¹ Ume ndazanda kwaamba ati ambweni mulambika ame ukoya mulimbushi. Pele eeye mulambika ame mbubona! ² Kaambo Ume ndamufwila bufwi. Ume ndamufwila bufwi bwabu Leza, kaambo Ume ndakamushomezha kumutwazha ku mulombwana womwi u twala. Ume ndakamushomezha kuya kumutola ukoya nakalindu wiina kampenda kwa Kilisito. ³ Pele Ume kumwi ndifwile bukandu, ukoya muzoka wakachenga Eva kwiita mubuchenzhi bwakwe, mizeezo yenu ilakonzha kuchengwa kuhwa kubwini alimwi u busalazhi mwa Kilisito. ⁴ Ambweni kulakaba umwi uzhiza kwiza kukambauka Jeso umwi kubaala wezo uswe ngutwakakambaukila. Naa nikuba mwakatambula moza usalala ushiyene kubaala wezo ngumwakatambula. Naa ambweni mwakatambula mulumbe ushiyene kuli wezo ngumwakatambula. Mulashibika sheshi shintu mukabotu! ⁵ U kuti Ume ndatelaika kwaamba ati nshilitengula kuli babo balibanda kuba batumwa beni beni. ⁶ Pele nikuba ati Ume nshili muyiishe kuba muuza mukukanana, Pele Ume ndikwete luzhibo. Muzhila ili yoonse alimwi u mushintu shoonse twakashibika a tuba kuli umwe. ⁷ Saa Ume ndakachita chibi mukulifwiinsha kwangu kwaamba ati umwe musumpulwe? Kaambo Ume ndakakambauka mulumbe waka Leza bwaangulukile kwenu. ⁸ Ume ndakebila shimwi shikombelo kwiita mukuhumina buyohwi kuhwa kwabo kwaamba ati Ume ndozhe kumumanina mulimo. ⁹ Lelyo Ume indakaakuli amwe alimwi ndakaakwiina chinkwete, ndiina muntu ngundakapa mukuli. Kaambo shesho nshindaakuzanda shakachitwa u bakwesu bakahwa ku Masedoniya. Mushintu shoonse Ume ndakalikusha lwangu ndimwini kuba mukuli kuli umwe, alimwi ndatolelela kuchita bobo. ¹⁰ Mbubona bwini bwaka Kilisito mbubuli mwangu, koku kulyeensheensha kwangu kwiina u kaakukasha mu masena woonse amu Akaya. ¹¹ Saa? Kaambo Ume nshimufwini? Leza mwini nguuzhi. ¹² Alimwi kuli checho Ume chinchita ndatolelela kuchichita, kwaamba ati Ume ndozhe kubakasha babo bazanda kuba ukoya uswe mushintu shesho nshibalyeenshensha. ¹³ Kaambo bantu bali bolya mbatumwa bakuchenda alimwi mbasebezhi ba shiluchengo. Balalibonya ukoya mbatumwa baka Kilisito. ¹⁴ Alimwi chechi tachizoosha, kaambo u shatani lwakwe mwini ulalibeesha kuba angelo wa mumuni. ¹⁵ Tachizoosha maningi naakuti basebezhi bakwe abo balibonye ukoya besebezhi babululami. Mamanino abo alakaba ukoya mbuli michito yabo mbwiibele. ¹⁶ Ume ndaamba alimwi ati: Kutabi naaba womwi utelaika kwaamba ati Ume ndi mulimbushi. Pele naakuti umwi wachita bobo, a muntambule ukoya mulimbushi kwaamba ati Ume ndozhe kulyeensheensha ashoonto bulyo. ¹⁷ Checho Ume nching'amba mukulyeensheensha koku---Ume nshaamba mbuli Mwami mbwaakonzha kwaamba pe---Ume ndaamba ukoya mulimbushi. ¹⁸ Mbukuli ati bantu banji banji balalyeensheensha kwiingayina u shiyanza shaku mubili, Ame mbubona ndalyeensheensha. ¹⁹ Kaambooyi mulabalekela mu bulimbushi. Kakuli umwe nubeni muli basongo! ²⁰ Kaambo umwe mulamulekela umwi kumuchita buzhike, naakuti wamuzonauna, naakuti wamutengula umwe, naakuti ulalisumpula lwakwe mwini, nikuba kuti wakuuma lubayi a menso. ²¹ Ume ndaamba ati kunsoni shesu twaakuli balengushi kuchita bobo. Naakuti umwi wenu ulalyeensheensha---Ume ndaamba ukoya mulimbushi---Ame mbubona ndalyeensheensha. ²² Baakuli ba Hebulu? Ame mbubona. Baakuli ba Izilaili? Ame bubona. Baakuli ba luhubo lwaka Abulahamu? Ame mbubona. ²³ Baakuli basebezhi baka Kilisito? (Ume ndaamba ukoya ndaakuli musondoshi.) Ume ndabaala: ku milimo mikando, kubikwa muntolongo, mukuumwa kunji kunji, u mukuzanda kuyayiwa mushiindi shinji shinji. ²⁴ Kuhwa kuba Juda Ume ndakaumwa shiindi shosanwe "mitatula makumi otatwe u mitatula ifhuka." ²⁵ Shiindi shotatwe ndaumwa misako. Alimwi lweendo lomwi ndakayaswa mabwe. Shiindi shotatwe ndakafwilwa bwato. Chiindi chimwi ndakazumbaanyiwa mubwato muunza u mashiku a lwaatele. ²⁶ Shiindi shinji shinji ndakaakuli u mishinzo, mapenzhi mu lweenje, mapenzhi kuhwa kubafwumpi, mapenzhi kuhwa ku bantu mbutukala abo, mapenzhi kuhwa kubahwa mashi, mapenzhi mu minzhi mikando, mapenzhi mulukula, mapenzhi a lwaatele, mapenzhi kuhwa ku bakwesu babeshi. ²⁷ Ume ndakaakusebeza chansana alimwi u kupenzhewa, u kutoona kwa mazuba manji manji, kwiita muzala alimwi u kufwa inyota, shiindi shinji shinji ndaakuliimya kulya, ndakaakufwa impeyo alimwi u kubula chakusama. ²⁸ Kusanganya kuli sheshi shoonse, a buzuba u buzuba ndakaakulibilika kushikombelo shoonse. ²⁹ Nguni mulengushi, alimwi Ume shili mulengushi? Nguni wezo wakalebwa, alimwi Ume tachinchisa ku monzo? ³⁰ Naakuti ndyeelele kulyeensheensha, Ume ndalyeensheensha mu bulengushi bwangu. ³¹ Leza alimwi Ushi waka Mwami Jeso, wezo walo mulongezhe kwa lyoonse, ulizhi kwaamba ati Ume shichengi! ³² Ku Damasikasi, muleli waakuchilila Mwami Aletasi wakabika mulindizhi mu munzhi mukando wa Damasikasi kwaamba ati ume bankwate. ³³ Pele Ume ndakaselukila muchinzuma kuhwila e windo lya bwaanda, amana ndakaloboka kuhwa ku matashi abo.