2

¹ ኒድ ደምቢ፡ ቀጥብ ሲም ኣሓሽዌሮስሩዅ ቀሽቀሸሰና፣ ዋሽትንቲ ንሪ እስረዅዲ እን ኒፈረድሮላ ፈራዅዲት ሓሰቡዅ። ² እንሲን እን ኣገልገልዱኑ እርገው ገኝሺን ሲሙኻ ንሰና ያዅ ሓሳብ ሱክስኑዅ፣ “ሲምድ ሽኻርዱ ደናግል ጀረቢኒንሉ፣ ³ እን ሲም ናትክ ሽኻርዱ እጝቃቕ ደናግልሲ ኣደራሽ ሱሳንዱዅሊ ልጝን እኲንዱዅሊ ናቅስድኖ መታን፣ ሲም ኒምልክ ዓቀይሊ ህምበው ደገጊተል ከው ስልጠቱ ሰየምን፣ ናውኻ ናን ሄጋይ ስሉብ ገኝጂና ሲሙዅ ተከወንታ እኲናዅ ዓጝቀይ ኣኺኒን፣ ደለምድድኖኻ ጀረብዳዅሲክለን እውስናት። ⁴ ኒደምብኻ፡ ሲምሲ ፈርሕድረሪ ድንግሊ ዋሽቲር ኣካንሊ ሰየምስርን ይንዅሉ።” እና ኰድጛ ኒን ሲምሲ ፈርሕድዅሉ እማ፡ ኒሰና እሲዅ።

“” ‘’

⁵ እን ወክት እንድድ ላዅ ማርዶካይ ይስታዅ ኣይሁዳዊራ ግርዋኣደራሽ ሱሳንዱዅሊ መንደርቱ እርጉዅ፣ ኒ፡ ያኢርዱዅራ፡ ሽምዒዅራ፡ ቂስዅራ፡ ፈራዕ ብንያምሩዅልድ እርጉኽ። ⁶ ኒ፡ ባቢሎንዱዅ ሲም ነቡክዳነጸር ሰልበውሎም ይሁደር ሲም ኢኮንያዲ ዮርሳሌምልድ ሰልብስትነድ አስተውልድ ናልድ ላዅ እርጉዅ። ⁷ ማርዶካይሲ ላሪ ሃዳሳ ይስትረሪ ኒኣግድቍራ እርግቲሉ፣ እኽርዲ ገንዲ እርግገውድላ፡ ለገዳዅላ ኒ እርግዅ፣ ኣስቴር ይስትሮ ሽጝስትረሪ እና አይኢ ንር ብጥረትዲ ንርፊዅትዲ ኣኺን ንርሽኻርዲ ገሪዅድክ ምልምሊ እርግቲ። ንርኽርዲ ንርጘናዲ፡ ክርነሪት ማርዶካይ ኒቍረርሰና ሃበ ኣድዅላ።

⁸ ኣዋጅ ሲሙዅ ፋ ወክትድ፣ ገሪው እጝቃቅ ደናግል ኣደራሽ ሱሳንዱዅሊ አስትኖ እን ተከወንታ ሄጋይድ እውስትኑዅ፣ ኣስቴርኽር ልጝን ሕኩመቱዅሊ አስትሮ፡ ተከውንታ እጝቃቅዅ ሄጋይድ እውስትቲ። ⁹ እን አይእኻ ባህሲቲሉ፡ ኒገሽልኻ ዓመል ኣርቲ፣ ንኻ ደለምቶ ጀረብዳዅለዲ አስትሀላዅላ ነብረዲ ኒድኒድ ኡዅላ፣ ልጝን ሲሙዅልድኻ እውስተውላ ለጘታ ገኝሺን እሽሻዅድ እውዅላ። ንርዲ ንርጝኝሺንዲትኻ እን ልጝን እኲናዅልድ እንትክያዅ ልጝንሊ ቱስዅለን።

¹⁰ ማርዶካይ ድወግ ዮ ኣደዶላ እርግነዲን፡ ኣስቴር ንርእክዲ ንርፈራዕዲት ድዊላ። ¹¹ ማርድካይኻ ኣስቴር ዳሕና ዋንቲረትኽር ውራኻ እስነትላኽር አርእሮ መታን፣ ግርጊ ሺባ እጝቃቅ ተከውስናዅ ሕዳር ገቢል ኣወት ሱቆት ወንተተሩ እርጉዅ።

¹² ላአይኢ ሲም ኣሔሽዌሮስትል ቱቶ ንር ተሪ ገእየሰና፡ ዓዳት እኲናዅድሰና ሽካ ለጛ አርባ እስረሪት፦ ኒሰና ግርጋት ናው ደለመናዅ ድⶖስታዅ፣ ወልታ አርባ ደድ ከርበርውድ፡ ወልታ አርበኻ ናትናቱር ታሚተው ቂረድ ሸመትስነዲ ኒሰናኽር ናትንቱር ገሽሊ ሸመትሰውዲሲ፡ እኲንድ ደለም ድኖ ናድ ጀረብደውለን አርውድኽር ሸመትሰናዅ፣ ኒድ ደምቢ እን እጝቃቅ ተርተሪሲ ሲም ኣሔሽዌሮስትል ትወነት እስታዅ። ¹³ ሲምሊ ናው ትዋናዅ እና ደርብ ኒድ ግን፣ እን እጝቂ እን እርግራዅ ኣካንልድ ልጝን ሕኲመቱዅሊ ቱራ ወክትድ፣ ሰርቶሉ ጀረብርዳዅ ሰረና እውስቱላ እርጉዅ። ¹⁴ ንሪ ኵንጝ ፈርዱ እርግቲ፡ ብራ ክሰሪትኻ፣ እን ሊጘር ልጝን እኲናዅሊ፡ ሻዕሽጋዝ ስሉብ ሲሙዅ ተከወንታ እኵን ሸሉዅሊ፣ ፈርዱ እርግቲ። ንርድ ፈርሓገን ኒሰናኽር ንር ሱⶖድ ሽጛገና ወንተርዶ ሲምሊ ትወላ።

¹⁵ ማርዶካይ ኒቍረርሰና ሃበ ለገደሪላ ኒእኽርዳን ኣቢሻቍራ ኣስቴር ሲምሊ ቱቶ ንር ተሪ ገእየሰና፣ እን እኲናዅ ልጝንሲ ተከዋዅድ መርሓይ ኣኻዅ ሄጋይ ድወዅሲላ ግራ፣ አሪዅ ላዅር ወጝቀርድላ። ኣስቴር እን ቋልውድላ ናድካ ጃብል ዓመል አርቲ። ¹⁶ ኣስቴርትኻ ሽከር አርቢል፡ ንርኻ አርባ ጤቤትሪ፣ ለጘተር አመራ ኒሕክሙዅሊ ሲም ኣሓሽዌሮስትል፡ ልጝን ሲሙዅሊ አድንዅላ። ¹⁷ ሲምኻ ኣስቴር ናድካ እጝቃቅልድ ኪዳዅድ እጝከልዅላ፣ ኒዕል ጃብልኻ ናድካ እጝቃቀልድ ኪዳዅድ ሳቡርዲ እጝከሊዲ አርቲ፣ ንር ኣኾርልኽር ኣክሊል ሕክሙዅ እሲዅላ፣ ዋሽቲር ኣካንልኻ ሰየምዅላ። ¹⁸ እንሲን ሲም ኒስየምዲ ኒግኝሺንዲሲ በሀር ምድ እሲዅልም፣ እን በዓልኻ ናውክ ደገጊተል ከበርድድኖል ኣወጁዅ፣ ሲሙዅ እውንድኽር እውን እዉዅ። ¹⁹ እን ደናግል ሊጘር ወክትድ እክብስኖ ዋንቱኑ፣ ማርዲካይ መራብ ሲሙዅሊ ከፍዮ እርጉዅ። ²⁰ ኣስቴር ደአም እን ማርዶካይ ድወዅድሰነላ፡ ኣውድሪ ኣክረትኽር ኣወትልድ እንትረትኽር ትብስሮ እርግቲ፣ ኒስ እስረዅኻ፡ ማርዶካይ ለገዱላ እስሩ እርግራዅድሰና ኒውክ፣ ናጝር ኒኰድጛስ ተለይሩ እርግረውድ ግን።

²¹ እን ግርጋት እንደስኻ፡ ማርዶካይ መራብ ሲሙዅሊ ከፍዮ ዋኑ፣ መራብሲ ተከወውልድ ኣሕሉቅ ዓስከሩ፡ ቢግታንዲ ቴረሽንዲ፡ ሲምሊ ቀጠብስኑዅ እማ፣ ጒኖ ኵድኖሉ የመምኖ እርግኑዅ። ²² እና ኰድጛ ማርዶካይሊ ገእይነዲን፣ ሲሚ ኣስቴርድ ድዊዅላ/ወድሕድዅላ፣ ንርኻ ኒስ ማርዶካይትልድ አርደትሉ ወድሕድሮ ድዊቲሉ። ²³ እን ጋር መርመርሶሰና እምን ኣኾ ኣርሱዅ፣ ለጘርክኻ መሱኒል ከርከርስኑዅ፣ ኒን ኒውክ ሲም ጃብል ክታብ ህድጉዅሊ ከተብሱዅ።