\c 1 11

1 ኣንኻ፡ ዳርዮስ ሜዶንዱዅ ኒአመራ ሰልፉዅሊ፡ ኒት ካብየሉኽር ክኺንቲየሉኽር፡ ደውዮ እርጕዅን። 2 “ናንኻ፡ እን እምንሲ ድወኵንካ እⶖኵዅን፣ እነሓን፡ ፋርስሊ አሪው ሰዃ ሰየም ጕድኖ ግን፣ እን ሰጀርኻ ናድከልድ አወይሲ ገሪዅ ርዱቝ ኣኽሮ ግን። ኒርድቕድ ገሪዅ ሒል አሮሰና፣ ናትክሲ ሲመር ግሪክዅ አወይሲ ጕድድጚሮሎም ግን። 3 እንሲን፡ በሀር ሒልድ ሓከማዅዲ ኒትክ ኒጀረበዅስክ እሳዅዲ፡ ሲም ሒለቱዅ ጕሮ ግን። 4 ኒ፡ ጐሰና፡ ኒሲመር ፋሕ ይቶ ግን፣ ሰጃ ወላውል ሰሚውሊ ኣኽታሲክኻ በንስስጚቶ ግን።

ኒሲመር ኒልድ አስትቶ ግን፡ አሪውድር እውስትቶ ኣኽርነዲን፡ ኒፈደንሊ ደኵቶ ኣኽላ፣ ኒሒልኽር እን ሰልፍዅሰና ኣኽሮ ኣኽላ።

5 “እን ሲም ግብለቱዅ ሒለቱዅ ኣኽሮ ግን፣ ላዅ እን መርሓት ኒደሹልድኻ ኒድ አወይሲ ሒለቱዅ ኣኽሮ ግን፣ ኒሕክምኽር በሀር ኮት ኣኽሮ ግን። 6 ከለለው አመታት ድምብኻ፡ ላ ናን ኣኽድኖ ግን። እን ሲም ግብለትዅድ እቝራ፡ ላዅ ኣኽድኖ መታን፡ እን ሲም ስሐርዅል ፈርቶ ግን፣ ደአም፡ ንር ሒልሲ ተብድሮ ሻኽሮ ዲቶ ኣኽላ፣ ኒዲ ኒሒልድኽር ተብሮ ኣኽላ። እን ግርጋት እንደል፡ ንርዲ እን ንርቲ ክልወውዲ ንርእኽርዲ እን ካቡላ እርገውዲ፡ ደኵኖ ኡውስትድኖ ግን።

7 “ላዅ ንርወንድትልድ ንርኣካንሲ ሻኽሮ ጕሮ ግን፣ ኒ፡ እን ደሽ ሲም ስሐሩዅዱዲ ተሓረብሮኽር ናመሐገይሊ ቱሮኽር ግን። ኒ፡ ናዲ ተሓረብሮ ግን፣ ቂልዶሎምኽር ግን። 8 ናጃርትት ኣኸውሲ፡ እን ሸዅ ምስልታትዲ ካብራን እራኵ ወርከዲ ደሀብዲትልድ ከደምሰውዲት ሰልበ፡ ምስር ብሪል አዶ ፈርዶሎም ግን። ከለለው አመታትድኻ፡ ሲም ስሐሩዅዲ ተሓረብጊ ግጅሮ ግን። 9 እን ሲም ግብለቱዅ፡ እን ብራ ሲም ስሐርዅድዅሲ ወረርዶ ግን፣ ደአም፡ ኒበልድሊ ወንተርዶ ግን። 10 ኒእቝር እኝሽኽሊ ደለምድኖ ግን፣ መሐገይሊ ኣኽታሲክ ስኵርኖ እኝሽኽረውዲ ኒገሸል ደውይድኖ ገረሰግናዅ ኵሪሰና ገሰሳውዲ፡ ደሽ ገሪው እክብድኖ ግን።

11 “ኒደምቢ፡ እን ሲም ግብለቱዃ ሓርቕርቖት ፍሮ ግን እማ፡ እን ሲም ስሐርዅዲ እኝሽኽርዶ ግን። እን ሲም ስሐርዅ ደሽ ገሪው ድኳ እክበን፡ ለተቕስሮ ግን። 12 እን ሲም ግብለቱዅ ደሽ ገሪውሲ ሰልበሰና፡ ኒለበካ ክብርድ እንታኽትሮ ግን፣ ኣሰሓት ኣከውስኻ ኵሮ ግን፣ ደአም፡ ዓገብ እሱⶖጕሲ ፈርዶ ኣኽላ። 13 እን ሲም ስሐርዅ እን ሰልፍ እርገውልድ አወይሲ ደሽ ገሪውሲ እክብሮ ግን፣ ገሪ አመታት ደምብኻ፡ ወንተሮ፡ ትክሰ ደበልቶ ህምበው ደሽሲ አዶ እንትሮ ግን።

14 “እን ወክት እንድድ፡ ገሪው እን ሲም ግብለትዅድ አወይሲ ጕድኖ ግን፣ እን ራእይ ተመምሮ መታንኻ፡ ኵእክ ነበክልድ ዓመጨንቲ ኣኸው ከው ጕድኖ ግን፣ ደአም ዓውቲድኖ ኣኽኒ። 15 እንሲን፡ ሲም ስሐሩዅ እንትሮ ግን እማ፡ ከለብ ገበርዶ ግን፣ እን ከለብስረሪ ዕርዲረትኽር ሻኽሮላ ግን። እን ደሽ ግብለቱ ቃብሊድኖሎም ሒል ብድኖ ግን፣ እን እኝሽኽሊ ፍሪርሰው ድኳ ተብኖ ተሓረብድኖ ኣኽኒ። 16 እን ወረረዃ ኒጀረበዅስክ እሲሮ ግን፣ ላዅ ድኳ ኒቅብላ ደውይሮ ገረሳዅ እላ። ኒ፡ እን ብራ ትክያዅሊ ሓከምሮ ግን፣ ንርቲ ድሂስሮኽር ሒል ዋኒሮሉ ግን። 17 እን ኒሲመርሊ ህምበው ደሽ ናትክሲ አዶ እንትሮ የመምሮ ግን፣ እን ሲም ግብለቱዅድኽር ተዋፈቕሮ ግን፣ እን ሲመርሲ ድሂስሮኻ ኒእቝረት ክኻንዲሮሉ ግን፣ ኣኽን ግራ፡ እን ኒይማም ጠፍሓለሉ፣ እን ኒ ሓሰባዅ ጋርኽር ነፍዕሮሉ ኣኽላ። 18 ኒድ ደምቢ፡ እን በሓር ሸሊ ህምበውሊ ኒገሺ ወንተስነድ፡ ገሪውሲኽር ሻኽሮ ግን፣ ደአም፡ ላዅ መርሓይ ደሽዅ እን ኒከበርስነስ ግምሽዅ እሲሮሉ ግን፣ ኒዳግ ወንተስሮሉ ግን። 19 ኒድ ደምቢ፡ እን ኒበልድሊ ህምበው መሐገያትሊ ኒገሺ ወንተስሮ ግን፣ ደአም፡ ዓጝቀፍሶ ለብሮ ግን፣ ኰዶኽር ቋልስትር ኣኽላ። 20 “እን ኒኣካንሊ ጓዃ፡ እን ክብር ሲመርዅሲ ተከዊስሮ፡ ዌርኮ እክባዅ እኝሻቕሮ ግን፣ ከለለው አመታት ነበክሊኻ ኵውስትሮ ግን፣ ደአም፡ ሓርቕርቖትዲ ሓርብዲሲ ኣኻላ።

21 “ኒአብልክኻ ክብር ሲመርዅ እውስትጋዅሉ ላዅ ቃበብሳዅ ጕሮ ግን፣ እን ከው ዳሕና ኣኽኖ መንደርቱኑ፡ ምለነድ እን ሲመርሲ ሻኽሮሉ ግን። 22 እን ዓደድ እጝገው ደሽ ኒገሽልድ ድድኖ ግን፡ እን ሓለቓ ቆል መእኰቱዅ ድኳ ከብቲሮ ኣኽላ። 23 ኒዲ መእኰት ቱነሪት፡ ምለነድ ኒወራትሲ እሲሮ ግን፣ ከለለው ከውድኻ ስልጠት ከለብርዶ ግን። 24 እን ርዱቕ ብራ እን በለዱዅሊ ህምበው ደሕና መንደርቱኑ ወረርዶሎም ግን፣ ኒእክልዲ ኒአንትትዲ እሲግናዅስኻ እሲሮ ግን፣ እን ኒ ወረረውዲ ሰልበውዲ ማልዲት እን ኒት ተለየውድ በኒሮሎም ግን፣ ኰዶ እን መሐገያትሲ ከሪሮ ሓሰብሮ ግን፣ ኒን ኒኣካናኻ ከለላ ወክትድ ካያ ግን።

25 “ደሽ ገሪውሲ እክቦ፡ ኒሒልዲ ሓጠርዲት ሲም ግብለቱዅድ አወይሲ ጕድሮ ግን፣ እን ሲም ግብለቱዅ ኰዶ ደሽ ገሪውዲ ሒለቱዲት እክቦ፡ እኝሽኽሊ ጕሮ ግን። ኣኽን ግራ፡ እን ጋር ምቝላ ኒድ የመምሳዅ ሰበትድ ናቅብላ ደውይሮ ገረስሮ ኣኽላ። 26 እን መአዲራ ሲሙዅሊ ቍ እርገው፡ ድሂስድኖሉ ወጠንድኖ ግን፣ ኒደሽልድር ገሪው ክርድኖ ግን፣ እን ሽኝሽኽልኽር ገሪው ለብድኖ ግን። 27 እን ለጛ ሰየም፡ ናለፍክድ እከይ ሓሰብድኖ ግን፣ ላ መአዲሪል ከፍ ይኖኻ፡ እኺርኺርሲ ብን ጋብቢድኖ ግን፣ ደአም፡ እን የመምሳዅ ወክት ገእይጋዅ ኣኸውድ፡ ኣኽሮሎም ኣኽላ። 28 ሲም ስሐሩዅ ርድቕ ገሪው ሸኾ ኒበልድሊ ወንተርዶ ግን፣ ኣኽን ግራ፡ ኒለበካ እን ሻትክ መእኰት ዓዶ ጕሮ ግን፣ ምቝላኽር እሲሮሉ ግን፣ ኒድ ደምቢ፡ ኒበልድሊ ወንተርዶ ግን።

29 “እን የመምሳዅ ወክትድኻ ሓዲስድ ግብለትሲ ወረርዶ ግን፣ ወክት ንድ፡ እን ጃበሪዅሰና ኣኽሮ ኣኽላ። 30 ዶንክ ኪቲምሩ ተጣረርድኖሉ ግን፣ ኒለበካኽር ረበሽትሮ ግን። እንሲን፡ ደምቢራ ወንተሮ፣ ኒሓርቕርቖትሲ እን ሻትክ መእኰት አወይሲ ገምድሮ ግን፣ ወንተሮኻ፡ እን ሻትክ መእኰትሲ ባረውሲ ዋስሮሎም ግን።

31 “እን ደሽ ኒውኻ፡ ልጝን ሻትክዲ ኒከልብዲት ረዀስድድኖ ግን፣ እን ግርግል ስኵራዅ ሰደቐትስኽር ደውሲድኖ ግን፣ ኒልኻ፡ ድዳ ነቕሳዅ ጋር ፈንፈንዳዅ እሲድኖ ግን፣ 32 እን መእኰትሲ ዳደውሲ፡ ምለነድ ከቲሲሮሎም ግን፣ እን ናጃርሲ አርአው እክ ደአም፡ ተብድኖ፡ ቃብሊትድኖሉ ግን።

33 “እን ልውሩ፡ ከለላ ወክትድ ሰፍድ ወሪ ለኸድ ለበነን፡ ወሪ ይኸ፡ ሰልብስተነን ወሪ ወረርሰናን ድኳ፡ ገሪውሲ መሀርድድኖ ግን። 34 ለብነሰናኻ፡ ከለላዅ ካበና አርድኖ ግን፣ እምንዱ ኣኽገው ከው ገሪውኽር ናዲ ሕበርሲድኖ ግን። 35 እን የመምሳዅ ወክት ገእይጋዅ ኣኸውድ፣ እን ከው ልውሩ ኣኸውልድ ላውላው ዓጝቀፍስድኖ ግን፣ ኒንኻ፡ እን ወክት ደⶖጎቢዅሊ ኣኽታሲ፡ ጨረይድኖኽር ለጭሕድኖኽር ዓመቓ እጝገው ኣኽድኖኽር መታን ግን።

36 “እን የመምሳዅ ኒውክ ኣኽሮ ዋነውድሉ፣ እን ሲም ኒጀረበዅስክ እሲሮ ግን፣ ናድክ ጃርትት አወይስኽር ኒኣዀርሲ ክብ ስነድ፡ እን ጃርትታ ጃር ኣኻዅድ አወይስ፡ ንድጃብክ ዋስስትጋዅ ጀኸን ጀኺሮ ግን፣ እን ወክት ቀጥብዅ ተመምራሲክኽር ዓውቲትሮ ግን። 37 ኒ፡ እን ጃርትት ኒእክለውዲ እን እኲን እጝከለናዅዲሲ ክብሪ ኡሮ ኣኽላ፣ ኣኻ ጃርስኽር ከበርድሮ ኣኽላ፣ ደአም፡ ኒሹት እና ነልድክ ክብ ሲሮ ግን። 38 ናአብልክ ኰዶ፡ እን ጃር መሐገይዅሲ ከበርድሮ ግን፣ ኒእክል አርእግናዅ ጃርስኽር፡ ደሀብዲ ወርካዲ ካብራን ክርጝዲ ካብር እውዲሲ ከበርድሮሉ ግን። 39 እን ካበና ገብሪዅ ጃሩዅድ ተበው መሐገያትዲ ተሓረብሮ ግን፣ እን ኒድ ሓከምሰውስኻ ገሪዅ ከበርድሮሎም ግን፣ ከው ገሪው አወይሲ ኰዶ ሐከመነት ሃቢሮሎም ግን፣ እን ብረስኽር አረኸድ በኒሮሎም ግን።

40 “እን ወከት ደⶖጎቢዅልኻ ሲም ግብለቱዅ ኒዲ ተሓረብሮ ግን፣ ሲም ስሐሩዅር፡ ኒአፍሩሰውዲ ሰረገላታትዲ ገሪው ዶንክታትዲሲ ደሃፋት ውልዋሉውሰና ኣኾ እንትሮሉ ግን፣ ገሪ በለድስኽር ወረርዶ ግን፣ ኵሪሰናኽር ገፈፉ እⶖጕሲ ናነበክድ ደኵሮ ግን። 41 እን ብራ ትክያዅሲ ወረርዶሉ ግን፣ ገሪ በለድኽር ኒናንሊ ለብድኖ ግን፣ ደአም፡ ኤዶምዲ ሞኣብዲ መርሓት ዓሞንዱዲ፡ ኒናንተልድ ሽልቍርድኖ ግን። 42 ኒሕክምሲ ገሪ በለድሊ እዳንድሮ ግን፣ ምስርኽር ሽልቍርቶ ኣኽላ። 43 ኒ፡ እን እንድባ ደሀብዲ ወርካዲሩዅዲ፡ እን ምስሩውድ ርድቕ ናትክዲት ሻኽሮ ግን፣ ከው ሊብዪውዲ ኢትዮጵዪውዲኽር ሓከምስድኖሉ ግን። 44 ኣኽን ግራ፡ እን ብሪ-ክስጘዲ ስሐዲር ገፍድ ሀደግሳዅ ረበሽሮሉ ግን እማ፣ ገሪውሲ ድሂስሮኽር ጨነትድሮኽር፡ ገሪ ቀጥብድ ጕሮ ግን። 45 ኒ፡ እን ኣፍሉት ኒውሲ፡ እን ኣብሑር ነበክል፡ እን ምልምል ሻትክ ጊራ ይዅሊ ተከልዶሎም ግን፣ ደአም፡ ደⶖጎቢል ገእይሮ ግን፣ ላዅር እልልዶሉ ኣኽላ።