\c 1 4
1
ሲም ነቡካድነጾርትልድ፡ እን ብራ ኒልክሊ መንደርትደናኽር ገባይልዲ ናውክ ከው ጋብ ናት-ናቱሩ ጋብደናኽርዲ፣ ሰላም በጀኽንተት!
2
እን ክብያዅ ጃር ይድ እሰው ኣሻይር ፈከርደውዲ ዓጀብደው ጋራትዲት ድውየኵም ገሪዅድክ ባህ የኵለ።
3
ኒኣሻይር አውስኮት ኵጘኵን፣ ዓጀብደው ጋራት ኒውኻ አውስኮት ሒለቲተኵን፣ ኒሲምር ዲመር ሲመር ግን፣ ኒሕክምኽር ውልድ ወለዶትል ኣኽታሲክ ግን።
4
ኣን ነቡካድነጾር፡ ይልጝል ታሚቶለ፡ እን ልጝን ይሲመርዅልኻ ባህዮለ መንደርቱ እርግዅን።
5
ላ ነበኺ ጒኢሳዅ ቋልዅን፣ ይገኝጅኝሊ ዋንቱኻ፡ ይምዅሊ እንታዅ ወጅህዲ ራእይዲ በኻኽድዅለ።
6
ኣንኻ፡ ናውክ ብልሀቱ ባቢሎንዱ፡ ይጃብል ስኵርኖ፡ ነበኺ ኣን ነበኽረዅሲ እጝክድኖለ አደድዅን።
7
እን ጠንቆለውዲ ሰርደትዲ ሽጝግርውሲ ሺበውዲ ጥባስ ገምደውዲ እንትኖሰና፡ እን ነበኺት ድዊዅንሎም።
8
ደⶖጎባኻ፡ እን ይጃር ስⶖድ ቤልጥሻጽር ይስቶ ሽጝስታዅ፡ መንፈስ ጃርትታዅ ሻዅ ዳኒኤል ትዎ ይጃብል ደው ይዅ፣ እን ነበኺትኽር ድዊዅንሉ።
9
ንሰናኻ ይዅንሉ፣ “ዎ ሓለቃ ብልሀቱዉዅ ቤልጥሻጽር፣ መንፈስ እን ሻትካን ጃርትታዅ ኵል ዋነት አርእዅን፣ ኵት ጨገምዳዅ ስቱር ዋኒገትር አርእዅን፣ እን ኣን ነበኽረዅ ነበኺ ኒን ግን፣ ይነበኺት እጝኪለ።
10
ይገኝጅኝሊ ዋንቱ እⶖጕሲ ቋላዅ ራእይ ኒን ግን፦ እነሓን፡ ይጃብል ካና ሺረሪ ብራ ነበክሊ ደው ይሮ ህምብረሪት ቋልዅን።
11
እን ካና ለገትኽር ዓከክትኽር፣ ንር ሺርጝኻ ሰሚል ገእዩዅ፣ ብሪ ግንድል ኣኽታሲክኻ ቋልስትሩ እርግቲ።
12
ንር አሽ ሽኻሩ ግን፡ ንር ፍርርኻ ገርው፣ ንር አወይስኽር ናትክድ ኣቕተው ነብራ እርጕዅላ። ኣራዊት ብሪውኽር ንር ሻማ ዓጝቀይሊ ፊዅኑ እርጕኑዅ፣ ንር ለጝክከልኻ ጀከል ሰሚው መንደርቱኑ እርጕኑዅ፣ ናውክ መሀድሰውር ንርትልድ ቍኑ እርጕኑዅ።
13
“ይገኝጅኝሊ ዋኑ ቋላዅ ራእይሲ፡ ላ ሻትክ ንሽቃ ሰሚልድ ገሙⶖጕሲ ቋልዅን።
14
ኒኻ፡ ኒደሀይሲ ክብሰ ንሰና ዩዅ፣ ‘እን ካነት ቀረጨላ፣ ንር ለጝክክስኻ ቀረጫ፣ ንር አሽስኽር ከፍከፋ፣ ንር ፍረስኽር ፋሕሳ፣ እን ሻማ ዓጝቀይሊ ህምበው እስሱስዲ እን ንር ለጝክክሊ ህምበው ጀከልዲ እግሪኒን።
15
እን ጕንዳይዲ ኒስርዲኻ፡ ስልስል ሸኺዅዲ ኣስራዲራዲሲ እጝሸውድኖ፡ ሻጝካ ከደኑውድ ነበክሊ ባረሉ።
“ ‘ቍጣ ሰሚዅድ ጠበስኒ፣ እን ካን ዓጝቀይልኽር ኣራዊት ከደኑዲ መንደርትኒ።
16
ኒለበካ ኣዳምር ለበኪሰና ኣክኒልድ ለወትስኒ፣ ለበካ ሕያይትዃ እውስትኒት፣ ለጘታ አመራኽር እንዳኸ ዋኑ ደኵኒት።
17
“ ‘እን ኒኰድጛ እን ንሽቕ ኒውድ እስተ ድውስቲዅ፣ ኒሻትካጝር ኒፍርድሲ ድወነኵ፣ ንድኻ፡ እን ክብያዅ ከዋ ሲመር ናድካ አወይሲ ሓከመት፡ ኒጀረበዅድኻ እወትሉ፡ እን ቃበብሳዅስኻ ናዳግ ሰየመትሉ፡ እን ዋነው ናውክ አርእድኖ መታን ግን።’
18
“ኣን፡ ሲም ነቡካድነጾር ነበኽረዅ ነበኺ ኒን ግን፣ እንቲ ቤልጥሻጽር፣ ውረኒ ኣከት ድዊለ፣ እን ብልሀቱ ይሲመርሊ ህምበውልድ ይነበኺት እጝክሮለ ገረሳዅ አርስላ፣ እንቲ መንፈስ ኵጃርትት ሻትካናዅ ኵል ዋነውድ ይነበኺት እጝክቶለ ገረስረኵ።
19
እንሲን እን ቤልጥሻጽር ይስታዅ ዳኒኤል ከለላ ወክትድ ገሪዅ ረበሽቱዅ፣ እን ሓሳብኽር በኻኽድዅሉ። እን ሲምኻ፣ “ዎ ቤልጥሻጽር፣ እን ነበኺዲ ኒውሪናርዲ በኻኽድጊⶖኵት” ይዅሉ።
ቤልጥሻጾርኻ ንሰና ዮ ወንተስዅሉ፣ “ይአደራ፣ እን ነበኺ ኵኣፋይትድ ኣኽኒ፣ ኒውሪናርኽር ኵዓዶውርድ ኣኽኒ!
20
እን ለገድሮ ዓከክሮ ቋልደሪላ ካና፣ ንር ሺርጝኻ ሰሚል ገእየሪ፡ ብራ ኒልክሊ ቋልስትረሪ፣
21
ንር አሽ ሽኻሩ፣ ንር ፍርርኻ ገሪው፣ ነብራ ናድክድ ኣከው ሻኽረሪ፣ ኣራዊት ከደኑ ንር ዓጝቀይሊ ሻሚተነሪዲ ንር ለጝክከልኻ ጀከል ሰሚው ናልጝንትትሲ ከደምኖ ህምበነሪዲ፣
22
ዎ ሲም፣ እን ካና እንቲ ግን፣ በሀርዲ ሒለትዅዲ ኣኽሩዅ፣ ኵኩⶖንትኽር ክብዮ ሰሚል ገእዩዅ፣ ኵሕክምኽር ብሪ ግንድል ኣኽታሲክ እዳኑዅ።
23
“ዎ ሲም፣ እንቲ፡ ‘እን ካነት ቀረጨላ፡ በረስደላኽር፣ እን ጕንዳይዲ ኒስርዲኻ፡ ስልስል ሸኺዅዲ ኣስራዲራዲሲ እጝሸውድኖ፡ ሻጝካ ከደኑውድ ነበክሊ ባረሉ፣ ለጘታ አመራ ደኵራሲክ፡ ቍጣ ሰሚዅድ ጠበስኒ፣ እን ካን ዓጝቀይልኽር ኣራዊት ከደኑዲ መንደርትኒ፣’ ዩ ሻትክ ንሽቃ ሰሚልድ ገማዅሲ ቋልዱዅ።
24
“ዎ ሲም፣ እን ውሪናር ነበኺሩዅ ኒን ግን፣ እን ክብያዅ ይአደራ ሲም አወይሲ ፈዅ ትእዳድ ኒን ግን፣
25
ከወለድ ሲሪቶ ግን፣ ኣራዊት ከደኑድኻ መንደርትቶ ግን። ቢሪሰናኽር ሻጝካ ቍቶ ግን፣ ቍጣ ሰሚዅድር ጠበስቶ ግን፣ እን ክብያዅ ከዋ ሲመር ናድካ አወይሲ ሓከመት፡ ንጀረበዅድኽር እወትሎም አርእታሲክ፡ ለጘታ አመራ እንዳኽረ ግጅቶ ግን።
26
እን ጕንዳይ ካኒዅዲ ኒስርዲ ግጅን ይስታዃ፣ ስልጠት ሰሚልድ ኣከት አርእሮሰና፡ እን ኵሕክም ኵል ወንተርዶካ መታን ግን።
27
በጋ፡ ዎ ሲም፣ ይኰድጘስ ዋሲ፣ ሓራም እስነስ ባርዶ፡ ትክያዅ እሲ፣ ምቝለስ ባርዶ፡ጭጉማንሲ ረሀይዲ፣ አዊ አርእዅ፡ እን ኵርድቕ በጀዅ ፈርዶ ኣኽራ።”
28
ነን ናውክ ሲም ነቡካድነጾርሊ ገእዩዅ፣
29
ሽካ ለጛ አርባ ደምቢ፡ ሲም እን ባቢሎንድ ልጝን ሲመርዅድ ንሕስ አወይሲ ወንተተሩ እⶖጕሲ፣
30
“እን ይሒል በሀርድ፡ እን ዓደድ እጝጋዅ ክብር ይዅድ፡መስከብ ሲምዅ ኣኽቶ ገበራኽርላ፡ በህሪ ባቢሎን ኒኒ ኣኽግረርማ?” ዮ ጋቢዅ።
31
ጋብ ኒውሲ ድⶖጊኻ፡ ንሰና ያዅ ደሀይ ሰሚልድ እንቱዅ፣ “ዎ ሲም ነቡካድነጾር፣ ኵሰበትድ ንሰና ይስተኵ እⶖኵዅ፣ ሲመር ኵዅ ኵልድ አስቱዅ፣
32
ከወልድ ሲሪቶ ግን፣ ኣራዊት ከደኑድኻ መንደርትቶ ግን፣ ቢሪሰናኽር ሻጝካ ቍቶ ግን፣ እን ክብያዅ ከዋ ሲመር ናድካ አወይሲ ታምም ምልክ ክመት፡ ኒ ጀረበዅድኻ እወትሎም አርእታሲ፡ ለጘታ አመራ እንዳኽረ ግጅቶ ግን።”
33
ኒድ-ኒድኻ፡ እን ይስተው ናውክ ናቡካድነጾርዲ ዳግል ኣኹዅ፣ ከወልድ ሲሪዅ፣ ቢሪሰናኽር ሻጝካ ቊዅ። ኒሽብክ ንስርዱውሰና፡ ኒኣጫፍር ጀከሉውሰና ሺርዳሲክ፣ ኒገሮብ ቍጣ ሰሚዅድ ጠበሱዅ።
34
እን ወክት ደኮሰና፡ ኣን ነቡካድነጾር ይዕልልሲ ሰሚል ቋሕ ሲዅን፣ ይምዅር ወንተርዅለ፣ እን ኵብያዅስኽር ሓመድዅንሉ፣ እን ዲማ መንደርታዅሲ ሳቢዅንሉ፡ ኵⶖድዅንሉኽር።
ኒሕክም ዲመር ሕክም ግን፣ ኒሲመርኽር ውልዲ ወለዶ ኣኽታሲክ መንደርተኵ።
35
እን ብሪል መንደርተው ናውክ፡ ኒገሸል ላሪ ኣኽኖ ቋልስተን፣ ኒ፡ እን ሰሚል ህምበው ሒለቱዲ እን ብሪል መንደርተውዲትል ኒምራድስክ እሰኵ፣ ኒናንሲ ገበብሮ ገረሳዅ ወሪ “ውሪዅ ኒስ እስራዅን?” ይሮሉ ገረሳዅ እላ።
36
እን ወክቲ እንድሂሲ፡ ይምዅ ወንተሩዅለ፣ እን ክብር ይሲመርዅድኻ፡ ኵⶖንቲ ይዅዲ ክብር ይዅዲ ወንተርዅለ። እን ይት ኰድጚሰውዲ ፈራዶ ዩዲ ጀረቢኒዅለ፣ ይቂጦሪልኽር ወንተርዅን፣ እን ጃብሪልድ ኪዳዅ ክብርኽር ኰስትዅለ።
37
ናንኻ፡ ኣን ሲም ነቡካድነጾር፡ እን ሲም ሰሚዅሲ ሓመደኵንሉኽር ኵⶖደኵንሉኽር ከበርደኵንሉኽር እⶖኵዅን። ኒክድመት ኒውክ እምን ግን፣ ኒደርፍፍር ናውክ ሓቕ ግን፣ እን ከበርሶ ፈረውሲኻ ጀርበት ቋሊስሮሎም ግን።