\c 1 6

1 ዳርዮ ኒሲመር ኒልክሊ ሓከምድኖ፡ ሊኽዲ ለጘረጝንዲ መርሓት ሰየምሮ ጀረቢዅ፣ 2 እን ሲም ሀሽከብስጊ፡ ጨብጫብ ኡድኖሎም፡ ነድ አወይሲ ሰዀድ ስልጠት እውዅሎም፣ ናልድ እን ላዅ ዳኒኤል እርጕዅ። 3 ናውክ እን መርሓትዲ ስልጠቱዲር አወይሲ ዳኒኤል ሓይስ ኣኾ አርስነዲን፡ እን ሲም ኒበለድ ኒልክ አወይሲ ሰየምሮሉ የመምዅ። 4 ንድ ሰበትድኻ፡ እን ስልጠቱዲ መርሓትዲ፡ ዳኒኤልዲ ክድመት ሲመሩዅሊ ሓኵር አርድኖሉ ሰበብ ጀረቢኒዅ፣ ደአም አርድኖ ገረስኒ። ዳኒኤል እምንሳዅዲ ፋጥንዲ ኒወራትሊ ሓኵር ኣጝጋዅዲ እርግነዲን፡ ከቲና አርድኖሉ ገረስኒ። 5 እንሲን እን ከው፡ “ዳኒኤልቲ፡ እን ፍቲሕ ኒጃርዅድ ኣኽጋዅክ፡ ይን ኒድ ሸከይኖሉ ገረስናዅ ሰበብ አርኖሉ ገረስነሊ” ይኑዅ።

6 እን መርሓትዲ ስልጠቱዲኻ ላት ሲምሊ ፈርኖ፡ ንሰና ይንዅሉ፣ “ዎ ሲም ዳርዮስ፣ ዲመሲ ሓከሚ! 7 ዎ ሲም፣ ሰዀረጝን ኳራ ኣኽራሲክ ሲምሊ ኣኽገትክ፡ ኣይዪ ኣዳም ኣኻ ኣዳምሊ ኣኽን ወሪ አሪ ጃርሊ ጠለያዅ፡ ጎቝ ገመንዅል ማልስትሮ ሲም ተምብህሮ፡ እን ትእዳድ ኵዅር ተመምሮ፣ ናውክ፡ ኵሲመሩ መርሓትዲ ፈራዶዲ ስልጠቱዲ ኰድጚሰውዲ ሐክመትዲ ኰድጚነ ህምበነኵ። 8 ዎ ሲም፣ እና ትእዳድ ኒስ ተምብሂ፣ እን ዳድስተጋዅር ለወትሰጋዅር ፍቲሕ ሜዶንዅዲ ፋርስሩዅዲርሰና ኣኽሮ ከተቢሉ።”

9 ንድኻ፡ ሲም ዳርዮስ እን ትእዳድ ተምብህሳዅሲ ከተብዅሉ። 10 ዳኒኤል እን ትእዳድ ተምብህሰት ዋሶሰና፡ እን ሸባቢክ ኒው ኢየሩሳሌምሊ ግልጭየው ብስታዅ እን ንሒስ አወይሲ ህምባዅ ኒልጝንሊ ፈሩዅ፣ እን እማና እሱ እርጋዅሰናኻ አብረኮ ግርግል ሲዅን ጠለየዅ፣ ኒጃርስኽር ሓመዱዅ። 11 ናውር እክብስኖ ኒል ፈርኑዅ፡ ዳኒኤልትኻ ኒጃርሊ ጠለዩዅር መህልላ እሱዅር አርኑዅሉ። 12 ሲምሊ ፈርኖኻ፣ “ዎ ሲም፣ ኣይዪ ኣዳም እና ሰዀረጝን ኳሪል ኵል ኣኽጋዅክ፡ ኣኻ ኣዳምሊ ኣኽን ወሪ አሪ ጃርሊ ጠለየን፡ ጎቝ ገመንዅል ማልስትሮ ግን ይሮ ትእዳድት ፍድሮ እርግግራኽርማ?” ይኖ እን ንፍዳዅ ትእዳድ ሰበት ወጝቀርንዅሉ።

እን ሲምኻ፡ “እን ትእዳድ ለወትሰጋዅ ፍቲሕ ሜዶንዅዲ ፋርስሩዅዲርሰና ተባዅ ግን” ዮ ወንተስዅሎም።

13 ናውኻ ሲምሲ፡ “ዎ ሲም፣ እን ሰልብስተው ያሁድል ኣኻዅ ዳኒኤል፡ ኵት ኣኽን፡ እን ከተብሮ ፍድራዅ ትእዳድ ኵዅሲ ኣኽን፡ ከበርደላ፣ ናንኽር ሲዅን ኒጀርሊ ጠለየኵ እⶖኵዅ” ይንዅሉ። 14 እን ሲም ኒስ ዋሶሰና ገሪዅ ጎሀዩዅ፣ ዳኒኤልት ደአንድሮሉ የመሙዅ፣ ኳራ ለብታሲክር ኒድ ገርስታዅሲክ እሲዅ ደአንድሮሉ። 15 ኒድ ደምቢ፡ እን ከው ላት ሲምሊ ስኵርኑዅ እማ፣ “ዎ ሲም፣ ላ ሲም ፍዳዅ ትእዳድዲ ተምብህሳዅዲ ለወትስጊን፡ሜዶንዲ ፋርስዲትል ፍቲሕ ዋነት አርኢ” ይኑዅሉ። 16 እንሲን እን ሲም አደዱዅ፡ ናውኻ ዳኒኤልቲ ነቕስንዅሉ፣ እን ጎቕ ገመንዅልኻ ምልንዅሉ። ሲምኻ ዳኒኤልቲ፡ “እን ኵጃር ዲማ አገልገልድራዅ ደአንድኵት” ይዅሉ። 17 ክርጛ ነቕስኖኻ እን ጎቝሲ አበድንዅሉ፣ እን ሲምኻ ዳኒኤልሊ ኣኻዅ ለወትስጊ፡ መርወድ ኒዅዲ ኒመርሓቱዅዲሲ ማሕተም እሲዅሉ። 18 ኒድ ደምቢ፡ እን ሲም ኒልጝል ወንተሩዅ፣ እን ቂሪ እንድሂስኻ ነብራ ቍጊ ኪዅ፡ ኒት ኣትፋግዕደውር ስኵርለሉ፣ ጅሙዅር ኒልድ ድዱዅ። 19 ጕራብድ፡ እን ሲም ጐ ወልይዶ እን ጎቝ ገመንዅል ፈሩዅ። 20 እን ጎቝሊ ስኵሮኻ ስንቕንቕ ዩ ዳኒኤልቲ፡ “ዎ ዳኒኤል፡ እን ጃር ዋነዅድ አገልገልደንታ፣ እን ጃር ዲማ አገልገልድራዅ ገመንልድ ደአንድሮካ ገረስዅማ?” ዮ ሽጝዅሉ። 21 ዳኒኤልኻ ንሰና ዮ ወንተስዅሉ፣ “ዎ ሲም፣ ዲማ መንደርቲ! 22 ዎ ሲም፣ ኒገሸል ሓኵር እጝጋዅ ኣኾ አርስዅን፡ ኵጃብልኽር ዓገብሊ፣ ይጃር ኒመልኣክሲ እኝሻቖ፡ ገመን አብሲ አበዱዅ፣ ናውር ጎትኒለ።” 23 እንሲን እን ሲም ገሪዅ ፈርሕዅ፣ ዳኒኤልቲ እን ጎቝልድ ፍድኖሉ አደድዅሎም። ዳኒኤል ኒጃርሊ እምሶ እርግነዲን፡ ጎቝልድ ፈሰና፡ ላሪ ጎታ አርስለሉ። 24 ሲም አደዱዅ እማ፡ እን ዳኒኤልቲ ብንድ ሸከየውሉ ከውዲ ናእኲንዲ ናእቝርዲት ነቕስንዅሎም፣ እን ጎቕ ገመንዅልኻ ማልንዅሎም፣ እን ጎቝሊ ስቖት ገእይግንኻ እን ገምን ከናተልንዅሎም፣ ናትክ ናናሽሽኽር ከርርጚኒዅሎም። 25 ኒድ ደምቢ፡ ሲም ዳርዮ እን ብራ ኒልክሊ መንደርተው ከውዲ ሲመርዲ ናት-ናቱሩ ጋብ ጋበውዲትል ንሰና ዮ ከተቡዅ፣ “ሰላም በጀኽንተት!

26 “እን ኣካን ሺባ ህምባዅ ይሲመር ዓጝቀይሊ ህምበው ከው ናውክ፡ ዳኒኤልዲ ጃርሲ ጒኢትድኖሉኽር ከበርድድኖሉኽር፡ እና ትእዳድሲ ተምበሀኵን እⶖኵዅን።

“ኒ፡ ዲማ ዳይም መንደርታዅ፡ ዋነዅ ጃር ግን፣ ኒሲመር ድድሮ ኣኽላ፣ ኒሕክምር ደⶖጎባ ሻኽላ።

27 ኒ፡ ኣንገፍደኵር ደአንደኵር፣ ሰመዲ ብረዲትልኻ እሻራትዲ ፈከርዳ ጋራትዲት እሰኵ፣ ኒ፡ ዳኒኤልት አብ ገመንዅልድ ደአንድዅሉ።”

28 ንድኻ፡ ዳኒኤል፡ ዳርዮስሩዅ ሲመር ወክትዲ ቂሮስ ፋርስሩዅ ሲመር ወክትዲትል ኒውክ ጠፍሕዅሉ።