¹ पिच्छुसे फिर के समुन्द्रके किनारे बा शिक्षा देनलागो। बाके चारौघेन भीड़ यितनो भरी रहए की बा समुन्द्र में भई एक नैयाँमे चढो और बामे बईठगव । आदमी समुन्द्र के किनारेके ढाहोमे बईठेरहयँ। ² और बा उनके कहानी में बहुत बात सिखाई। बा अपनो शिक्षामे उनसे आईसे कही: ³ "सुनओ 'देखओ, एक आदमी बीज बोनके निकरो।" ⁴ और बोत पेती कुछ बीज डगर में पडे और बे बीज चिरैचुरगनि आएके खाए डारीं। ⁵ कुई बीज पत्थर बारे ठाँउमें पडे, जहाँ बहुत मट्टी न रहए, और मट्टीकी गहेराई न हुईके, बे जल्दी जमिगए। ⁶ घामु एक्दम जोडसे नीकरो और पीछू पिङगा डुङ्गए, जर न हुइके बे अइल्याए गय। ⁷ कुई बीज काँटोन के बिचमे पडे। काँटो बढो और पेंड बाँझे हुइगए, और बामे फरा न लगे। ⁸ पर कोई बीज अच्छी जमिनमे पडे, और जमे और बढके तीस गुना, साठ गुना, और सय गुना फरा दईं। ⁹ और बा कहि, “जौनको सुनन बारो कान हए, बा सुनए।” ¹⁰ जब बा इकल्लो भव, तओ बाहृ जनी चेला और बाके आसपास भए, बे बासे कहानीके बारेमे पूछीं। ¹¹ बा उनसे कहि, “परमेश्‍वरको राजको भेद तुमके दओगव हए, पर बाहिर बारेनसे सब कहानीमें कहोजात है। ¹² कि बे देखन त देखत हएँ, पर देख न पात् हएँ, सुनन् त सुनत् हएँ, पर समझ न पातहएँ, नत् बे पश्‍चाताप करते,और बिनको पाप क्षमा हुईतो।” ¹³ बा उनसे कही, “तुम जा कहानीको अर्थ न समझे ? तव और सब कहानीको अर्थ कईसे समझैगे ? ¹⁴ बीज बोनबारो वचन बोत् हय। ¹⁵ कोई आदमी डगर में बोए भए बीज जइसे हएँ। जब बे वचन सुनत् हएँ, तव तुरन्त शैतान आत् हए और बिनमे बोओ भव वचन लैचलो जात् हए। ¹⁶ अइसि करके पत्थर बारे ठाँउमे बोए भए जेहि हएँ, जौन जब वचन सुनत् हएँ, तव खुशीसे तुरन्तै बे ग्रहण करलेत् हयँ। ¹⁷ तव उनको अपनो जर नलगनके कारन थोरी देर तक बे टिकत् हएँ। तव जब वचन को कारण संकट औ सताबट आत् हए, तओ बे तुरन्त गिर जात् हएँ। ¹⁸ काँटोके बिचमे बोए भए जेहिं हएँ, जौन वचन सुनत् हयँ, ¹⁹ पर जा संसारको चिन्ता और धनको लोभ और चीजको लालच आएके वचनके दबाए देत् हए, तव बे फरत न हयँ। ²⁰ तव अच्छी जमिनमें बोए भए जेहि हएँ, जौन वचन सुनत हएँ, और ग्रहण करत् हएँ, और फरा देत् हएँ तीस गुना, साठ गुना, और सय गुना।” ²¹ बा उनसे कहि, “का कुई दिया पजारके खटीया तरे धरन के ताँहि भीतर लात हएँ? का आरेम धारन ताहिं न ? ²² कुई चीज लुकाएके न धर पएहएँ, जौन जानि न जाबए, और कौन चीज है जौन उजियारोमे न लयहयँ। ²³ अगर कूई आदमीक सुननबारो कान हए, तव बा सुनए।” ²⁴ बा उनसे फिर कहि, “तुम जो सुनत हौ, बामे ध्यान देओ। काहेकि जौन नापसे तूम देहौ, बहे नापसे तुम पैहौ। और तुमके और जद्धा दओ जएहए। ²⁵ काहेकी जौनके सँग हए, बाके दओ जएहय, और जौन सँग न हय, बाके सँग भव फिर छिनो जएहए।” ²⁶ बा कहि, “परमेश्‍वरको राज अईसो हए- कोई एक आदमी जमीनमे बीज बोत हय, ²⁷ और बा सोए से फिर, जगे से फिर रातदिन बा बीज जमत हय और बढतहय, तव बा कईसे बढत है, बा न जानत हय। ²⁸ जमीन अपनए जमात् हय, पहिले पिङ्गा तव बाली, तव बालीमें पुरा दाना लागत हय। ²⁹ तव जब अन्न पकत् हए, तव तुरन्तए बा हँसिया लगात हए काहेकी फसलको बेरा आएजात हए।” ³⁰ बा फिर कहि, “परमेश्‍वरको राजको तुलना का के सँग करयें ? तव कौन कहानी से जाको बयान करयें ? ³¹ जा त भादीक दाना जैसो हए, जो जमीनमें बोत् हएँ | पृथ्वीभरमे सब बीजसे छोटो हए तहुँ फिर, ³² जब बा बोत् हएँ, तव बा बढत् हए, और सब सागपातसे बड़ो, और बाके बडे बडे हाँगा होत हएँ, और आकाशके पन्छी बाके छाहींमे घरघुस्ला बनात् हँए।” ³³ बिनके समझन बारी बा अईसी बहुत कहानी कहिके उनके वचन सुनाई। ³⁴ कहानी बिना बा उनसे न बोली, तव अपने चेलनके बा चुप्पए सबको अर्थ खोलदै। ³⁵ "बा दिन सन्झाके बा चेलान से कहि, ""आबौ, हम बोपार जामएँ।” ³⁶ तव भीड़से बिदा लैके पीच्छू, बा जौन नैयाँमे बैठो रहए बहेमें चेला बाके अपने सँग लैगय। और फिर नैयाँ बाकेसँग रहयँ। ³⁷ और बहुत भारी आँधी चली, और लडुरा नैयाँमें लणन लगे, हियाँ तक कि नैयाँमें पानी भरन लागो। ³⁸ बा अपना नैयामें पिच्छुके भागमे एक सिरहींन लैके सोतरहए। बे बाके अइसे करके जगाईं, “गुरुज्यू हम डूबन लागे का तुमए चिन्ता न हय ?" ³⁹ तव बा जगो, और आँधीके डाँटी, और समुन्द्रको लडुरासे कही, “शान्त हो और थमिजा।“ और आँधी थमीगै और शान्त हुईगओ। ⁴⁰ बा उनसे कहि, “तुम अईसे काहे डरात् हौ ? तुमर बिश्बास न हय ?" ⁴¹ तव बे बहुत डराई गए और आपसमे कहन लागे, “जा कौन हए ? आँधी और समुन्द्र फिर ईनको हुकुम मानत हएँ।”