\c 1 7

1 እን ሰልፋ አመራ ቤልሻጽር ሲም ባቢሎንዱዅሊ፡ ዳኒኤል ኒገኝጅጝሊ ዋኑⶖጕሲ ነበኺ ነበኽሪዅ፣ ራእይኽር ቋሉዅ፣ እን ኒ ነበኽረዅ ነበኺር ኣዀርስኽር ከተብዅሉ። 2 ዳኒኤል ንሰና ይዅ፣ “ሰጃ ወላውል ሰሚው እን በሓር በሀርሲ ደወሹኑሉ እⶖጕሲ ቂር ራእይሲ ቋልዅን፣ 3 እን በሓርልድኻ እኺርኺርሲ ተከገው ሰጃ ኣራዊት በህሊል ፍኑዅ።

4 “እን ሰልፉዅ ገመና ተከኵ፣ ንስሪሪው ካንፍፍ ኰዶ እርግዅሉ፣ ኒካንፍፍ ምኵርዳሲክኻ መርኪስዅንሉ፣ ኣድምሰና ለጛ ልኵድ ደውይሮ ብሪልድ ክብ ዩዅ፣ ለባ ኣዳምሩዅር እውስትዅሉ።

5 “እነሓን፣ እን ሊጘር ኣራዊትኻ ድቢራ ተከኵ፣ ኒ፡ ኒስምጥድ ጒዅ፣ ኰዶ ሰዃ ናሽሽ ሰጠቱ ኒአብሊ፡ ኒእርኩኵ ዓጝቀይሊ እርጕዅ። ኒኻ፡ ‘ጒ እማ፣ ብታሲክ ስኻ ቊ!’ ይስቱዅ።

6 “ኒድ ደምቢ፡ መኸልትዅን፣ ኒጃብል ይባ ተካዅ አሪዅ ኣራዊት እርጕዅ፣ ኒየውሊ ካንፍፍ ጀከለውሲ ተከው ሰጃ ካንፍፍ እርጕዅሉ፣ እና ኣራዊት ሰጃ ኣዀር ሻኵ፣ ሓከምሮኽር ስልጠት እውስትዅሉ።

7 “ኒድ ደምቢ፡ ቂር ራእይ ቋልዅን፣ ይጃብል ጒኢሳዅዲ በኻኽዳዅዲ ገሪዅ ሒለቱዅ ኣኻዅዲ ኣራዊት እርጕዅ፣ ኒ፡ በህሊል እርኩኵ ሸኺው እርጕዅሉ፣ ገርጀጀክ ቍ እርጕዅ፡ እን ከብተውስኻ ኒልኩኵድ ረገሹሎም እርጕዅ። ኒ፡ እን ኒጃብ እርገው ኣራውት ናድከልድ ኒቱሩዅ ኣኻዅ ግን፣ ሽካ ጊክክር እርግዅሉ።

8 “ኣን እን ጊክክ ሰበት ኣትዋየንዱ እⶖጕሲ፡ ይጃብል ናነበክልድ አሪዅ ላ ጊኽ ግናይ ፊዅ፣ እን ጊክክ ሰልፉልድኻ ሰዃ ጊኽ ምኵርኑዅ፣ እና ጊኽ ዕልል ኣዳምሩ ተከው ዕልልዲ ብድዐሲ ጋባዅ አብዲ እርጕዅሉ።

9 “ኣን መርኪሶሰና፡

“እን ቂጦታት ናኣካንሊ ገሙዅ፣ ግርጋት እማኒውድዅዱዅ ኒቂጦሪል ከፍ ይዅ፣ ኒሰረን እኻኺሰና ጫዕተው፡ ሽብክ ኒኣዀሩኻ ጕጥንሰና ጫዕተው እርጕዅ፣ ኒቂጦራ ለኺሰና ሀልሀልያዅ፡ ኒስረገሊዅ ከፍርኻ ፈገጭገጭያዅ ግኢሰና ግን።

10 ኵራ ለኺዃ ኒጃብልድ ፈ ኵሪቱ እርጕዅ፣ ሲሕ፡ ሲሕ ዶል ኣከው አገልገልዱኑሉ እርግኑዅ፣ ሽካ ሲሕ፡ ሽካ ሲሕ ዶል ኣከውኻ ኒገሸል ደው ይኖ እርግኑዅ። እን ፍርዲ ተርዩዅ፣ ኣክትበትኽር ብስቱዅ።

11 “እንሲን ኣን፡ እን ጊኽ ብደዐሲ ጋቡ እርገው ቆላት ሰበትድ፡ መርኪስነስ ተለለይድዅን፣ እን ኣራዊት ኵውስትራሲክር ኒገሮብ ሃርተትሶ ለኺል ማልስትራሲክር መርኪስነስ ባርሊ። 12 እን አሪው ኣራዊትኽር ናስልጠት ናልድ አስቶ እርጕዅ፣ ደአም ከለላ ወክትድ ፊዅትድ መንደርትድኖ ወክት እውስትዅሎም። 13 “እን ቂር ቋላዅ ራእይሲ፡ ኣዳሚንድዅራ ተካዅ ብኳን ሰሚውዲ እንተሩ እⶖጕሲ ቋልዅን፣ እን ግርጋት እማኒውዱዅዱዅሊኻ እንቱዅ፣ ኒጃብልኽር ስኵስኑዅሉ። 14 ኒ፡ ስልጠትዲ ክብርዲ ሒል በሀርዲ እውስትዅሉ፣ ጋብ ናት-ናቱሩ ጋበው ከውዲ ቆምያትዲ ገባይልዲ ሰገድንዅሉ፣ ኒሕክም ዲማ መንደርታዅ ግን፣ ኒሲመርኽር ኒዀርስክ ድደጋዅ ግን። 15 “ኣን ዳኒኤል ይመንፈስ ረበሽቱዅ፣ እን ኣን ቋላዅ ራእይኽር ገሪዅ ሳደድዅለ። 16 እን ኒል ደውዮ ህምበውልድ ላዅሊ ስኵሮ፡ እምንዱዅ ውሪናር እና ነን ናድካዅ ውረኒ ኣከት ወጝቀርዅንሉ።

“ኒኻ ወንተስዅለ፣ እና ጋራት ነዱዅ ውሪናርስኽር ድዊዅለ፣

17 ‘እና ሰጃር ኣራዊት በህሊል ብሪልድ ጓው ሰየም ግን፣ 18 እን ሻትካን ክብያዅዱኻ ኒሲመርሲ አድኖሉ ግን፣ ዲመሲ ሻኽድኖሉ ግን፣ የዋ፣ ዲመሲ ሻኽድኖሉ ግን።

19 “ኒድ ደምቢ፡ እን ሃርጀጆ ቋዅ፡ ከብተውስኻ ናትክ ኒልኵድ ረገሻዅ፡ እርኩኵ ሻኺውዲ ኣጭፋር ኣስራዲሪውዲ እርጋዅሉ፡ እን ኣራዊት አሪውልድ ኒቱሩዅ ኣኻዅዲ ገሪዅ ጒኢሳዅዲ፡ እን ሰጀር ኣራዊት ሰበትድ አርእያ ጀረቢዅን። 20 ኰዶኽር፡ እን ሽካ ጊክክ ኒኣዀርሊ ህምበውዲ እን ናነበክልድ ፈዅ ጊኽዲ እን ኒጃብል ምኵረው ሰዃ ጊክክዲ፡ ኒሰናኽር እን አሪውልድ ኪዳዅ ኣዳምር ዕልል ተከው ዕልል ሻዅዲ ብደዐሲ ጋቡ እርጋዅ አብዲር ሰበትድ አርእያ ጀረቢዅን። 21 እነሓን፣ እና ጊኽ እን ሻትካንዲ ሓርብ ተምብሆ፡ ለታቕዅሎም፣ 22 እና ኒን ኒኣኻዅ፡ እን ግርጋት እማኒውዱዅዱዅ እንትራሲክር እን ክብያዅ ፍረድራሲክር ግን፣ ኒደምቢ፡ እን ክብያዅድ ሻትካን ኒሲመርሲ ለወና ወክት እንቱዅ።

23 “ኒኻ ንሰና ይዅ፡ ‘እን ሰጀር ኣራዊት ብሪል ጕሮ ፈራዅ ሰጀር ሲመር ግን። እን ሲመር አሪውሰና ኣኽሮ ኣኽላ፣ ብራ ንርትክ ዳዱኽር ረገሹዅር ቍሮላ ግን። 24 እን ሽካ ጊክክኻ፡ እና ሲመርልድ ፋው ሽካ ሰየም ግን፣ ነድ ደምብኻ፡ ናሰና ኣኽጋዅ አሪዅ ሲም ጕሮ ግን፣ እን ሰዃ ሰየምሲኻ ያዕይሮሎም ግን። 25 እን ክብያዅድ አወይሲ ቆል ብደዐሩዅ ጋቢሮ ግን፣ እን ክብያዅዱ ሻትካንስኽር ጀረብድሮሎም ግን፣ እን ፍቲሕዲ የመምሳ ወክትዲት ለወትሮኽር ወጠንሮ ግን፣ እን ሻትካንኽር ወክትዲ ኣውካትዲ ገፍ ወክትዅዲ ኣኽራሲክ ኒድ ደኵኖ እውስትድኖ ግን።

26 “ደአም ፍርድ ተርይሮ ግን፣ ኒምልክኽር ኒልድ ኣስትሮ ግን፣ ዲመስኽር ድድሮ ግን። 27 ኒድ ደምቢ፡ ሰማ ዓጝቀይሊ ህምበው ሲመርዲ ሕክምዲ ኵⶖንቲ ሲመርዅዲ፡ እን ክብያዅዱ ሻትካንድ እውስትሮ ግን። ኒሲመር ዲመርዅ ሲመር ኣኽሮ ግን፣ ናውክ ሐክመት ኰዶ አምለክድድኖሉ ግን፣ አደድስድኖሉኽር ግን።

28 “እን ደⶖጎባ ኒዅ ኒን ግን፣ ኣን ዳኒኤል ይሓሳብድ ገሪዅ ሳደድስዅን፣ ይወጅህኽር ለወትሱዅ፣ ኣኽን ግራ፡ እና ጋር ኒስ ይለበኪል