\c 1 9

1 አርጤክስስ ሜዶንዱዅድ እዅራ ዳርዮስ፡ ሲም ባቢሎንዱዅ፡ ሰየምሶ ኒአመራ ሰልፋዅሊ፣ 2 እን አመራ ሰልፉዅ ኒሲመርዅሊ፡ ኣን ዳኒኤል፡ እን ኣክትበት ሻትካነልድ፡ እን ነቢ ኤርምያስድ እስተ ድውስተዅ ጃር ቆልድ፡ ኢየሩሳሌም ሀገግሮ ለጘትረጝን አመራ ዲቶ ኣክረት ፈሀምዅን። 3 ንድኻ፡ ዒዶራ ሰሮ፡ ይኣዀርሊ ባርህ ነስነሶ፡ ጠሎትዲ ሹምዲ ምህልለዲሲ፡ ይገሺ ይአደራ ጃርሊ ወንተስዅን። 4 ኣን ይኸ፡ ይአደራ ጃርሊ ንሰና ዮ ጠለይዅንኽር ተነስሕዅንኽር፣

“ዎ አደራ፣ እን ኵት እጝከለውካዲ ኵትእዳድሲ ተከወውዲሲ ናድክድ ኵቆል መእኰቱዅሲ ተከውራኽር፡ በሀርዲ ጒስትራኽርዲ፣

5 ይን ሓርም እስኒዅን፣ ዓገብንዅንኽር፣ ኰዶ ምቝልዲ ዓመጨንትዲ ኣኽንዅን፣ ኵትእዳድዲ ኵፍቲሕዲትልድኻ ገለድንዅን። 6 ይና ሰየምዲ መርሓትዲ እክልዲ እን ብሪል መንድርተው እክዲ፡ ኵስⶖድ ጋበው ኵንሽቕ ነበዋትሲ ዋስኒሎም።

7 “ዎ አደራ፣ እንቲ ጫድቕ ግን፣ ይን ደአም ኵድ እምንሰው ይና ኣክና ብነድ፡ እን እንቲ ይነት ዳሕስረና ህምብራዅ በለድ ኒልክሊ፡ እክ ያሁዱዱ ኢየሩሳሌምሊ መንደርተውዲ፡ ናውክ እክ እስራኤልዱ ሽራዅዲ ተኸትዲትል ህምበውዲ ግርጋ ኒስ ስማርና ኵትኖ ህምብነኵን። 8 ዎ አደራ፣ ይና ሰየምዲ መርሓትዲ እክልዲ ዓገብናኽርካ ኣኽነውድ፡ ስማርና ኵትኖ ህምብነኵን። 9 ይን ዓመጭናኽርሉ ድኳ ኣክነን፣ ይና አደራ ጃር፡ ብሕል የንተዲ ራሓመንተዲ ግን። 10 ይና አደራ ጃርድ አደድስኒሉ፣ እን ኒንሽቕ ነበዋትድ እሰ እዋዅና ፍቲሕስኽር ተከውኒ፣ 11 ናውክ እስራኤልዱ ኵድ አደድስና ናብነድ፡ ኵፍቲሕሲ ዳድኑዅ፡ ኒልድኽር ገለድኑዅ።

“ኵት ዓገብናኽር ኣኽነውድ፡ እን ንሽቃ ጃሩዅ ሙሴር ፍቲሕሊ ከተብሳዅ እሸነዲ ሸርነዲ ይናዳግ ገምዅ።

12 ይነል ድዳ በሀርኮት እስነድ፡ እን ይነዲ ይነት ሓከመውዲር አወይሲ ድውስተዅ ቆልሲ ተመምድርዅሉ፣ ሰማ ዓጝቀይሊ፡ ኢዮሩሳሌምሊ እስተዅሰና ኒዀርስክ እስተ አልላ።

13 እን ፍቲሕ ሙሴርዅሊ ከተብሶ ህምባዅሰና፡ እና ድዳ ኒውክ ይነል ገእዩዅ፣ ደአም፡ ይና ሓራምድ ወንተርነድር ኵእምንሲ ተለይነድር ይና አደራ ጃርልድ ራሕመት ሺዊኒ፣ 14 ይና አደራ ጃር፡ ኒ ወራት ኒድክድ ጫድቕ ግን፣ ጃር ይነል ድዳ እስኒልድ ፊዅላ፣ ይንኽር ኒድ አደድስኒሉ።

15 “ናጝር፡ እን ኵእክሲ ምስር ብሪልድ ኵናን ሒለትዅድ ፍድራኽርዲ ንኪ ቂር ኣኽራሲክ ኵስⶖ አርእስተት ሃብረኽርዲ፡ ዎ ይና አደራ ጃር፣ ይን ሓራም እስኒዅ፣ ኵትኽር ዓገብንዅን። 16 ዎ አደራ፣ እን እማና እስረዅ ወራት ጨዳቐትዅሰና፡ እን ኵዕርዲራ ኢዮሩሳሌምትልድ፡ እን ጊራ ሻትክ ኵዅልድ ኵቀጥብሲ ወንተሲ፣ ይና ሓራምዲ ይና እክላ ሓራምዲር ሰበትድ፡ ኢዮሩሳሌምዲ ኵእክዲ፡ እን ንር ላው ሸጝገብል ህምበውድ እⶖቋሲሰና ኣኽኑዅ።

17 “ናጝር፡ ዎ ይና ጃር፣ ኵገጝጂኒዅ ጠሎትዲ ሺዋንዲት ዋሲ። ዎ አደራ፣ ከስⶖ መታን ይሮ ኵገሺ እን ሀገጋዅ ኵልጝን ሻትክሊ ወንተሲ። 18 ዎ ይና ጃር፣ ኵⶖቍወስ ሉምስረ ዋሲ፣ ኵዕልልሲ ብርሲ እማ፡ በረስና እን ዕርዲራ ኵስⶖድ ሽጝስትራዅዱዅሲ ቋሊ። ይን ኵጃብል መህለልስናዅ ይና ሸታከት መታን ኣኽጊ፡ እን ዓደድ እጝጋዅ ኵራሕመት መታን ግን። 19 ዎ አደራ፣ ሸኑሪ! ዎ አደራ፣ ብሕል ዪ! ዎ አደራ፡ ዋሲ! እስኽርእ፣ ኵእክዲ ኵዕርዲረዲ፡ ኵስⶖድ ሽጝስተው ኣኽነውድ፡ ዎ አደራ፡ ኵስⶖ መታን ይሮ አደግግ። 20 ኣን ይኸ፡ ጋቡዅር ጠለዩኽር፡ ይሓራምዲ ይእክ እስራኤልዱ ሓራምዲት ተናዘዙኽር፡ እን ሻትክ ጊራ ኒዅ ሰበትድ ይአደራ ጃርሲ ሹዉዅር፣ 21 ጠለዩ እⶖጕሲኻ፡ እን ሰልፍድ ራእይሲ ቋሎሉ እርጋዅ ግርዋ ገብሬል፡ እን ኵርⶔሪዅ ሰደቐት ስኵራ ወክትሊ ዋዉ እⶖጕሲ ይል እንቱዅ። 22 ንኻ፡ ነዋ ዮ ፈሀምድዅለ፣ “ዎ ዳኒኤል፣ ናን ኣን እንቶ ህምባዅ፡ ፈሀምነዲ አስተብሀልድነዲ እውየካ መታን ግን። 23 ጠሎት ተርስረሰና፡ ኵጠሎት ወንተርዅካ፡ ኣንኻ እንቲ ገሪዅ እጝከልስራኽር ኣኽርነዲን፡ ኒስ ድውየካ እንቶ ህምባዅ። በጋ፡ እና ቆሊ ለበካ ገምዲ፣ እን ራእይትኽር አስተብሀልዲሉ።

24 “ዓመጭሲ ደውሲቶ፡ ሓርምሲ ሺሽድቶ፡ ዓገብሲ ብሕል ይቶ፡ ዲመር ጨዳቐት ነቕስቶ፡ እን ራእይዲ ትንቢትዲት ሓተምቶሎም፡ እን ገሪዅ ሻትክ ኣኻዅሲ ሸመቶሉ፡ ኵእክዲ እን ኵዕርዲራ ሻትክዲሲ ለጘትረጝን አመራ የመምሶ ህምበኵ። 25 “ኒስ አርእኽር አስተብሀልድኽር፣ ኢየሩሳሌም ሓደስትቶኽር ገበርስቶኽር ቆል ፈንትልድ፡ እን ሓክም መሲሕ እንተራ ወክትሊ ኣኽታሲክ፡ ለጘታ ኡናርዲ ወልትረጝንዲ ለጛ ኡናርዲ ደኵሮ ግን። ንሪ፡ ንር ደርፍፍዲ ንር ከለብዲ ሓዲስድ ገበርስሮ ግን፣ ኒን ኣካዅ ጅርበት ወክትሊ ግን። 26 ወልትረጝንዲ ለጛ ኡናር ደምብኻ መሲሕ ኵውስትሮ ግን፣ ላርኽር ከብቶሮሉ ኣኽላ። እን ኒደምቢ እንተራዅ ሐክማይኻ፡ እን ዕርዲረዲ ልጝን ሻትክዲት ድሂስሮሎም ግን። እን ደⶖጎባ ኵሪሰና ኣኾ እንትሮ ግን፣ እን እኝሽኽር ደⶖጎባ ኣኽታሲክ ተለለይሮ ግን፣ እን ድዳኽር የመምሳዅ ግን። 27 ኒ፡ ገሪውዲ ላ ኡናርድ መእኰት ቱሮ ግን፣ እን ገፍ ኡናሩዅሊ ሰደቐት በርኺዅዲ ሰደቐት ነብሪዅዲት ገበብሮ ግን። እን የመምሳዅ ፍርድ ኒአወይሲ ገምራሲክ፡ እን ልጝን ሻትክሊ ድዳ ነቕሳዅ ረዀስና እሲሮ ግን።