\c 1 3
1
ሲም ነቡካድነጾርኻ፡ ኒሺርጝ ሰዀረጝን ኣመት፡ ኒእዳናርኻ ወልታ ኣመት ኣካዅ፡ ምስሊራ ደሀቡዅ እሲዅ፣ እን በለድ ባቢሎንዱዅሊ ድራ ይስታዅ ሸኪልኻ ደው ሲዅሉ።
2
ኒድ ደምቢ፡ መኳንንቲዲ መርሓትዲ እን በለደሲ ሓከመውዲ ኰድጚሰውዲ እን ልጝን እራኵ ገማዅሲሉ ተከወውዲ ፈራዶዲ፡ አሪው እን ፍቲሕሲ አርአውዲ እን በለድሊ መርሓት ኣኸውዲት ናትክ እን ምሲሊራ ንደውሰዅድ ገውሪል እንትድኖ ሽጝዅሎም።
3
እን መኳንንቲዲ መርሓትዲ እን በለደሲ ሓከመውዲ ኰድጚሰውዲ እን ልጝን እራኵ ገማዅሲሉ ተከወውዲ ፈራዶዲ፡ አሪው ፍቲሕሲ አርአውዲ እን በለድሊ መርሓት ኣኸውዲ ናውክ፡ እን ሲም ነቡካድነጾር ደውሰዅ ምስሊሪዅ ገውሪል እንትኑዅ፣ እን ምስሊራ ጃብልኽር ደው ይኑዅ።
4
ኒድ ደምቢ፡ እን ተምባሃዃ ኒደሀይሲ ክብሰ ንሰና ዮ ድሪሱዅ፣ “ገባይልዲ ናት-ናቱሩ ጋብ ጋብደናኽር ከውዲ፣ እንትን እሲትኖ አደድስድናዅ ኒን ግን፦
5
ደሀይ መለከቱዅ፡ እምብልቲዅ፡ ዕንድሩዅ፡ በገኒዅ፡ ሕኖኒዅዲ ኒውክ ደሀይ ሙዚቂዅዲት ዋስድነረት፡ እን ሲም ነቡካድነጾር ደውሰዅ ምስሊሪል ፍግም ይድኖ ሰገድትኖ ሻኽድኑዅ፣
6
ፍግም ዮ ሰገድጋዅክኻ፡ ኒድ-ኒድ እቶን ላኻ ድይድያዅሊ ማልስትሮ ግን።”
7
ንድኻ፡ ደሀይ መለከቱዅ፡ እምብልቲዅ፡ ዕንድሩዅ፡ በገኒዅ፡ ሕኖኒዅዲ ኒውክ ደሀይ ሙዚቂዅዲት ዋስኖሰና፣ ኒድ-ኒድ ናውክ ገባይልዲ ናት-ናቱሩ ጋብ ጋበው ከውዲ፡ እን ሲም ነቡካድነጾር ደውሰዅ ምስሊራ ደሀቡዅሊ ፍግም ይኖ ሰገድኑዅ።
8
እን ውክት ንድ፡ ከው ላው ባቢሎንዱ ስኵርኖ፡ እን ያሁድሲ ሸከይንዅሎም፣
9
ናውኻ ሲም ነቡካድነጾርቲ ንሰና ይንዅሉ፣ “ዎ ሲም፣ ዲመሲ ሓከሚ!
10
ዎ ሲም፣ እንቲ ንሰና ያዅ ትእዳድ ፍድሮ እርግሩዅ፣ ደሀይ መለከቱዅ፡ እምብልቲዅ፡ ዕንድሩዅ፡ በገኒዅ፡ ሕኖኒዅዲ ደሀይ ሙዚቂዅዲት ዋሳዅክ ኒውክ፡ እን ምስሊራ ደሀቡዅሊ ፍግም ዮ ሰገድሮ ሻኵ፣
11
ፍግም ዮ ሰገድጋዅክኻ፡እቶን ላኻ ድይድያዅሊ ማልስትሮ ግን።
12
ኣኽን ግራ፡ ዎ ሲም፣ እን ባቢሎንዲ በለድሊ ስልጠት ኡራኽርሎም ያሁድ ህምበነኵ፡ ሲድራቅዲ ሚሳቅዲ ዓብድ-ኔጎዲ፣ ናው ኵሕስር ሻኽኒ፣ እን ኵጃርትትስኽር ኣምለክደኒሎም፣ እን እንቲ ደውስረዅ ምስሊራ ደሀቡዅልኽር ሰገድኒ።”
13
እንሲን ሲም ነቡካድነጾር ገሪዅ ሓረቕሮ፡ ሲድራቅዲ ሚሳቅዲ ዓብድ-ኔጎዲት ነቕስድኖሎም አደዱዅ፣ ነቕስኖሎምኻ እን ሲም ጃብል ደው ሲኒዅሎም፣
14
ሲም ነቡካድነጾርኻ ንሰና ይዅሎም፣ “እንትን ሲድራቅዲ ሚሳቅዲ ዓብዲ-ኔጎዲ፣ እን ኣን ደውሰዅ ምስሊሪል እንታ ሰገድና ብነዲ እን ይጃርትትሲ እንታ ኣምለኽና ብነዲ፡ እምን መኒ?
15
ናን፡ ደሀይ መለከቱዅ፡ እምብልቲዅ፡ ዕንድሩዅ፡ በገኒዅ፡ ሕኖኒዅዲ ኒውክ ደሀይ ሙዚቂዅዲት ዋስድነሪት፡ እን ኣን ደውሰዅ ምስሊራ ደሀቡዅሊ ፍግም ይድኖ ሰገድትኖ ደለምድኖ ዋንትደነን ትክዩዅ። ሰገደግደነንኻ፡ ኒድ-ኒድ እን እቶን ላኻ ድይድያዅሊ ማልስትትኖ ግን፣ እን ይናንተልድ ደአንድሮኩም ገረሳዅ ጃርኻ አውንኒ?”
16
ሲድራቅዲ ሚሳቅዲ ዓብድ-ኔጎዲኻ ሲምሲ፡ “ዎ ሲም ነቡካድነጾር፣ እና ጋር ንድ ይነት ቋላዅድ ወንተስኖልካ ጀረብነሊ።
17
ዎ ሲም፣ እን ይን ኣምለክድናዅ ጃር እና እቶን ላኻ ድይድያዅልድ ደአንድሮና ገረሰኵ፣ ኵናንተልድር ደአንድሮና ግን።
18
ዎ ሲም፣ ኒ ደአንደገንና ድኳ፣ እን ኵጃርትትሲ ኣምለክደግነትር እን እንቲ ደውስረዅ ምስሊሪል ሰገደግነትር አርኢ።” ይኑዅሉ።
19
እንሲን፡ ነቡካድነጾር፡ ሲድራቅዲ ሚሳቅዲ ዓብዲ-ኔጎዲሲ ገሪዅ ሓረቕሩዅ፣ ወጅህ ኒገሹዅር ለወትሱዅ። እን እቶን ለኺዅሲ እማና እርጋዅልድ አወይሲ ለጘታ እሽባ ሓውሲድኖሉ አደድዅሎም፣
20
ሲድራቅዲ ሚሳቅዲ ዓብድ-ኔጎዲት እኝሸውኖሎም፡ እን እቶን ላኻ ድይድያዅሊ ማልድኖሎም፡ እን ዓስከርልድ እን ሒለቱ ኣኸውሲ አደዱዅ።
21
ናውኻ፡ ናቓማይሽዲ ናታኲንዲ ናሻሻትዲ ናው ሰርኖ ህምበነውዲክ እኝሸውስኖ፡ እን እቶን ላኺዅ ድይድያዅሊ ማልስትኑዅ።
22
እን ትእዳድ ሲምዅ ኣሸሻዅ ኣርግነዲን፡ እን እቶን ላኺዃ መራ ድይድዩ እርጋዅ ኣኽነዲን፣ እን ለኺዅ ሀልሀልታ፡ ሲራቅዲ ሚሳቅዲ ዓብዲ-ኔጎዲት ማለውሲሎም ዓስከርሲ ኵውዅሎም።
23
እን ሰዃ፡ ሲድራቅዲ ሚሳቅዲ ዓብዲ-ኔጎድኻ እኝሸውስኖ ዋንቱኑ እን እቶን ላኻ ድይድያዅሊ ለብኑዅ።
24
ኒደምቢ፡ ሲም ነቡካድነጾ ፈከርሶ፡ ኒ ከፍ ዮ እርጋዅልድ ጒዅ እማ፡ ኒት ኰድጚሰውሲ፡ “እኝሸውኖ ለኺል ማልነውሎም ሰዃ ግርዋ ኣኽገውማ?” ዮ ወጝቀርዅሎም።
ናውኽር፡ “ዎ ሲም፣ የዋ ናው ግን” ይንዅሉ።
25
ኒኻ፡ “እነሓን፣ ኣን ሰጃ ግርዋ እንክስተው፡ ሃሽከብስገው፡ እን ለኻ ነበክሊ ወንተተርውሲ ቋለኵን እⶖኵዅን፣ እን ሰጀርኻ መልኣክ ተከኵ” ይዅሎም።
26
ነቡካድነጾር፡ እን እቶን ለኻ ድይድያዅድ መሪል ስኵሩዅ እማ ክብያዅ ደሀይድ፡ “እንትን እን ጃር ክብያዅዱ ገኝሺን፡ ሲድራቅዲ ሚሳቅዲ ዓብዲ-ኔጎዲ፡ ፋ፡ ነራ ለዃ” ይዅሎም።
እንሲን፡ ሲድራቅዲ ሚሳቅዲ ዓብዲ-ኔጎዲ እን ለኺልድ ፍኑዅ፣
27
እን መኳንንቲዲ መርሓትዲ እን በለድሊ ሓከመውዲ ኰድጚሰውዲ ኒላው ሸጝገብሊ እክብስኑዅ፣ እን ለኻ እን ግርውሲ ላሪ ሃቢሮሎም ገርስገት ቋልኑዅ። ናሽብክልድ ላሪ ሓውይላ፣ ናሰረጝር ለወትስላ፣ ቂራ ለኺዅር እርግለሎም።
28
እንሲን ነቡካድነጾር ንሰና ይዅ፣ “ኒመልኣክሲ እኝሻቖ፡ ኒገኝሺንሲ ደአንዳዅ፡ ሲድራቅዲ ሚሳቅዲ ዓብዲ-ኔጎዲር ጃር ሓመድስኒ፣ ናው ኒድ እምንስኖ እን ትእዳድ ሲምዅሲ እስነስ ጕሽኑዅ፣ ናጃርሊ ኣኽገትክ፡ ኣሪው ጃርትትሲ ኣምለክድጝኒጝር ናል ሰገድግኒጝር ናፊዅትሲ ደኵስኖ ኡኑዅ።
29
በጋ፡ ኒሰና ደአንዳዅ ጃር ዋኒጋዅ ኣኸውድ፡ ሲድራቅዲ ሚሳቅዲ ዓብዲ-ኔጎዲር ጃርሊ አይዪ ምቝላ ጋባ ጋባዅክ፡ ገባይልድ ኣኺኒ ናት-ናቱሩ ጋብ ጋበው ከውልድ ኣኽኒ፡ ኣኻዅክ ቀረረጭስሮ ግን፣ ኒልጝንኽር ቀጨጭ ቡቝሲሰና ድግድግ ኣኽሮ ግን ዮ አደዶ ህምበኵን።”
30
ኒድ ደምቢ፡ ሲድራቅዲ ሚሳቅዲ ዓብዲ-ኔጎዲት እን በለድ ባቢሎንድዅሊ ሰየምዅሎም።