¹ Saa twatalika alimwi kulilumbaizha lwesu tubeni? Uswe tatuzanda makalata a kutupandulula kwenu naaba kuhwa kwenu, u koya bantu bamwi, naambuti? ² Umwe lwenu nubeni ndimwe lukalata lwesu lolo lutupandulula, lulembe a myonzo yesu, luzhibilwe alimwi lubalwa bantu boonse. ³ Umwe mulatondezha kwaamba ati muli lukalata lwakahwa kwa Kilisito, nchichihwa mu mulimo wesu. Chechi chiina nichakalembwa u inki pele ku Moza waka Leza u pona. Chiina nichakalembwa epampasha lyebwe, pele epampasha lya myonzo ya buntu. ⁴ Amana lolu ndu lushomo ndutukwete kwiita mwa Kilisito ambele lyaka Leza. ⁵ Tatulizhi kabotu mukati kesu tubeni kulibanda kufwumbwa chintu kwaamba ati chakahwa kwesu. Pele, insana shesu shili mwa Leza. ⁶ Ngu Leza wakatupa kulozha kuba basebezhi ba chihuminano chipiya. Chechi nchihuminano kutali ku lukalata pele ku Moza. Kaambo lukalata lulayaya, amana Moza ulapa bumi. ⁷ Inzho milimo ya mulawo nja lufwu--yezho yakaakubezelwe a mabwe--yakashika mu bulemu bobo bana ba Izilaili kabatalozha kubulangilila bushu bwaka Mozesi. Chakaba u kaambo ka bulemu bwa ku bushu bakwe, bulemu bobo bwakaakuya bumana. ⁸ Buli buti bulemu bobo bwa mulimo wa Moza mbuukakaba? ⁹ Naakuti mulawo u tuletela lufwu kookwete bulemu, chilabaala buti mulawo wa bululami mbuukwete bulemu! ¹⁰ Chini chini, checho chalo chakaakukwete bulemu ninzho chiina linji bulemu kucheno chiindi, kaambo ka bulemu bobo bwiitilila bobu. ¹¹ Naakuti checho chalo chakaakumana kachikwete bulemu, no chili buti kuli checho chikalilila bulemu mbuchikwete! ¹² Bolya mbutukwete bulangizhi buli bolya, saa tulaamba chakutatiya. ¹³ Tatuli u koya Mozesi, wezo wakalibika kasani a bushu bwakwe kwaamba ati bana ba Izilaili batachilozha kumulangilila ku bulemu bobo bwaakumana. ¹⁴ Pele mizeezo yabo keeli mizumu keetalozha kuteelela. Kushika u bono buzuba, awo babala mu chihuminano chakale kale, kasani kalya nkukona nkukachili. Kayina nikakakushiwa, kaambo mwa Kilisito bulyo mukakonzha kukushiwa. ¹⁵ Pele kushikila u bwasunu, kufwumbwa bulyo ibuka lyaka Mozesi lyabalwa, kasani kalayala myonzo yabo. ¹⁶ Pele lelyo muntu a chindulukila ku Mwami, ati kasani kakushiwa. ¹⁷ Inzho Mwami ngu Moza. Koko koonse Moza wa Mwami nkuubele, kuli lwaanguluko. ¹⁸ Inzho toonse uswe, nitukwete mashu mahumbule, tulabona bulemu bwa Mwami. Tulabambululwa ku bulemu mbubona kuhwa ku bulemu bobu kuya ku bulemu bumwi, mbubona mbu buhwa ku Mwami, mbwaali walo ngu Moza.