1
ናቡካድነጽር ሰየምሶ ኒሲዀር አመሪል ነበኺ ነበኽሪዅ፣ ኒመንፈስኽር ረበሽቱዅ፣ ገሙዅር ኒልድ ድዱዅ።
2
እን ሲምኻ፡ ኒ ነባኽረዅ ነበኺት ድዊድኖሉ ዮ፡ ጠንቆለውዲ ሰርደትዲ ኣቕሩዱዲ ብልሀቱዲት ሽጝድኖሎም አደዱዅ፣ ናውር እንትኖ ኒጃብል ደው ይኑዅ፣
3
ኒኻ፡ “ላ ነበኺ ነበኽሪዅን፣ እን ኣን ነበኽረዅ ነበኺ ውራ ኣከት አርእያ ሀወክሶ ህምበኵን” ይዅሎም።
21 ኒ፡ ወክትዲ አርፍፍዲት ለወተኵ፣ ሰየምሲ፡ ሰየመኵር ገምደኵር፣ እን ብልሀቱውድ ልውር፡ እን ፈሀመውድኻ አምር እውኵ። 22 ኒ፡ ቆርሊ ህምባዅዲ ትብታዅዲት ወድሕደኵ፣ እን ጭልምሊ ህምባዅሲ እርኡዅ፣ በርህኽር ኒዲ መንደርተኵ። 23 ዎ ጃር ይእክላዅ፣ ብልሀትዲ ሒልዲ ኡራኽርለ ኣኽርነዲ፡ እን ኣን ሺዋዅሲካ አርእሲስርነዲንለኽር እን ነበኺ ሲምዅሲ ወድሕድርነዲንለኽር ሓመድኵንካ፡ ከበርደኵንኻኽር እⶖኵዅን።” 24 ዳኒኤልኻ፡ እን ሲም ባቢሎንዱ ብልሀቱስ ድሂስሮሎም አደዳዅሉ ኣርዮክትል ፈሩዅ እማ፡ “እን ባቢሎንዱ ብልሀቱስ ኵውግሎም፣ እን ሲምሊ አድሮ ፈሪለ፣ ኣንኽር እን ሲምሲ ኒነበኺት እጝክየሉ ግን” ይዅሉ።
25 ኣርዪክኻ ዳኒኤልቲ ኒድ-ንድ ሲምሊ አዶ ቱስዅሉ እማ፡ “እን ነበኺዲ ኒ ውሪናርዲት ሲምድ ድዊሮ ገረሳዅ ኣዳም፡ እን ሰልብስተው ያሁድ ነበክልድ አሮ ህምበኵን” ይዅሉ። 26 ሲምኻ፡ እን ቤልጥሻጽር ይስቶ ሽጝስታዅ ዳኒኤልቲ፣ “እን ኣን ነባኽረዅ ነበኺዲ ኒ ውሪናርዲት ድዊቶለ ገረስረዅማ?” ዮ ወጝቀርዅሉ። 27 ዳኒኤልኻ ንሰና ይዅሉ፣ “ብልሀቱዅ ኣኽን፡ ሰርዳይ ኣኽን፡ ጠንቆላዅ ኣኽን፡ አመር ሻዅ ኣኽን፡ እና ሲም ወጝቀራዅ ስቱርሲ ሲምድ ወድሕድሮሉ ገረሳዅ እላ፣ 28 ደአም፡ እን ሰሚል ህምባዅ ላዅ ጃር ካያ ግን ስቱርሲ ወድሕዳዅ፣ ኒ፡ እን እንተራ ወክትሊ ኣካዅሲ ሲም ናቡካድነጾርድ አርእሲስዅሉ። እን ኵገጝጅጝሊ ዋንትሩ ቋልዳዅ ነበኺዲ ራእይዲ ኒን ግን፦ 29 “ዎ ሲም፣ ኵገጝጅጝሊ ዋንትሩ፡ ኵምዅ እን ንደምቢ ኣኽሮ ፈረው ጋራትሲ ኣትዋየንዱ እርጕዅ፣ እን ስቱርሲ ወድሕዳዃ እን ንደምቢ ኣኽሮ ፈራዅሲ አርእሲስዅካ። 30 እና ስቱር ይድ ወድሕስታዅ፡ ናድክልድ ኪዳዅ ብልሀት ሻኻኽር ኣኾ ኣኽሊ፣ ደአም፡ ዎ ሲም፡ እንቲ ውረኒ ኣከት አርእቶኽር እን ኵምዅድ አትዋየንድሩ እርግራዅ ጋር ውረኒ ኣክት ፈሀምቶዅር ግን።
31 “ዎ ሲም፣ ኵገሸል በሀር ኮት ኣኻዅ፡ ብርቕርቕ ያዅዲ ጕኢሳዅዲ ምስሊራ በህር ቋልዱዅ፣ 32 እና ምስሊራ፡ ኒኣዀርኻ ደሀብ ጫርያንድ፡ ኒናሓርዲ ኒከረሽምዲኻ ወርከድ፡ ኒጎድጕዲ ኒየውድኻ ኣስራዲሪልድ፣ 33 ኒመጋባትኻ ሸኺልድ፡ ኒልኵክኻ ናበልጝ ሸኺልድ፡ ነበልጛ ደረቚልድ ከደምሰው እርጕዅ። 34 እንቲ ኒስ መርኪስሩ እⶖጕሲ፡ ላ ክርጛ ናን ኣዳምሩዅ ተመድጊሉ እን እርጋዅልድ ገለበስትዅ፣ እን ሸኻዲ ደረቛዲሲ ከደምሰው ልኩኵ ምስሊሩሲኻ ጣዓምብዅርሎም፡ ሀርተትዅርሎም። 35 እንሲን፡ እን ሸኻዲ ደረቛዲ ኣስራዲራዲ ወርከዲ ደሀብዲ ሀርተትሱዅ፣ እን ወክት መሽውዅሊ ወረኒል ድየው ጕርድ ሰና ኣኹዅ፣ ውልዋልኽር ላሪ ባርጊ አድዅሎም፣ እን ምስሊረስ ጣዕምባዅ ክርጛኻ በሀር ኮት ጊራ ኣኹዅ፣ ብረስክር እንሳኹዅ።
36 “እን ነበኺ ኒን ግን፣ ናጛ፡ እን ነበኺ ውረኒ ኣከት ሲምድ ድዊኖሉ ግን። 37 ዎ ሲም፣ እን ጃር ሰሚዅ ሲመርዲ ስልጠትዲ ሒልዲ ክብርዲት እዋዅካ፡ ሲም ሰየሙዅ እንቲ ግን፣ 38 ኣዳምንድቝርዲ ዋኒን ከደኑዲ ጀከል ሰሚውዲት ኵናንተል እውዅካ፣ ናው ህምበና ኣካንልክ ኰዶ፡ ናድካ ኣዀርሊ ሓከምረት እሲዅካ፣ በጋ፡ እን ኣዀር ደሀብድ ከደምሳዅ ኣንቲ ግን።
39 “ኵደምብኻ፡ ኵልድ ሽጓዅ ሲመር ጕሮ ግን፣ ኒደምቢ ኰዶ፡ ኣስራዲሪዅ፡ ብራ ኒትክሊ ሓከማዅ ሲዀር ሲመር ጕሮ ግን። 40 ደጝጎባኻ፡ ኒትክሲ ከትከታዅዲ ከራዅዲርሰና፡ ሸኺሰና ተባዅ ኣኻዅ ሲመር ጕሮ ግን፣ ሻኽ ናትክሲ ከረ እትሳዅሰነሎም፡ እን ኒጃብ እርገው ሲመር ናትክስኽር ከርርጘ፡ እትስሮም ግን። 41 ኒልኩኵዲ ኒዓጫብዕዲ፡ ናበልጝ ደረቛ፡ ነበልጛ ሸኺልድ ከደምሰው ቋልዳዅሰነሎም፡ ኒሰና ንርሹር-ንርሹትልድ ሲርስትጝረሪ ሲመር ኣኽቶ ግን፣ ደአም፡ እን ሸኸዲ ደረቛዲ ሕበርሰ ቋልዳዅሰነሎም፡ ኒበልጛ ተባዅ ሻኺልድ ዋኒሮሉ ግን። 42 እን ዓጫቢዕ ኒልኵከው ናበልጝ ሻኺልድ፡ ነበልጛ ደረቚልድ ከደምሰውሰና፡ እና ሲመርኽር ኒበልጛ ሒለቱዅ ነበልጛኻ ሓዋን ኣኽሮ ግን። 43 እን ሸኻዲ ደረቛዲ ሕበበርሰ ቋልዳዅሰና፡ እን ከውር ናውክ ሕበበርሰው ኣኽድኖ ግን፣ ሸኻዲ ደረቋዲ እኺርኺርሊ ተከነጋዅሰናኽር፡ እን ከውር ላት ኣኽኖ መንደርትድኖ ኣኽኒ።
44 “እን ወክት እና ሰየም ነድዅድ፡ ጃር ሰሚዅ ዲመሲ ድደጋዅዲ እክ አሪውድ እውስተጋዅዲ ስመር ጕድሮ ግን፣ ኒ፡ እን ሲመር ናትክሲ ዳድሮሎምኽር ድሂስሮሎምኽር ግን፣ እና ሲመር ኒንኻ፡ ዲማ ተቦ መንደርትሮ ግን። 45 እን ክርጛ ናን ኣዳምዅ ተመድጊሉ ጊሪልድ ገለበድሶ ገሞ፡ እን ሸኻዲ ኣስራዲረዲ ደረቛዲ ወርካዲ ደሀብዲት እትሱ ቋልዳዅ፡ ኒ ውሪናር ኒን ግን፦
“እን በሀር ጃር እን ንደምቢ ኣኽሮ ፈራዅሲ ሲምድ ቋሊስዅሉ፣ እን ነበኺኻ እምን ግን፣ እን ኒውሪናርኽር እምንሳዅ ግን።”
46 እንሲን፡ ሲም ነቡካድነጾ ኒብሶትድ ፍግም ዮ ዳኒኤልትል ሰገዱዅ፣ ከበርድዅሉኽር፣ ሰደቐትዲ ልባነዲ ስኵስድኖሉኻ አደዱዅ። 47 እን ሲምኻ ዳኒኤልቲ፡ “እንቲ እና ስቱር ኒስ ወድሕድቶ ገረስራኽር፡ እምንድክ እንታ ጃር፡ ጃር ጃርትታዅዲ ሰየማ አደረዲ ስቱርሲ ወድሕዳዅዲ ግን” ይዅሉ። 48 እንሲን፡ እን ሲም ዳኒኤልቲ ኵብ ሲዅሉ፣ ገሪ እውንኽር እውዅሉ፣ እን ባቢሎንዲ በለድ ኒልክልኻ ሐክማይ እሲዅሉ፣ ናውክ እን ባቢሎንዱ ብልሀቱውድ አወይስኽር ሓለቓ እሲዅሉ። 49 ኰዶኽር፡ ዳኒኤል ሲምሲ ሺወ፡ ሲድራቅዲ ሚሳቅዲ ዓብዲ-ኔጎዲት እን በለድ ባቢሎንዱዅሊ መርሕእት እሰ ሰየምዅሎም፣ ዳኒኤልኻ እን ልጝን ሲምዅሊ እርጕዅ።