¹ Kumazuba azo, kwakaba ulimwi inkamu inkando, alimwi kakwiina chakulya. Jeso wakoompolola bashichiiya bakwe wabaambilaati, ² "Ndafwila inkumbu inkamu yezhi kaambo bakala ame kale mazuba otatwe alimwi kwiina nchibalya. ³ Kuti ndabeta kwaamba baye kumaanda abo kwiina kulya, balaba nibawinzuka munzhila. Bamwi bahwa kulaale." ⁴ Bashichiiya bakwe bakamutaba ati, nkukwi kutukozha kuyana shinkwa mono mubusena ushikwana bantu ba ⁵ Wakababuzha, "Shinkwa shongaye shimukwete?" Bakaamba ati, "Chiloba." ⁶ Wakaamba chansana kwi bunga kwaamba bakale anshi. Wakabweza shinkwa shili chiloba, wapa kulumba, ukushikomauna. Wakashipa bashichiiya bakwe kushibika nkubabele, bamane bakashibika nkubabele bantu. ⁷ Kabakwete utuswi tongaana, amane wakapa kulumba, wakaamba chansana ku bashichiiya kwaamba babape usheshi asho. ⁸ Bakalya bakekuta, ukubwezelela tupazha pazha twakakomauka, shinzuma shili chiloba. ⁹ Bantu kabashika ku shuulu shone. Amane wakabamwaazha. ¹⁰ Ngoonaawo wakanjila mubwato ubashichiiya, bamane bakaya kubusena bwa Dalumanuta. ¹¹ Ndilyona ba Falisi bakashika bakanka kuzhanya aze. Bakazanda kwakwe shitondezho kuhwa kwizeulu, kumusunka. ¹² Wakalishinshimukila mumoza wakwe ukwaamba ati, "Kaambooyi musela wezu nchuukapula shitondezho? Chini chini ndamushimwina, kwiina chitondezho chikaapewa kumusela wezu." ¹³ Amane wakabashiya, wakenjila mubwato alimwi, waya kumutala umwi. ¹⁴ Inzho bashichiiya bakaluba kubwezelenzha chinkwa. Kabakwete bulyo chomwi chinkwa mubwato. ¹⁵ Wakabalumika , waamba, "Amulangishe ukupakamana kubulohu bwaba Falisi u bwaka Helodi." ¹⁶ Bashichiiya bakakazhanya beni ubeni ukaambo kakuti kabayina shinkwa. ¹⁷ Nakachiteelela chechi, wakababuzha ati, "Kaambooyi mulakazhanya makani akubula shinkwa? Sa tamuna kubona na kuteelelesha? Sa mwaleka kutelaika? ¹⁸ Mulikwete menso, sa tamuboni? mulikwete matwi, sa tamuteeleli? Sa tamuzhibaluka? ¹⁹ Lelyo nindakakomauna shinkwa kuli bali shuulu shosanwe, nshinzuma shongaye shimwakabwezelela shatupazha pazha twa shinkwa? Bakamwiingula ati, "Ikumi u shobile." ²⁰ "Lelya indakakomauna shinkwa shili chiloba ku bantu bashika kushuulu shone, shili shongaye shinzuma shakezula tupazha pazha twa shinkwa nshimwkabweza?" Bakaamba kwakwe ati, "Chiloba." ²¹ Wakaamba ati, "Sa tamuna kuteelelesha?" ²² Nibakashika ku Betisayida. Bantu bakamuletela mulombwana moofwu bamukumbila kwaamba ati amukwate. ²³ Jeso wakamukwata wezu mulombwana kwitashi amane wamutola ansengwe umunzhi. Naakamana kufwila mate ukumwampa matashi akwe, wakamubuzha, "Sa kuli nchiwabona?" ²⁴ Wakalyaalala, u kwaamba ati, ndabona balombwana balalibonya ukoya masamu aaya bweenda." ²⁵ Alimwi wakamubika matashi kumenso, ulimwi wezo mulombwana wakaayalula menso, kubona kwakwe kwakazhoka, wakashibona shintu shoonse kabotu mbushiboneka. ²⁶ Jeso wakamutuma kumunzhi wakwe u kwaambaati, "Utakaunjili munzhi." ²⁷ Jeso wakeenda u bashichiiya bakwe kuya muminzhi ya Kayisaleya Filipi. Nibakaakuya munzhila wakababuzha bashichiiya bakwe, "No bantu balaamba ati ndimeni" ²⁸ Bakamwiingula baamba ati, 'Johani mupapatizhi. Bamwi ati, 'Elija,' ulimwi bamwi ati, 'Umwi wabashinshimi.''' ²⁹ Wakababuzha abo, "No umwe mulaamba ati ndimeni?" Pita wakaamba kwakwe ati, Ndiwe Kilisito." ³⁰ Jeso wakabashinka waamba kutabi naaba womwi ngubakashimwina. ³¹ Wakakanka kubayiisha kwaamba Mwanaa Muntu ulyeelele kupenga mushintu shinji shinji, ulimwi ulakakakwa kubando kando ulimwi uku bapayizhi bakando ulimwi ukulembi, ulimwi ulakayayiwa, kwayita mazuba otatwe ulakabuka. ³² Wakaa amba aza makani chakutasoseka. Ngoonaawo Pita wakamubweza kumabali ukutalika kumulemanina. ³³ Pele Jeso wakachindulukila ku bashichiiya bakwe amane wakamulemanina Pita waambaati, "Ba kumanuma kwangu, Shatani! Tubikile muzeezo wako ashintu shaka Leza, pele ashintu shaku bantu." ³⁴ Ngoonaawo waketa imbunga u bashichiiya bakwe antoomwi, u kubaambila ati, "Nakuti kuli uzanda kuntobela, ulyeelele kulyaaba lwakwe mwini, abweze chichinkano chakwe, amane anchilile. ³⁵ Woonse uzandisha kufwutula bumi bwakwe ulakabuluza, ulimwi uuluza bumi bwakwe a kaambo kangu ulimwi u mulumbe ulafwutula bumi bwakwe. ³⁶ Chilayohwaayi muntu kulela luundu loonse u kuluza bumi bwakwe? ³⁷ Nchiinzhi chaakonzha kupa muntu kuchinchanya u bumi bwakwe? ³⁸ Woonse umfwa insoni ulimwi umazwi angu momu mubumambe ulimwi u musela wezu wa bashishibi, Mwanaa Muntu ulakamufwa insoni akazhiza mu bulemu bwaka Ushi antoomwi u Bangelo Basalala."