3

¹ እና ጋር ደምቢ ሲም ኣሓሽዌሮስ ኣጋጋዊራ ሃመዳታዅራ ሃማንቲ ክብሲዅሉ፣ እን አሪው ስየምልድር ክብያዅ ስልጠት ኡነድር ከበርድዅሉ። ² ሲም ኒሰበትድ ኒን ኣኽሮ ኣደዶ እርግነዲን፣ መራብ ሲሙዅሊ ህምበው ስየም ናውክ ፍግም ይኖ ሰገድኖሉ እማ ናክብርሲ ቋሊስድኖሉ እርጉዅ፣ ማርዶካይ ደአም ለቦ ፍግም ዮ ሰገድለሉ፣ ክብርኽር ቋሊስለሉ። ³ እማ፡ መራብ ሲሙዅሊ ህምበው ኣገልገልደንቲ ሲሙ ማርዶካይቲ፡ “ውራ መታን ትእዳድ ሲሙዅሲ ኣደድሰላ” ይኖ ወጝቀርንዅሉ። ⁴ ግርገትልድ ግርጋ ሺባ ኒኰድጘስ ቀየሪስድኖሉ ጋቡኑሉ እርግኑዅ፣ ኒ ደአም ዋስሮሎም እጝከላ፣ ኣይኡዳዊራ ኣኸውድ ኣን ሃማንድ ፍግም የሉ ኣስተሀለለ ኒይነድ እን ኣካዅሲ ድዊዅሎም፣ ኒድ ደምቢ ትዕቢት ማርዶካይሩዅሲ ኣዋኽርደ ሰብር እሲቶ ገረስራዅን፧ ዩኑ ፈከርስነድ፡ እን ጋርሲ ሃማንድ ድዊኒዅሉ። ⁵ ሃማንኻ ማርዶካይ ፍግም ዮ ሰገድገትሉ ቋሎሰና፣ ቀጥብድ እንታኽቱዅ። ⁶ እክ ማርዶካይሩውድ ድዊነሰነሉኻ፡ ኒናንሲ ማርዶካይሊ ካያ መደድሮ ቃበብሳዅ ኣኾ ቋልስትዅሉ እማ፣ ሃምን እክ ማርዶካይሩሲ፡ እን ሕክም ኣሓሽዌሮስሩዅሊ እርገው ናውክ ያሁድሲ ድሂስሮሎም ጀረቢዅ።

⁷ ሲም ኣሓሽዌሮስ ሰየምሶ ኒሽካ ለጛ ኣመሪል ኒሳን ይስታዅ አርባ ሰልፉዅሊ፣ ግርገዲ አርበዲት ፈለይድኖ ጲር ይስታዅ ቅሻ ሃማን ዋኑ ማልኑዅ፣ እን ቅሻኽር ኣዳር ይስታዅ ሽካ ለጘር አርቢል ለቡዅ።

⁸ ኒደምብኻ ሃማን ሲም ኣሓሽዌሮስቲ ንሰና ይዅሉ፡ “ቆምያት ነበክል ኵሕክሙ ደገጊተል ፋሕ ይኖ መንደርተው ላእክ ህምባኵ፣ እና እክ አሪው እክልድ ናቱር ክኒ ህምባዅዲሎምዲ ፍትሕ ሲሙሲ ኣደድሰገውዲ ግናው፣ ደአም፡ እና እክሲ ትም ይና ናፍዓላ። ⁹ እና ጋር ሲምሲ ፈርሕዳዅ ኣከንን፣ ናው ድድኖ ኣዋጅ ፍን፣ ኣንኽር እና ጋርሲ ከደመው ከውድ ኣካዅ ሰዃ ሊኽዲ አርብያ ስሕ ኪሎ መዘንሰው ወርኮ ደምብተር ሲሙዅሊ ቱስያ ግን፣” ይዅሉ።

¹⁰ እንሲን ሲም ካትምሲ ኒናንልድ ፍዶ ሃማን፡ ሃማዳታዅራ እን ኣጋጋዊረድ፡ ኣባይ ያሁድዅድ ኡዅሉ። ¹¹ ሲምኻ ሃምንቲ፡ “ትክያዅ ኣኾ ቋልስታዅሲካ እሲቶ፡ እን እክዲ ወርኮዲ ኵድ እውስቶ ህምባኵ” ይዅሉ።

¹² ኒደምብኻ፡ እን ሰልፋ አርበትል ሲኾር ኳረትል ካትበን ሲሙ ሽጝስትኑዅ፣ ናውኽር ትእዳድ ሃማንዱዅ ኒትክሲኻ ስየም ሲሙዲ ደውለትሊ ህምበው መልከትዲ፡ እሕሉቅ እኵዲ ድወልዲትል ላኵዲክ ናሹር ጋብዲ ናሹር ቆላትዲ፡ ናሺር ዓዳትዲሰና፡ እን እክድኽር ናሹር ጋብድ ከተብኑዅ፣ ኒን ከተብሳዅር ኒላውድ ሱⶖ ሲም ኣሓሽዌሮስድ ኣኵ፣ ሓተምሳዅር ኒሹር ካትምድ ግን። ¹³ ላኳረድ ሽካ ለጛ አርበድ፡ ንርኻ አርባ ኣዳርትሪ፣ ናውክ ያሁድሲ፡ ኣባጥሕዲ በህሊንዲት፡ ቆልዕዲ እኲንዲት፣ ድሂስድኖሎምኽር ኲድኖሎምኽር፡ እርግግነሰናኽር እሲድኖሎም፡ ናርድቕስኻ ሰልብድኖሎም፡ ጀዋባትሲ ኣሻሸው ኣፍሩስድ ናውክ ድወል ሲሙሊ ፈስኑዅሎም። ¹⁴ እና ግርገድ ደለምኖ ዲድኖ መታን፡ ናውክ ድወሊ ትእዳድ እውስትሮ፡ ናውክ ቆምያት ቋልድኖ ገረሰናዅ ኣካናትሊ ተከንድድኖሉ ኣወጅሱዅ። ¹⁵ እን ፈርድቱኻ ትእዳድ ሲሙዅድ ወለይዳኽጅውድ ፊኑዅ፣ እን ትእዳድኻ ኣዳራሽ ሱሳዱዅሊ እውስቱዅ፣ ሲምዲ ሃማንድኻ ከፍ ይኖ ጅኡኑ እርግኑዅ፣ እን ዕርዲራ ሱሳንትርኻ በኻኽርቲ።