9

¹ ኣዳር ይስቶ ሽጝስታዅ ሽካ ሊጘር አርቢል ሽካ ሲኻ ኳሪል፣ ትእዳድ ሲሙዅድ ፈዅ ኣዋጅ ኣካ ግርጋ እርጉዅ። እና ግርገድ ኣፋይቲ ያሁድሩ ናኣወይሲ ክብየነድ ሳዳ እሲነ እርጉኑዅ፣ ደአም፡ እን ጋር ገለበድሶ ያሁድ ናኣፋይቲ ኣወይሲ ዓውትኑዅ። ² ናውክ ድወል ኣሃሽዌሮስሩሊ ህምበው ያሁድ፡ እን በዳን እሲድኖሎም ጀረቡኑ እርግነውሊ ናንሲ መደድኖ፣ ዕርዲራታተል እክብስኑዅ፡ ናጓቍ ናውክ እክሊ ለቦ እርጉዅ እማ፣ አዳም ናጃብል ደው ይሮ ገረስላ። ³ ጓቍ ማርዶካይሩዅ ናአወይሲ ለቦ እርግነዲን፣ ናውክ ስየም እን ደወሉዲ መኳንንቲዲ፡ መርሐት ናውክዲ እን ክድመት ሲሙዅሲ ከደመውዲ፡ ያሁድሲ ካቢኒዅ። ⁴ ማርዶካይ ልጝን ሕኩመቱዅሊ አርእስታዅ ኣኺዅ፣ ኒህድግኽር ናውክ ድወሊ ዋስስቱዅ፡ ኒሒልር ኰዱ ፈሩዅ። ⁵ እማ ያሑድ ናኣፋይትስ ሰፍድ ጠዓምቡኑ ኵኑዅሎም፣ ድሂስንዅሎ፡ እን እንጠረውሎም አወይሲ ናው ጀረቢነዅድሰና ሃቢኒዅ።

⁶ ኣደራሽ ሱሳንዱዅሊ ያሁድ ኣⶖኳ ሊኽ አዳም ኵኑዅሎምር ድሂስንዅሎምር። ⁷ ጳርሻንዲ ዳታንዲ፡ ደልፎንዲ ኣስጳታዲ፡ ⁸ ጳራታንዲ ኣዳልያንዲ፡ ኣሪዳታዲ፡ ⁹ ጳርማሽታዲ ኣሪሳይዲ፡ ኣሪዳይዲ ዋይዛታዲ፡ ¹⁰ ነስ ኣፋይቲ ያሁድሩ ኣኸው ሃማን ሃመዳታዅርድ ቍርሲ ኵኑዅሎም፡ ናው ሽካ ቍራቝር እርግኑዅ። እን ሰልብስተውሊ ደአም ናናንሲ ገምድኒ።

¹² ሲምኻ ሲሚ ኣስቴርቲ፡ “ያሁድ ኣደራሽ ሱሳንዱዅሊ ኣⶖኳ ሊኽ አዳምዲ ሃማንዱቍርዲት ኵኑዅሎምር ድሂስኑዅሎምኽር፣ እን ከብተው ድወል ሲሙሊ ደአም ውራ እሲነው ኣኽድና፧ ናንኻ ውራኒ ግን ኵሺዋን፧ እውስትሮኪ ግን፡ ውራኒ ግንኻ ኵጅርብ፧ እስቲሮልኪ ግን፣” ይዅላ።

¹¹ እን ግርጋ እንዲሲ፡ እን ኣደራሽ ሱሳንዱዅሊ ክረውድ ሺብ ሲምድ ድውስቲዅ። ¹³ ኣስቴርኻ፡ “ሲምሲ ፈርሕዳዅ ኣከን፣ ሱሳንትል መንደርተው ያሁድ እና ንኪሩዅ ኣዋጅሲ ኣመርኽር ድምድኖሉ ኵፍቃድ ኣኽን፣ እን ሽካ ሃማንድቍር ቍራቍር ካኒል ከርከርሲኒን” ይቲሉ። ¹⁴ ሲምኻ ኒን ኣኽሮ ኣደዱዅ፣ ሱሳንትል ኣዋጅ ድውስቲዅ፡ እን ሽካ ሃማንድቍርስኻ ከርከርንዅሎም። ¹⁵ ሱሳንትል መንደርተው ያሁድ ኣዳር ይስታዅ አርቢል ሽካ ሰጃር ኳሪል ላት እክብስኖ እንትኑዅ፣ ሱሳንትልኻ ሰዃ ሊኽ አዳም ኵኑዅ፣ እን ሰልብስተውሊ ደአም ናናንሲ ገምድኒ።

¹⁶ እን ድወል ሲሙሊ መንደርተው አሪው ያሁድኻ እክብስኖ ናርሕሲ ተከውንዅላ እማ፣ ናኣፋይትል ፊዅኑዅ። እን እንጠውሎምልድኻ ለጘትረጝንዲ ኣⶖኳ አዳም ኵኑዅ። ናናንትትሲ ደአም፡ እን ሰልብስተውሊ ገምድኒ። ¹⁷ ኒን ኒ ኣኻዅኻ ኣዳር ይስታዅ አርቢል ሽካ ሲዀር ኳሪል እርጉዅ፣ ሽካ ሰጃ ኳረትል ፊዅኑዅ፡ እን ግርገትኻ ፈርሓትዲ ደስተዲር ግርጋ እሲነ እርግኑዅ።

¹⁸ እን ሱሳንትል እርገው ያሁድ ደአም፣ እን አርባ እንድሂትል ሽካ ሰዃ ከርዲ ሽካ ሰጃ ኳረዲት ኒል እክብስኑዅ። ሽካ ኣⶖኳ ኳረትኻ ፊዅኑዅ፣ ንርቲ ግርጋ ጅእትሪዲ ፈርሓትሪዲ እሲኒዅላ። ¹⁹ እማ፡ እን ደገጊተል መንደርተው ያሁድ፡ አርባ ኣዳርትሪ ሽካ ሰጀሪ ግርገት ጅእድሪዲ ፈርሓትሪዲ፡ ናሹር ናሹ እውን እውስተና ግርጋ እሲነ በዓልደናዅላ ኒልድ ጐዅ ግን። ²⁰ ማርዶካይኻ እና ጋርኒስ ከተቦ ናልክ ድወል ሲም ኣሓሽዌሮስሩሊ፣ ሺራዅዲ ተኻትዲትል ህምበው ናልክ ያሁዲትል ጀዋባት ፈሱዅ። ²¹ እን እኝሻቃዅሉኻ አርባ ኣዳሩዅሊ ሽካ ሰጃ ኳረዲሩዅሊኽር ሽካ ኣⶖኳ ኳረዲሩዅልኽር ኣመራ ሺባ በዓልድድኖለን ኣደድዅሎም። ²² እን ያሁድ ናፋይትልድ ፊዅና ግርጋት፣ እና አርባ ንሂሲ ናጨናቅስና ፈርሓትሊ፡ ናሓዘን ትክያዅ ግርጊል ለወትሳዅሉ፡ እን ግርጋት እንደስ ግርጋት ጅኡዲ ፈርሓትሩዲ እሲድኖለ፣ ናሹር ናሹትልኻ እውን እኝሻቅድኖ፣ ጭጉማንድኻ እውን ኡድኖ ድውስቲዅሎም። ²³ እማ ያሁድ፡ እን ማርዶካይ ከተባዅሲሎም እሲድኖኽር፡ እን ተርሲነዅ በዓልሲ ከበርድድኖኽር ተዋፈግኑዅ።

²⁴ ሃማን ሃመዳታዅራ እን ኣጋጋዊራ፡ ናድካ ኣባይ ኣይሁዱድዅ፡ ያሁድሲ ድሂስሮሎም ዮ ጐርሑዅሎም፣ ኒዀርስክ ድሂስሮሎም ዮ ቅሻ ገምድዅሎም። ²⁵ ኒን ሲም ጃብል እንተሰናኻ፣ ኒ፡ ጃዋብድ እሰ እን ሃማን ያሁድሊ ጐርሓዅሎም ሙቝላ ጓርሓት ኒኣኾርሊ ወንተርኒ፡ ኒዲ ኒቍርዲትኻ ጉንዳይሊ ከርከርሲኒን፣ ዮ ኣደዱዅ። ²⁶ እማ እና ግርጋት ነስ፣ እን ሱⶖ ጱር ይስታዅሰና “ጱሪም” ይኖ ሽጝኑዅለን። እና ዳብዳበ ኒል ከተብሳዅ ኒውክ፡ እን ቋልናዅዲ እን ገእያዅሎም ጋር ኒውክዲት፣ ²⁷ እን ያሁድኻ ናሹትኽር ናፈደንድር ኒውክ ናል ጨግዕስታዅዲሲ፡ እና ለጛ ግርጋት ነስ፣ እን ከተብሶ ህምባዅሰና፡ አመራ ሺባ ካረምግኒ በዓልድድኖ ከለብርኑዅሉ። ²⁸ እና ግርጋት ነን ኒልክ ወለዶታትዲ ጅንስዲትል፡ ደወልዲ ዕርዲራታትዲትል፡ እልብርስሮኽር በዓልስሮኽር፣ እና ግርጋት ጱሪምሩ ነን ያሁድ ነበክል ናበዓልስና ከብቲሮ ኣኽላ፡ ናእልብርሰናኽር ኰዶ ናፈደንልድ ወላ ድድሮ ኣኽላ።

²⁹ ሲሚ ኣስቴር ኣቢሓይልንድቍራዲ ማርዶካይ ያሁዳዊራዲ፣ እን ጱሪም ሰበትድ ጋብረሪ ሊጘሪ ዳብዳበራ ናሒልድክ ተብድኖላ ይኖ ከተብኑዅ። ³⁰ እን ዳብዳበታትሲ ናልከል ያሁድሊ፣ እን ሊኽዲ ለጘረጝንዲ ለጛታ ድወል ሲም ኣሓሽዌሩስሩሊ፡ ጋብ ሰሙዅዲ እምነቱዅዲሲ እሰ፣ እኝሻቃኽለን፡ ³¹ እና ግርጋት ጱሪምሩ፡ እን ማርዲካይ ያሁዳዊራዲ ሲሚ ኣስቲርዲ ይናዅሰና፣ እን የመምሳዅ ወክትሊ ኣኽራሲክ ተብድኖ፣ እን ናሹሽኽር ናፈደንድር ሹምዲ መህልልዲሲ የማምንዅሰና ተብድኖ ዮ ግን። ³² ኣዋጅ ኣስቴርዱዅ ጱሪም ሰበትድ ፈዅ ኰድጛስ ተብዱዅ፣ ኒንኻ ክታብሊ ከተብሱዅ።