\c 1 10

1 ሲም ፋርስዅ ቂሮስ ሰየምሶ ኒሲዀር አመሪል፡ እን ቤልጣሻጽር ይስታዅ ዳኒኤልሲ ራእይ ቋልስትዅሉ። እን ንሽቃኻ እምን ግን፣ እን በሀር እኝሽኽ ሰብት ግን። እን ንሽቀስ አስተብሀልድሮኽር ራእይሲ አስተብሀልድና እውስትዅሉ። 2 እን ወክት እንድድ፡ ኣን ዳኒኤል፡ ሰዃ ኡናራ ስሪዅን። 3 እን ሰዃ ኡናር ደኵራሲክ፡ ነብራ ትክያዅ ቍሊ፣ ስኻ ኣኽን፡ ወይኒ ኰዶ ታምሊ፣ ቋራናኽር ቋርሊ። 4 እን አርባ ሰልፉዅሊ፡ ለጘረጝንዲ ሰጀር ኳሪል፡ እን ወረባ በሀር ጤግረስ ገባ ደውዮ፡ 5 ቋሕሰ መኸልቶሰና፡ይጃብል ላ ኣዳም ታዊና ብልታውራዅ ሰራዅዲ ኒሕቀትሊ ምልምል ቝልፊራ ደሀቡዅ ደበልቶ ህምባዅዲ ቋልዅን። 6 ኒገሮብ ከብሰና፡ ኒገሽኻ ምርክሰና፡ ኒዕልልኻ ሀልሀል ያዅ ለኺሰና፡ ኒከረሽምዲ ኒልኵኵድኻ ብራዅ አስራዲረሰና ብርቕርቕ ያዅ፡ ኒደሀይኻ ከው ገሪውዱ ደሀይሰና እርጕዅ።

7 እን ራእይት ቋላኽርሉ ኣን ደኒኤል ይቱ ግን፣ እን ይዲ እርገው ከውኻ ቋልኒሉ፣ ደአም፡ በሀር ኮት ጒኢ ገምነዲንሎም፡ እግርኖ ትብትኑዅ። 8 ኣንኻ እና ራእይ ኒስ ቋሉ ይቱ ካብቲዅን፣ ላሪ ሕልኽር ከብቲለለ፣ ይወጅህኽር ጂብራሲክ ለወትሱዅ፣ ሒልኽር ቢዅን። 9 ኒድ ደምቢ፡ ኒደሀይ ዋስዅን፣ ዋሰሰነክሉ፡ ይብሶትድ ብሪል ክብርዅ፡ተቓዅ ጅሙዅር አድዅለ። 10 እነሓን፡ ላ ናን ተመድዅለ፣ ይናንትትዲ ይግርፍፍዲ ረጀፉ እⶖጕሲኻ ደውሲዅለ፣ 11 ንኻ፡ “እንቲ ዳኒኤል ገሪዅ እጝከስራኽር፡ ኣን ናን ኵል እኝሻቕሶ ህምበኵን እማ፡ እን ኣን የውሊካ ኣስተብሀልዲ፣ ናዕ ይሮኽር ደውዪ” ይዅለ። እንሲን ንሰና ዮሰነክለ፡ ረጀፉ እⶖጕሲ ጐ ደው ይዅን።

12 ኰዶኽር ንሰና ይኸለ፣ “ዎ ዳኒኤል፣ ጒኢትግ፣ አስተብሀልድቶኽር ኵጃር ገሸል ኵሹት ለጥሲቶኽር የመምራዅ እን ግርጋ ሰልፉኽልድ ተርዮ ኵቆላት ዋስስቱዅ፣ ኣንኽር፡ እን ኵቆላታ ወንተሰስ አዶ እንቶ ህምበኵን። 13 እን ሓለቓ መንፈስ ሲመር ፋርሱዅ ደአም፡ ለገረጝንዲ ላዅ ኳራ ተጣረርዅለ፣ እን ኣዀር ኣኸው ኣሕሉቕልድ ኣኻዅ ሚካኤልኻ ካቢሮለ እንቱዅ፣ ውረድ፡ ኣን ኒል ይቱ እን ሲም ፋርስዅዲ ከብተ እርጋኽር ኣኽነዲን። 14 ናን፡ ኣን እንቶ ህምባዅ፡ እን እንተራዅ ወክትሊ ኵእክሊ ገእይሮ ፈራዅሲ አርእሲስየካ ግን፣ እን ራእይ ተመምሮ ገሪ ወክት ከብተሉ ህምበኵ።”

15 ኒስ ድዉለ እⶖጕሲ፡ ይገሽሲ ብሪል ሉምሲዅን፣ ኣን የውኽር ድድዅለ። 16 ኒድ ደምቢ፡ ኣዳሚንድዅራ ተካዅ ይካናፉትሲ ተመድዅለ፣ ኣንኽር፡ ይአብ ብስቱዅ እማ፡ ጋብያ ተርሲዅን፣ እን ይገሸል ደውዮ እርጋዅስኻ ነሰና ይዅንሉ፣ “ዎ አደራ፣ ኣን እና ራእይ ሰበት ጀረብዅን፣ ሒልኽር ቢዅን፣ 17 ዎ አደራ፣ ይሒል ድⶖስቱዅ፣ ፊዅትያኽር ቂልስዅን፣ ኣን ኵገኝጂና ኵዲ አዋህበ ጋብያ ገረሳዅን?”

18 ሓዲስ ኰዶ፡ እን ኣዳም ተካዅ ተምድዅለ፣ ሒለቲስዅለኽር። 19 ኒ ይኸ፡ “እንቲ ገሪዅ እጝከልስራኽር ኣዳም፣ ጒኢትግ፣ ሰላም ኵዲ ኣኽኒ፣ ክኺንቲ፣ ተብኽር” ይዅለ።

ገበሰነለ፡ ሒል አርዅን፣ “ዎ አደራ፣ ሒል ኡሩዅለ እማ ጋቢ” ይዅንሉ።

20 ንኻ ንሰና ይዅለ፣ “ኣን ውሪዅ ኵል እንቶ ዋነት አርእርዅማ? እን መንፈስ ፋርስርዅሲ እኝሽኽርያ ወለይዶ ወንተርያ ግን፣ ኣን ፈሮሰናኻ ሓለቓ ግሪክዅ እንትሮ ግን። 21 ጃቢሶ ደአም፡ እን ክታብ እምኑዅሊ ከተብሶ ህምባዅሲ ድውየካ ግን፣ ነስ ተጣረርኒል፡ እን እንታ ሓለቓ ሚካኤልድ ንኻ፡ አሪዅ ካባዅለ እላ።