\c 1 5
1
ሲም ቤልሻጽር ሲሕ ኣከው መኳንንቲ ኒውድ ምድ እሲዅሎም፣ እን ሲሕ ጃብልኻ ወይኒ ጅኡ እርጕዅ።
2
ቤልሻጽር ወይኒ ጅኡ እⶖጕሲክ፡ እን ኒእኽር ናቡካድነጾር ልጝን ሻትክ ኢየሩሳሌምዱዅልድ ነቕሰው ናድ ጅአነው እራኵ ደሀቡዲ ወርኪውዲት፡ ኒዲ እን መኳንንቲ ኒውዲ ኒእኲንዲ ኒእኲን ሸሉዲ ናድ ጅእድኖ ነቕስድኖሉ አደድዅ።
3
እንሲን፡ እን ልጝን ሻትክ ኢየሩሳሌምሩዅልድ አስተው ናድ ጀአነው እራኵ ደሀቡስ ነቓንዅሎም፣ ሲምዲ እን መኳንንቲ ኒውዲ ኒእኲንዲ ኒእኲን ሸሉዲ ናድ ጅእኑዅ።
4
ወይኒ ጅኡኑ እⶖጕሲኻ፡ እን ደሀብዲ ወርከዲ ኣስራዲረዲ ሻኽዲ ካንዲሲ ከደምሰው ናጃርትትሲ ሓመድኑዅ።
5
ስድፈትድኻ ኣዳምር ናን ዓጫብዕ ቋልስቱዅ፣ እን ልጝን ሲምዅሊ፡ እን ደውያኻ ቲዃ ቅብሊ ህምባዅ ለለክሳዅ ኳኒል ከተብኑዅ፣ ሲምኽር እን ከተባዅ ናንሲ ቋሉዅ፣
6
እንሲን፡ እን ሲም ገሪዅ ጕኢቱዅ፡ ኒገሽር ለወትሱዅ፣ ኒልኵክ ቂልሱዅ፡ ኒግርፍፍር እኺርኺርሲ ጣዓምቡዅ።
7
እን ሲምኻ፡ እን ሰርደትዲ ሽጝግርውሲ ሺበውዲ ኣቕሩድ እሰውዲት ሽጝድኖሎም ኒደሀይሲ ክብሰ አደድዅሎም፣ እን ባቢሎንዱ ብልሀቱሲ ንሰና ይዅሎም፣ “እና ክታበት ኒስ ነበብዶ፡ ውራኒ የት ድወዅሲለ፡ ሰራዅ ሓሪር ሰስየሉ ግን፣ ኒክርሚልኻ ደሀብ እስየሉ ግን፣ እን ይሲመርልኽር ሲዀር ሐክማይ ኣኽሮ ግን።”
8
እንሲን፡ እን ሲምድ ኒብልሀቱ ናውክ ቱኑዅ፣ ደአም፡ እን ክታበትሲ ነበብዶ፡ ውራ የት እን ሲምድ ድዊሮሉ ገረሳዅ አርስላ።
9
ሲም ቤልሻጽር ጃበሪዅልድ አወይሲ ገሪዅ ጒኢቱዅ፣ ኒገሽር ገሪዅ ለወትሱዅ። እን መኳንንቲ ኒውኽር ሃበነው ከስተሎም ሳደድስኑዅ።
10
እን ሲሚኻ፡ ደሀይ ሲምዅዲ ኒመኳንንቲሩዅዲት ዋስሮ፡ እን ምድ ሱኵሮ እርጋዅ ኣካንሊ ቱቲ፣ ንሰናኻ ይቲ፡ “ዎ ሲም፣ ዲመሲ ሓከሚ፣ በኻኽርግ፣ ኵገሽር ለወትስጊኒ!
11
ሻትካን ጃርትታዅ መንፈስ ሻዅ ላ ግርዋ ኵሲመርሊ ህምበኵ፣ እን ኵእኽርድ ዳለትሊ፡ኒ፡ እን ጃርትትሰና ልውርዲ አስተብሀልድነዲ አምርዲሲ እንታኽታዅ ኣኾ አርሱዅ፣ ኵእኽር ነቡካድነጾርኽር እን ጠንቆለውዲ ሰርደትዲ ሽጝግርው ሺበውዲ ኣቕሩ እሰውዲር ዳግሊ ሓለቓ እሲዅሉ።
12
ሲም፡ ቤልጥሻጽር ዮ ሽጛዅሉ ዳኒኤልትል፡ ሓይስ መንፈስዲ አርእንዲ አስተብሀልድነዲ ነበኺት እጝክነዲ ስቱርሲ ወድሕድነዲ ጨገምደው ጋራትሲ ጠፍሕድነዲር ግርስ አርሱዅ። እማ ዳኒኤልቲ ሽጚሉ፡ ኒኽር እን ክታበቱዅ ውሪናርሲ ድዊሮካ ግን።”
13
እንሲን ዳኒኤልቲ ሲም ጃብል አድኖ እንትንዅሉ፣ ሲምኻ ነዋ ይዅሉ፣ “እን ይእኽር ሲም ያሁዳ ብሪልድ ሰልበ ነቕሰውልድ ኣኽራኽር ላዅ ዳኒኤል እንትማ?
14
ሻትካን ጃርትታዅ መንፈስ ዋነትካ፡ ኰዶ አርእንዲ ፈሀምነዲ ኒቱሩዅ ኣኻዅ ልውርዲ ክምረት ዋሶ ህምበኵን፣
15
እን ልውሩዲ ሰርደትዲ፡ እን ክታበት ውራ የት ድዊድኖለ መታን ይጃብል ስኵርኖ እርግኑዅ፣ ደአም ውራ የት ድዊድኖለ ግረስኒ።
16
ናንኻ፡ እንቲ ኒውሪናርሲ ወድሕቶኽር ጨገምዳ ጋራትሲ እጝክቶኽር ገረስረት ዋሶ ህምበኵን። እና ክታበትሲ ነበብድሮ ኒውሪናርሲ ድውረንለ፡ ሰራዅ ሓሪር ሰርቶ ግን፣ ኒክርሚልኻ ደሀብ እስቲሮካ ግን፣ እን ይሲመርልኽር ሲዀር ሐክማይ ኣኽቶ ግን።”
17
ዳኒኤልኻ እን ሲምሲ ንሰና ዮ ወንተስዅሉ፣ “እን ኵእውን ኵድ ኣኽን፣ ኵሰርጎትኽር ኣዳም ኣሪዅድ እዊ፣ ኣን ደአም፡ እን ክታበትሲ ሲምድ ነበብድየሉ ግን፣ ውራ የትር ድውየሉ ግን።
18
“ዎ ሲም፣ እን ክብያዅ ጃር ኵእኽር ነቡካድነጾርድ ሲመርዲ ኵⶖንቲዲ፡ ክብርዲ ሽኻርዲት እውዅሉ።
19
እን ኒ እዋዅሉ በሀር ኮት ስልጠትልድ ጐዅ፡ ገባይልዲ ሲመርዲ ናት-ናቱሩ ጋብ ጋበነውዲ ናውክ ረጀፉኑዅር ጓቚቱኑሉኽር እርግኑዅ። ሲምኻ፡ እን ኵሮሉ ጀረበዅሲ ክዉ፡ እን ደአንድሮሉ ጀረበዅስ ደአንዱ፡ ሰየምሮሉ ጀረበዅስኻ ሰየሙ፡ እን ለተቕሲሮሉ ጀረበዅስኽር ለተቕ ሱሉ እርጕዅ።
20
ደአም፡ ኒለበከድ አዊ ይኮት የሰና፡ ከበርስነድኽር ተበሰና፡ ኒቂጦሪልድ ገሙዅ፣ እን ክብር ኒዅር ኒልድ አስቱዅ።
21
ከወልድ ሲሪዅ፣ ምዅ እንሱስዅ እውስትዅሉ፣ ድቋል ከደኑድኽር መንደርቱዅ፣ ቢሪሰናኽር ሻጝካ ቊዅ፣ ኒገሮብር ቍጣ ሰሚዅድ ጠበሱዅ፣ እን ክብያዅ ናድካ ከዋ ሲመር አወይሲ ሓከመት፡ ንጀረበዅድኽር እወትሎም አርእራሲክ።
22
“ደአም እንቲ፡ ዎ ቤልሻጽር ኒእዅራ፣ ነስ ናትክ አርእሮ ዋንትሩ ድኳ፡ ኵሹት ለተቕ ሲላ፣
23
እን ሲሚዅ ጃር አወይሲ ከበርስነድ፡ ኵሹት ክብ ስሪዅ። እን ልጝን ሻትኵ እራኵሲ ነቕሰሎም ይሮ፣ ኵዲ ኵመኳንንቲዲ፡ ኵእኲንዲ እን ኵእኲን ሸሉዲ፡ ናድ ወይኒ ጅእድኑዅ፣ እን ደሀብዲ ወርከዲ አስራዲረዲ ካናዲ ክርጛዲሲ ከደምሰው ጃርትት ዋሰገውዲ ቋለገውዲ ላሪ ፈሀመገውዲት ኰዶ ሓመድሩዅ። እን ኵፊዅትዲ ኵደርፍፍዲት ናትክ ኒናንተል ሸኻዅ ጃርስኻ ከበርድለሉ።
24
ኒኻ፡ እና ክቱብሲ ከተብረሪ ናኒት እኝሻቝዅ።
25
“እን ከተብሳዅ ክቱብኻ፡ ‘መኔ፡ መኔ፡ ቴቄል፡ ፋሬስ’ ያኵ።
26
“ኒ ውሪናርኻ እና ተለያዅሰና ግን፣ ‘መኔ’ ጃር እን ወክት ኵሲመሩዅሲ ሺብዅሉ፡ ደⶖጎቢልኽር ገእሰሉ ህምበኵ ይና ግን።
27
‘ቴቄል’ ቀየሲሰነድ ቀየስትሩዅ እማ፡ ስዳውሮኻ አርስሩዅ ይና ግን።
28
‘ፋሬስ’ ኵሲመር በንሲዅ፡ ከው ሜዶኑዲ ፋርሱዲሲ እውስትቲ ይና ግን።”
29
ኒድ ደምቢ፡ ቤልሻጽር ኒገኝሺንሲ ዳኒኤልቲ ሰራዅ ሓሪር ሰስድኖሉ፡ ኒክርሚልኻ ደሀብ እሲድኖሉ አደድዅሎም፣ ኒሲመርልኽር ሲዀር ሐክማይ እሲዅሉ።
30
እን ቂሪ እንድሂሲ ሲም ባቢሎንዱዅ ቤልሻጽር ኵውስቱዅ፣
31
ዳርዮስ ሜዶኑዅ ወልትረጝንዲ ለጛ አመሪዅራ ኣኵⶖጕሲ እን ሲመርሲ አድዅሉ።