\c 1 12
1
“እን ወክት እንድድ፡ ኵእክ መታን ደውያዅ እን በሀር ሓለቓ ሚካኤል ጕሮ ግን። ኣዳሚንድቝር መንደርትድኖ ተርይናዅ ወክትልድ ተርሰ ንኪ ቂር ኣኽራሲክ ኣኾ አርእጋዅ፡ በሀር ኮት ወክት ጅርበቱዅ ኣኽሮ ግን። ኣኽን ግራ፡ እን ወክት እንድድ፡ ኵእክልድ ናስⶖ እን ክታብሊ ከተብሶ ድየውክ ደአንድኖ ግን።
2
እን ብሪል ደብተ ገኝጆ ህምበውልድ ገሪው ጕድኖ ግን፣ ነበልጝ ዲመር ፊዅትሊ፡ ናበልጝኻ ስማሳዅዲ ዲመር ጅርበትዲትል ጕድኖ ግን።
3
እን ልውሩ በሪህ ሰሚዅሰና፡ እን ገሪውሲ ጨዳቐትሊ ወንተሰውኻ ሽጝግርውሰና፡ ዲማ ዳይም በርህድኖ ግን።
4
ዎ ዳኒኤል፣ እንቲ ደአም፡ እን ወክት ደⶖጎቢዅሊ ኣኽታሲክ እና ቆላት ክታቡሲ ኣበዲሎም፣ ሓተሚሎምኽር። ገሪው ነራኽር-እንደራኽር ጋጚድኖ ግን፣ አርእጝኽር በጀኽሮ ግን።
5
ኣን ዳኒኤል መርኪስዅን፣ እንሓን፡ ይገሸል ለጛ ደው ይኖ እርግኑዅ፣ እን ላዅ ወረቢ ነረሲ፡ እን ሊጘርኻ ወረቢ እንደረሲ።
6
ናልድ ላዅ፡ እን ዓቝ ወረቢውድ አወይሲ እርጋዅ፡ ሰረን ብልታውረው ሰራዅ፡ “እና ፈከርደው ጋራት ነን ናድⶖጎባ ኣውን ኣኽሮ ግን?” ዮ ወጝቀርዅሉ።
7
እን ዓቝ ወረቢውድ አወይሲ እርጋዅ፡ ሰረን ብልታውረው ሰራዅ፡ ኒናን ላውዲ ሸጝገብዲት ሰሚል ኣኽታሲ ክብሰ፡ “ወክትዲ ኣውካትዲ ገፍ ወክትዲሲ ኣኽሮ ግን፣ እን ከው ሻትካናዅ ሒል ደⶖጎባ ከርተሰና፡ እና ጋራት ነን ናውክ ተመምሮ ግን” ዮ እን ዲማ መንደርታዅድ ሸሩ እⶖጕሲ ዋስዅንሉ።
8
ኣን ዋስዅን፣ ደአም አስተብሀልድሊ፣ ንድኻ፡ ዎ አደራ፣ ደⶖጎባ ንዱዅ ውረኒ ኣኽራ?” ዮ ወጝቀርዅን።
9
ንኻ ንሰና ይዅለ፣ “ዎ ዳኒኤል፣ እና ቆል ደⶖጎባ ወክትሊ ኣኽታሲክ ኣበድሳዅዲ ሓተምሳዅዲ ኣኽነዲን፣ ፈሪ፣
10
ገሪው፡ ነገይድኖኽር ለጭሕድኖኽር ዓመቓ እጝገው ኣኽድኖኽር ግን፣ እን ምቝልኻ ናምቝልናርሊ ተብድኖ ግን። እን ምቝልድ ላዅ ናልድ ድኳ አስተብሀልድሮ ኣኽላ፣ እን ልውሩ ደአም፡ አስተብሀልድድኖ ግን።
11
“እን ግርግል ስኵራዅ ሰደቐት ደውየንትልድር እን ድዳ ነቕሳዅ ፈንፈንዳዅ ጋር ተርያዅ ወክትልድር ተርዮ፡ ሲሕዲ ለጛ ሊኽዲ ሰስረጝንዲ ግርጋት ኣኽሮ ግን።
12
እን ሰብር እሳዅዲ፡ ሲሕዲ ሰዃ ሊኽዲ ሰዀረጝንዲ ግርጋት ኣኽታሲ ጨበራዅዲ፡ ገውርሳዅ ግን።
13
“እንቲ ደአም፡ ደⶖጎቢል ኣኽታሲ ፈሪ፣ ፊዅቶ ግን፣ እን ግርጋት ደⶖጎቢውልኻ እን ኵድ ደለማዅ ርስቲት ከለብርቶ ጕቶ ግን።”