1
ሲም ቤልሻጽር ሰየምሶ ኒሲዀር አመሪል፡ ኣን ዳኒኤል፡ እን ሰልፍ ቋላዅ ራእይ ደምቢ አሪዅ ራእይ ቋልዅ።
2
ራእይሲኻ፡ እን በለድ ኤላምሊ ህምብረሪ ዕርዲራ ሱሳንትል ይሹት ቋልዅን፣ ራእይሲ ወረባ ኡላይ ገባ እርጕዅን፣
3
ይዕልልሲ በርሰ መርኪስዅን፡ እነሓን ለጛ ጊክክ ሻዅ መደፍ ወረባ ሸሊ ደውዮ ህምባዅሲ ቋልዅን፣ ኒጊክክ ሸረው እርጕዅ፣ እን ጊኽ ላ እን ኣሪዅ ጊኽልድ ሺርየኵ፣ ኒ፡ ለገዳዅ ደምን ግን።
4
እን መደፍ ኳሪ-ለብ ኣኽራሲ፡ ስሐ ኣኽራሲ፡ ግብለት ኣኽራሲ ኒጊክክድ ጣሓሳዅሲ ቋልዅን። ላ ኣራዊት ድኳ ዋርዲትሮሉ ገረስላ፣ ኒናንል ደአንድሮ ገረሳዅር እርግላ። ኒ፡ ኒጀረበዅስክ እሲዅ፣ ኰዶ በሀር ኣኹዅ።
5
ንድ ሰበትድ ኣትዋየንዱ እⶖጕሲ፡ ስድፈትድ ኒዕልል ነበክሊ ጊኽ ሺራዅ ሻዅ ዓምብላ፡ ብረስ ዳድጊ፡ ብራ ኒትክድ ደኵ ኳሪ-ለብ ገፍልድ እንቱዅ፣
6
እን ለጛ ጊክክ ሻዅ መደፍ ወረባ ሸሊ ደውዮ ቋላዅሊ ሀበብሲ እንቱዅ፣ ገሪ ሓርቕርቖትድር ገጋዕይዅሉ፣
7
ሰቡሉኽር ለጛ ጊክክ ኒውሲ ከሩዅር፡ ሓርቕርቖትድ እን መደፍሲ ጎቱሉ ቋልዅን። እን መደፍ ኒዲ ለመለም ይሮ ሒል እርግለሉ፣ እን ዓምብላኻ ብሪላ ለብዶ ረገሽዅሉ፣ እን መደፍሲ ኒናንልድ ኣጝገፍድሮሉ ገረሳዅ እርግላ።
8
እን ዓምብላ በሀር ኣኹዅ፣ ሒል ኰዶሰና ደአም፡ እን ኒጊኽ በሀር ከርቲዅ፣ ኒኣካንልኻ ሰጃ ወላውል ሰሚውሊ ግልጭየው፡ ሰጃ ጊክክ በህሊል በኰሉዅ።
9
እን ጊክክልድ ላዅልድ ጊናይ ጊኽ በኰሉዅ፣ ኒ፡ ግብለት ኣኽታሲ፡ ብሪ-ክስጛ ኣኽታሲ፡ እን ብራ ትክያዅሊ ኣኽታሲ፡ ደቕብድ በኰሉዅ።
10
ደሽ ዓስተሩሊ ገእይራሲ ለገዱዅ፣ እን ደሽ ሽጝግሩዉልድር ከለለውሲ ብሪል ለብዱዅ፣ ረገሽዅሎምኽር።
11
እን ደሽ ዓስተሩውድ ሓለቓዲ እርዊትራሲክ ኒሹት ክብ ሲዅ፣ እን ግርግል ስኵራዅ ሰደቐት ክብያዅዱዅሲ አዱዅ፣ እን ኒልጝን ሻትክስኽር ረዀስዱዅ።
12
ዕምጭድ ሰበትድ፡ እን ደሽዲ እን ግርግል ስኵራዅ ሰደቐትዲ ኒድ ደኵስቶ እውስቱዅ፣ እን ኒ እሳዅ ኒው ጠፍሕዅሉ፣ እምንኽር ብሪል ማልስትቲ።
13
እንሲን እን ሻትካነልድ ላዅ ጋቡ እⶖጕሲክ ዋስዅን፣ ላዅ አሪዅ ሻትክኻ እን ጋቡ እርጋዅሲ ንሰና ይዅሉ፣ “እን ግርጕዅ ሰደቐትዲ እን ድደድ ምስምሳ ኣኻዅ ዕምጭዲ፡ ልኵክ ዓጝቀይል ረገሽትድኖ ደኵስቶ እውስተው ልጝን ሻትክዲ ደሽዲር ሰበትድ ድውስተዅ ራእይ ኒ ተመማዅ አውንኒ?”