¹ Jeso waavwa koko ukuya kuchishi cha Judeya u chishi chili kumutala wa lweenje lwa Joodani, Bantu banji banji bakazhiza. Wakabayiisha umbona, mbwakuchita lyoonse. ² Ba Falisi bakeza kumusunka uku mubuzha, "Sa ku mulawo chililuleme mulombwana kuleka mwinakwe?" ³ Wakabaingula ati, "Anu Mozesi wakamulailila buti? ⁴ Bakaingula ati, "Mozesi wakahumizha mulombwana kulemba chipepa chakulekana amana wamuleka. ⁵ "Nkaambo kakuzuma myozo kwenu nchaka mulembela mulawo wezu," Jeso wakabashimwina ati, ⁶ "Pele kuvwa kumalengelo, 'Leza wakapanga mulombwana umukaintu.' ⁷ 'Ubobo mulombwana ulakashiya baushi ubaina ukukakatila ku mwinakwe, ⁸ Alimwi balakaba muntu womwi 'Tabachili bobile,pele mubili womwi. ⁹ Nkambo kako nchaswanganya Leza antoomwi, kwiina muntu wandanya." ¹⁰ Inzho nibakakuli munganda, bashichiya bakamubuzha alimwi makani azo. ¹¹ Wakabambila ati, "Wezo uleka mwinakwe ukutwala mukaintu unji wachita mamambe. ¹² Aze mukaintu uleka mulumyakwe ukutwalwa kunji, wachita mamambe." ¹³ Inzho bakamuletela twana kwamba atwaampe, pele bashichiiya bakabakasha. ¹⁴ Jeso abone bobo, wakabalemanina, wabashimwina ati, "amubaleke bana bashoonto bazhize kuli ume, mutabakasha, nkambo bwami bwakwizeulu mbubwabo bali ukoya mbabo. ¹⁵ Nchobeni ndamushimwina ati, kufwumbwa wezo utatambuli bwami bwa Leza ukoya mwana mushoonto takenjili." ¹⁶ Inzho wakabweza twana mumatashi amane watulongezha nakutwaampa matashi amitwi. ¹⁷ Inzho nakakuya bwenda munzhila, kwakamulukankila mulombwana umwi wamusunkumanina, wamubuzha ati, "Mwiiyi mubotu, Nchinzhi nchinkachita kwamba njane bumi buteeli?" ¹⁸ Jeso wakamba ati, nkambo nzhi ulenta ati mubotu? Kwiina muntu mubotu chita leza iche. ¹⁹ Uliizhi milawo ya Leza: 'Utayaya, utachiti mamambe, utebi, utapi bumboni bwakubeya, utabi shimakulo, lemeka bauso ubanoko.''' ²⁰ Wezo mulombwana wakataba ati, "Mwiiyi kuvwa kubwana bwangu kwiina naba womwi mulawo ngwindatakachilia." ²¹ Jeso wakamulangilila cha lufuno. ukumushimwina ati, "chintu chomwi chisheele. Ulyelele kuuzha shoonse shuukwete amana ukape bapushi, ulakabuyana buhubi kwizeulu. Wamana uzhize unchilile." ²² Pele nkaambo ka twambo totu wakalibonya kulemana amane wakaya umbukali, nkambo kahubile. ²³ Jeso wakalanga langa amane wambila bashichiiya ati, "nchizumu kubantu bahubi kunjila mubwami bwa Leza." ²⁴ Bashichiya bakazhingwa mazwi aza.Jeso wakabambila alimwi ati, "Bana, mbuchili chizumu kunjila mu bwami bwa Leza! ²⁵ Nchuuba inkamela kunjila mulinso lya nsonde kubaazha muhubi kunjila mu bwami bwa Leza." ²⁶ Bakazoowa chini chini amane baatalika kubuzhanya ati, "Inzho nguni ukonzha kufutulwa?" ²⁷ Jeso wakabalangilila wabambila ati, "Kubantu nchizumu pele kwa Leza nchuuba." ²⁸ Pita wakaamba ati, "Bona, uswe twakashiya milimo yoonse twakuchilila." ²⁹ Jeso wakaamba ati, "Chini chini ndamushimwina ati, kwiina naaba womwi wakashiya inganda yakwe nibaba banina balombwana nibaba bamakaintu naaba baina naaba baushi nibaba bana niba myuunda ukaambo kangu u makani mabotu ³⁰ utakapewa bulumbu bunji bunji kuchiindi cheno muchishi mono: maanda banina balombwana ubakaintu bamaina u bana u myuunda kubiklizha u mapenzhi, u muchishi chiza, bumi butamana. ³¹ Pele banji banji bataanzhi balakaba bashalizhi amana bashalizhi bataanzhi." ³² Kabaya bwenda munzhila iiya ku Jelusalema, Jeso kali kumbele lyabo. Bashichiya bakazhingwa, ubabo bakuli munshi kabafwile bukandu. Amane Jeso wakatola bashichiya ambali ulimwi wakatalika kubambila shizanda kumchitikila. ³³ "Amubone, tulaya ku Jelusalema, mwanaa muntu ulakaabwa ubapaizhi bakando ubalembi.Balakamupa mulandu wakuyaiwa ukumwaaba umatshi abantu bakunze. ³⁴ Balakamusabuzha, ukumufwila mate, kumuma, uku muyaya. Pele kubuzuba bwatatu ulakabuka." ³⁵ Jemusi u Johani, banawe Zebedi baeza kwakwe bamwambila ati, Mwiiyi, tulzanda utuchitile kufumbwa nchitukalomba." ³⁶ Wakabambila ati, "Nchinzhi nchimuzanda ati muchitile?" ³⁷ Bakamba, Tuhumizhe tukakale aze mubulemu, umwi kwitashi lyako lya lulyo amana umwi kulumwenshi." ³⁸ Pele Jeso wakabaingula ati, "Tamuchizhi nchimulomba. Sa mulakonzha kunwa inkapu njinkanwa naba kwita mu lupapatizo ndwinkapapatizwa?" ³⁹ Bakaingula ati, "Tulachikonzha." Jeso wakabambila ati, mu nkapu mwinkanwa amwe mulanwa umu lupapatizo mwinkapapatizwa amwe mumukapapatizwa. ⁴⁰ Pele ukaakala kululyo nakulumwenshi takuli kwangu kupa, pele kuli babo babambililwe." ⁴¹ Babo bashichiya bali ikumi nibakatelela, bakalemanina ba Jemusi u Johani. ⁴² Jeso wakabompolola boonse wabambila ati, "Mulizhi ati babo bendelezha bwami bwakunze balabendelezha, ulimwi babo bali kumbele balasebezha kami kami ali mbabo. ⁴³ Pele kuli umwe tachelele kuba bobo pe.Kufumbwa wezo uzanda kuba mukando akati kenu ulyelele kuba muzhike wenu, ⁴⁴ Alimwi woonse uzanda kuba kumbele ulyelele kuba muzhike waboonse. ⁴⁵ Ukuti Mwana muntu wina kwiza kusebezelwa, pele kusebezela, ukupa bumi kubantu boonse." ⁴⁶ Bakashika ku munzhi wa Jeliko. Nibakavwa mu Jeliko uba shichiiya bakwe inkamu ya bantu, mwanakwe Timeyasi, Batimeyasi, mofwu shikulombelela,kashite kumbali kunzhila. ⁴⁷ Nakatelela ati ngu Jeso waku Nazaleta, wakatalika kupozomoka ati, "Jeso, mwanakwe devidi, mfwila luse! ⁴⁸ Banji bakamulemanina mulombwana, ukumwambila ati aliinze. Pele walo wakapozomoka chansana, "Mwanakwe Devidi, mfwila luse!" ⁴⁹ Jeso wakazhima wabambila ati bamwite. Bakamwita mulombwana mofwu, bamwambila ati, Utatiyi! Zhimuka! Ulakwita." ⁵⁰ Wakachisowa chikobelo chakwe, wazhimuka,weza kwa Jeso. ⁵¹ Jeso wakamwingula ati, Nchinzhi nchuzanda kwamba nkuchitile?" Mulombwana mofwu wakamba ati, "Mwiiyi ndazanda mbone." ⁵² Ngona Jeso wakamwambila ati, "Koya." Lushomo lwako lwakuponya." Ndilyona wakabona ulimwi, alimwi wakamuchilia mu nzhila.