¹ Ubobo, u kaambo kakuti tulikwete mulimo wezu, alimwi mbubona mbutwakatambula luse, amana tatuzhokela munshi. ² Pele bulyo, twakashikaka shoonse shiseseke alimwi inzhila shiyazha insoni. Tatucheenda linji mukusesaika, alimwi tatwaatoli munzhila imwi mazwi a Leza, pele kwiita mu kwaamba bwini, tulalihuminina lwesu tubeni ku mizeezo ya umwi umwi a bushu bwa Leza. ³ Pele naakuti mulumbe wesu ulisesekelwe, ati ulisesekelwe kuli babo baya kuzonaunwa. ⁴ Kwaakuli bobo, leza wamu luundu mono wa wofwaazha mizeezo yabo itashomi. Kwamana, tabalozha kubona mumuni wa mulumbe wa bulemu bwaka Kilisito, walo nguchinkozha chaka Leza. ⁵ Tatukambauki lwesu tubeni, pele Kilisito Jeso Mwami, amana u koya basebezhi u kaambo kaka Jeso. ⁶ Leza mwini inguwe wakaamba ati, "Mumuni ulakamunika kuhwa mu mushinze." Wakamunika mu myonzo yesu, kupa mumuni wa luzhibo wa bulemu bwaka Leza a bushu bwaka Jeso Kilisito. ⁷ Pele uswe tulikwete lubono muntesho sha bulongo, kwaamba chibonwe kuti insana inkando shibaala nshaka Leza kutali kwesu pe. ⁸ Uswe tulapenzhiwa munzhila shoonse, pele tatukakilwa. Tulazungaana pele tatumaninwa bulangizhi. ⁹ Tulapenzhewa pele tatusheele tubeni; tulaumwa anshi pele tatushanauka; ¹⁰ lyoonse tuleenda mumubili wesu wa lufwu lwaka Jeso, kwaamba ati bumi bwaka Jeso bulibonye mumubili wesu. ¹¹ Inzho kuli uswe nituchipona lyoonse tulatolwa ku lufwu u kaambo kaka Jeso, kwaamba ati bumi bwaka Jeso bukazubululwe mu mibili yesu. ¹² Ubobo lufwu lulachita mulimo mukati kesu, pele bumi tabuchiti mulimo mwenu. ¹³ Pele tulikwete moza wa lushomo u kozhene kwiingayina u checho chalo chakalembwa: "Ume ndashoma, amana Ume ndakaamba." Aswe mbubona tulashoma, amana aswe mbubo tulaamba, ¹⁴ kaambo tulizhi kwaamba wezo wakabusha Mwami Jeso ulakatubusha aswe antoomwi u Jeso a katulete antoomwi amwe a bushu bwakwe. ¹⁵ Kaambo shintu shoonse shili mu kaambo kenu, kwaamba ati luse lolo lushika ku bantu boonse lulete kulumba kunji kunji ku bulemu bwaka Leza. ¹⁶ Uswe tatuzhokela munshi. Nikuba kuti ezulu a mubili tulaya bumana, mutuli mukati tulabukulushiwa buzuba u buzuba. ¹⁷ Inzho kuchiindi cheno, kupenzhiwa kuubauba kulazhala u kuleta mukuli utamana wa bulemu bobo bubaala a chipimo choonse. ¹⁸ Kaambo tatulangilila ku shintu shesho shibonwa pe, pele kushintu shesho shalo shitabonwa. Shintu shesho shalo shibonwa nshachiindi cheno bulyo, pele kushintu shesho shalo shitabonwa sha lyoonse.