። ¹³ ማርዶካይኻ ኣስቴርቲ ወንተስኖ ንሰና ይድኖላ ሺዊዅሎም፣ “እንቲ ልጝን ሲሙዅሊ ኵኣክነድ ካያ እክ ያሁድሩ ድዱኑ እንቲ ከብትራኽር ተኪጊንኪ፣ ¹⁴ እና ወክት ንድ እንቲ ትም ይረን፣ ያሁድድ ከበነዲ በሪ-ፍነዲ አሪ ኣካንልድ እንትሮሎም ግን፣ ኵዲ ኵዅርድ ልጝን ደአም ድትኖ ግን፣ ኒሰናኽር እን ሲሚ ኣኽቶ በቕዕራኽር እና ወክት ኒሲ ኣከን ኣዊ አርእዅን፧”

¹⁵ እንሲን ኣስቴር ማርዶካይቲ ንሰና ይኖ ወንተስድኖሎ ሺዊቲሎም፣ ¹⁶ “ፈሪ እማ ሱሳትል ህምበው ያሁድሲ እክቢሎም እማ፣ ሰዃ ኳረድ ቂርዲ ገርክዲ ቂግድንኽር ጅእግድንኽር ይድ ሹመለ፣ አንኻ ይገኝሺንዲ ኒሰና እስያ ግን፣ እንሲን ፍትሕሰና ኣከገጝር፣ ሲምሊ ትውያ ግን፣ ድደጝር ድድን።” ¹⁷ ማርዶካይኻ እን ኣሲቴር ይራዅድሰነሉ እሲሮ ጐ ፈሩዅ፣ እን ኣስቴር ይራዅድሰናኻ ኒሰና እሲዅ።